Pago Pago, AMERIKA SAMOA - Ona e le o taofia le faigaluega pea o tagata uma o lo’o galulue i le Kamupani I’a, o lo’o fa’apea fo’i ona le taofia ma nisi o lo’o faigaluega i galuega uma e fausia ai fale ma poloketi uma e 20 a le Kovana, na ia mana’omia ona faia ma ia mae’a, mai le amataga o le 2020.

O nei galuega uma e matele i faleta’alo o a’oga ta’itasi. Lea ua va’aia ua matagofie le tula’i mai o le faleta’alo o le a’oga a Matafao Elementary i Faga’alu, ae o lo’o ua amatalia le galuega o le Faleta’alo a le A’oga Maualuga a Nuuuli Votech High i autafa o le lotoa a lea laumua. O le galuega lea ua leva na’ua ona tulitulimatagau mai e le PTA a lea a’oga, ma sa amata savalia ai le nofoaiga a Tauese ma Togiola a’o tutula’i mai.

“Se fa’afetai ua faifai ua mafai, lea ua amatalia le galuega, o se galuega tapua’ia e le PTA, aua o le mana’o na fau ao fau po, ae o lea fa’ato’a mautinoa le mafuaga ona fa’atuai, ona sa tatalia lea lisi o lea eleele ina ia motu ese mai le Kamupani a le Pacific Products sa latou aiaiai lea laueleele. Lea fa’ato’a matuu ese mai i lenei vaitausaga, ma ua mafai ai ona fa’aauau loa le fa’amoemoe o le fanau a’oga, ae maise le pulega na soloa’i atu i lea laumua o le matata eseese.” O se tala fa’amama’i lea a le ali’i Faipule Larry Sanitoa ina ua iloa ua faia lea galuega.

E fa isi aoga tulaga muamua ua soloa’i atu latou galuega mo latou faleta’alo e aofia ai Manulele Tausala, Leone Midkiff, Lupelele ma Pago Pago Elementary.

Ua mana’omia lava e Kovana Lolo Moliga ona amatalia galuega nei i le amataga o Me ma e na’o le ono masina e tuuina atu i Kamupani Faufale o le a malo i tauofoga o nei galuega, e latou te fa’amae’a ai galuega uma na.

“E ese mai lea, ua afaina tele le auaunaga i le Manu’atele ina ua tau fai leaga uma va’a na fa’aaoga mo fela’ua’iga ma femalaga’iga, o le tatou lava Mea Toso Va’a i Satala e masani ona toe fa’aleleia ai o tatou Sa nei, peita’i ua faigata ona ua motusia lea tautua mo se taimi umi.”

Ua fa’ailoa fo’i le toe fa’avave ona fausia o nofoaga fa’apitoa e taofia ai nisi o le a suesueina fa’apitoa mo le fa’ama’i o le coronavirus ina ia lava tapena le i tatou i se taimi e po’ia ai e le fa’ama’i, ae ua tau lava ma totoe nofoaga e nofo malutia ai i latou o le a fa’amaonia o afaina ma le sosolo ai le pepesi o le fa’ama’i lenei i le atunuu.