Honolulu - HAWAII

Ua i luma nei o le ofisa a leoleo i Hawaii ia se tagi a se alii Samoa, e fa’asaga i le Ofisa Leoleo i Honolulu, ona o tu’ua’iga i le ave faapagota sese o ia e leoleo, e ui ina fa’amaonia i su’esu’ega a leoleo, lona tagofia o se ‘ava malosi.

E tusa ai ma se ripoti a le vaega fa’asalalau a le Hawaii News Now, o lo’o ta’ua ai le taofia e leoleo ia le susuga ia Ammon Fepuleai i le masina o Novema i le tausaga ua tuanai, i sana faigamalaga i Hawaii.

O le 11:30 i le po, ina ua tu’ua e Fepuleai ia se aiga fiafia o se faaipoipoga sa taofia ai lana ta’avale, a’o ia agai atu i lona aiga i Mililani.

Sa faamatalaina e Fepuleai i le Samoa Observer, o se taimi muamua lea ua taofia ai lana ta’avale mo le su’esu’eina i le ave ta’avale fa’asuaava po o le tagofia o fualaau faasaina, ma i le avea o ia o se tagata e le tagofia ‘ava malolosi po o fualaau faasaina, o se tulaga ua matamuli ai tele lona tagata, ona e foliga mai ua faapito ‘augafa le tulaga na tupu ia te ia.

O le susuga ia Fepuleai o se tasi o faiaoga i le Kolisi Tu’ufa’atasi a Amerika Samoa (ASCC) ae le gata i lea, ma o se tagata ua lauiloa i totonu o Amerika Samoa i ana auaunaga ‘ese’ese ma sa ia ta’ua e faapea, o se taimi muamua lea ua tupu ai se tulaga faapea ia te ia, o le taofia, lokaina ma aveina atu i le ofisa a leoleo.

Sa ia faamatalaina le ‘ese o ona lagona i le taimi na avefaapagotaina ai o ia e leoleo.  Sa ia lagonaina lona fefe ina ua lokaina ona lima, ona e le o iloa e se tasi, aiga po o uo, ia le mea o lo’o tupu ia te ia, ma po o le a foi le mea o le a tupu ia te ia.  

Ma sa ia ta’ua e faapea, lona taumafai e aua ne’i avea lenei mea sa tupu ia te ia ma tulaga e a’afia ai lona olaga.  Ae o lo’o ia taumafai e fa’aali atu i tagata lona fa’asagatau atu i fa’afitauli.  Ae ui i lea, sa ta’ua e Fepuleai le tumau pea o lona le mautonu ona o lenei mea sa tupu.

Sa ia faamatalaina le tele o taimi pe a faafoeina lana taavale, aemaise lava i le po, e taumafai malosi e nofo uta i ana faatinoga i luga o le aualatele ma tausisi i tulafono o le alatele.  Aemaise ai pe a va’ai i se ta’avale leoleo.

Ua faamaonia mai e le Ofisa a Leoleo a Honolulu, le tele o ni fa’asea ua o’o atu i le latou ofisa e ta’ua o le  ‘Professional Standards’ lea e mataituina tu ma aga a leoleo, i le faatinoga o a latou tiute, e tusa ai ma tagata e lokaina ona o le aveta’avale fa’asuaava.

Sa ripotia foi e le Hawaii News Now (HNN) ia aveta’avale na taofia ma su’esu’eina i le tagofia o ‘ava malolosi, ae na mafai ona faamaonia le le’i tagofia e nei aveta’avale o ni ‘ava malosi, ae peitai, sa lokaina pea i latou.

O nisi o nei aveta’avale, lea ua aofia ai ma Fepuleai, ua faauluina ni tagi mo le su’esu’eina o le faatinoga e nei leoleo, o a latou tiute.

Na saunoa Fepuleai, atonu o se fa’afitauli o lo’o fa’aauau pea ona tula’i mai.

Sa mafai ona maua mai e le HNN ia ata vitio sa pu’eina i masini pu’e ata o lo’o tauaveina e leoleo, lea na pu’eina ai le ave faapagotaina o Fepuleai ia Novema 2023, e ui ina sa su’esu’eina o ia (breathalyser) ma fa’amaonia e le o ‘ona o ia.

O le aso lava na toe tatalaina ai i tua ia Fepuleai mai i le falepuipui, na ia faaulu ai loa lana tagi.

O le lua vaiaso na soso’o ai, sa maua mai ai se tali mai i le ofisa a le ‘Professional Standards’ a le Ofisa Leoleo i Honolulu, lea na ta’ua ai le fa’amaeaina o se su’esu’ega a le latou ofisa ma fa’amautuina ai le le lava o fa’amaoniga e fa’avae ai le tagi a Fepuleai.

O lo’o taofi Fepuleai, e le o manatu mamafa ia le PSO i lana tagi.

Ae na fa’alauiloa mai e le alii loia (o se tasi foi na avea ma leoleo i Honolulu), o Jonathan Burge, e tele ina va’ava’ai le PSO i gaioiga a leoleo, pe sa latou mulimulita’i i tulafono uma.

Sa ta’ua e Burge le fa’ate’ia o ia ona e le’i fa’asalaina le leoleo sa aveina Fepuleai i le falepuipui, ona sa tapeina lana masini pu’eata a’o la aga’i atu ma Fepuleai i le ofisa a leoleo, e tusa ai ma le tulafono.

I le ata vitio sa fa’aali e le HNN i le latou faasalalauga, na fa’aalia ai le faia o le su’ega a Fepuleai (breathalyser test) ma le ripoti a leoleo na fa’amaonia ai le le’i fa’asuaava o Fepuleai, o lona uiga, e leai se ‘ava malosi i totonu o lona tino.

Ma na ta’ua e Burge, ina ua fa’amaonia le le’i fa’asuaava o Fepuleai, sa faapea loa ona sui faamatalaga a leoleo, e faapea, o lo’o latou masalomia le tagofia e Fepuleai o fualaau faasaina.

Sa fa’aalia e Fepuleai i le vaega su’esu’e a le HNN se vaega o le ripoti a leoleo lea na maka ai e leoleo ia le upu ‘leai’ i le vaega o lo’o faapea mai, “manogi ‘ava malosi po o se vaega o fualaau faasaina”.  

Ae sa pu’eina i le masini pu’e ata a seisi leoleo, le lokaina o lima a Fepuleai, ma le fa’amatalaga a le leoleo lona lua, ua mafua ona lokaina Fepuleai ona o lona fa’afoeina o le taavale, ae o lo’o maslomia i lona tagofia o le ‘ava malosi po o fualaau faasaina.

Ma o le taimi na tu’u ai Fepuleai i totonu o le taavale a leoleo, sa faapea loa ona tapeina e le leoleo sa aveina le ta’avale, ia lana masini pu’e ata, e ui ina o lo’o faamalosia mai i le tulafono, le tatau pea ona fa’aola lana masini pu’e ata.

E le gata i lea, sa ta’uina atu e Fepuleai i le HNN ina ua o latou fa’atalanoaina o ia i le tausaga ua mavae, le fa’atonuina o ia e leoleo ina ia ona te’ena lona toe auai i le faia o ni isi su’esu’ega i tua mai, ina ia fa’asaoina ai le taimi.

Sa usita’ia e Fepuleai le fa’atonuga a leoleo ma ia totogia ai le tupe faatulagaina e $500, mo le tatalaina o ia i tua.  Ae peitai, sa ta’ua e Fepuleai lona salamo i lona usitaia o le faatonuga lea a leoleo.

Na ta’ua e Fepuleai, e iai sona faamoemoega, e le o fautuaina e leoleo ia ni isi e pei ona sa o latou fautuaina ai o ia.