Pago Pago, AMERIKA SAMOA - Na eseese finagalo fa’aalia o afioga i Senatoa i le taeao o le aso Gafua na te’a nei, i le mataupu e fa’atatau i siaki tupe ta’i $10,000 lea na maua mai i le faigamalo a Amerika Samoa e fesoasoani ai i le fausiaina o ni a latou Ofisa.

O le afioga i le ali’i Senatoa ia Tuaolo Manaia Fruean na muamua saunoa i lenei mataupu i le taimi o folafolaga a le maota, ae lagolago atu i ai ma le Sui Peresetene o le maota, le afioga i le ali’i Senatoa ia Nuanuaolefeagaiga S. Nua.

Na faamalulu le tofa Tualo i le maota o ni ana saunoaga na fa’aalia i se taimi ua sola e fa’atatau i lenei mataupu, ae o le mataupu e fa’atatau i le siaki, na faatoa momoli atu e le Failautusi a le Maota o le Senate ia te ia i le aso Faraile o le vaiaso na te’a nei.

Sa ia taua e fa’apea, ua uma ona ia fesiligia le mafua’aga o lenei siaki, ma ua ia manatu ai e toe faafo’i aloaia atu le siaki. 

“E le faapea ua ou mama pe ua tele ni a’u tupe, ae sa ou fesili i le Failautusi i le mea e fa’aaoga i ai le siaki, ae o lana saunoaga, e ave e faaleleia ai Ofisa a Senatoa,” o le saunoaga lea a Tuaolo.

“O loo lelei lava lo’u fale, o lo’u ofisa lava le telefoni, o le mea lea ou te faamalulu atu ai i le maota, ina ne’i ave sese e se tasi so’u lagona. O iinei na avatu atu le siaki, o iinei fo’i lea laa toe faafo’i atu ai, ou te le alu i se pepa poo se leitio e pei o isi.”

Na lagolago e le afioga a Nuanuaolefeagaiga le finagalo o Tuaolo, ma ia taua ai fo’i lana faaiuga ua i ai e toe faafo’i atu lana siaki, e fa’aaoga i nisi o manaoga talafeagai mo le malo, aemaise lava le faatupeina o tapenaga e tete’e atu ai i le faama’i oti o le COVID-19, atoa ai ma nisi o tagata faigaluega e le o totogia lava o latou ova taimi.

O le fa’aalia ai e alii Senatoa e to’alua o lenei mataupu i le taimi o folafolaga a le maota, na talosaga ai loa le alii Peresetene mo se avanoa e soalaupule ai le maota pe a mae’a le tauaofiaga, se’i faamanino ai tulaga o le mataupu e pei ona fesiligia e afioga i Senatoa.

Saunoa Gaoteote Palaie Tofau i le feiloaiga a le maota ina ua tapunia aloaia le tauaofiaga, e le i talosaga le Fono i le faigamalo mo se tupe, o le finagalo lava ia o le faigamalo na mafua ai ona maua lenei fesoasoani. Sa ia saunoa fo’i e faapea, e le na o le Fono o loo manuia i lenei seleni e $500,000, ae o lo o manuia ai fo’i ma le Vaega o Faamasinogaa i le faamanuiaga e $500,000, o tupe o lo o aumai i le teugatupe e taua o le Relief Fund e tusa ma le $35 miliona le aofa’i.

Na taua e Gaoteote e fa’apea, e le fou lenei mataupu i le faafofoga a le faigamalo. Ua leva fo’i ona taoto le talosaga a le Fono mo se vaega tupe e fausia ai Ofisa o Senatoa ma Faipule, ma ua manatu ai loa le afioga i le ali’i Kovana, e faamatuu mai le seleni leneie faatino ai lea manaoga ua tusa ma le 4 tausaga o taoto pea, nai lo le toe aumai o se isi pili tupe e faapasia atu i le Fono.

Na toe faatepa fo’i e Gaoteote afioga i Senatoa i saunoaga sa faalogoina i taimi ua te’a mai Tama o le atunu’u e fa’apea, “e le o ni tamaiti mea ia e o mai ai ma nofo nofo solo i vaega o le maota fono e leai ni ofisa mautu e ag’ai i aia.” I lona taofi, o le isi lea avega mamafa ua leva ona nofo ma ia,  o se vaega tupe e fausia ai Ofisa o afioga i Senatoa.

“E faigofie lava ona ou faia le faaiuga aua o loo tofu lava tatou ma le siaki, o lea fo’i e taofi la’u siaki, pau lo’u popolega o lo o i ai, o le tofa a le maota. Sa ou faapupulaina atu ia te outou lenei mataupu i se taimi ua te’a, e leai ma se isi o outou ana fapea mai e toe faafo’i lana siaki i lena taimi, a o lenei ua alia’e mai lenei mataupu, o atugaluga lena o loo nofo ma a’u,” o le saunoaga lea a Gaoteote.

Saunoa atili Gaoteote e faapea, “Ou te le o taalo i le ‘campaign’, ou te le faia fo’i ni faaiuga e lelei ai na o a’u, e leai ou te manatu i le mamalu o le Fono, ou te faia fo’i mataupu ma faaiuga mo le mamalu o le Fono. Ou te le faia to’atasia se faaiuga, e fai e outou.”

I le faaiuga o le saunoaga a le afioga i le alii Peresetene, na ia faailoa manino ai i le maota, “ou te le o ita ia te outou, na o lo’u alofa i le tofa a le Fono. O tagata o tagata matutua, e tatau fo’i ona tatou manatu faa Tama matutua, aua o la outou tofa e tua i ai le Fono, e tua i ai le aiga, le malo ma le atunu’u atoa.”

E to’atele isi afioga i Senatoa na latou lagolagoina le finagalo o le afioga i le ali’i Peresetene.

Na fa’aalia e le afioga i le ali’i Senatoa ia Tuiagamoa Tavai lona faanoanoa tele i lenei mataupu, ona e atagia mai i saunoaga ua mavae atu, e foliga mai ua ave uma le leaga i Senatoa ua latou talia siaki, ae le gata i lea, e foliga mai ua fesiligia le faaiuga a le afioga i le ali’i Kovana sa tuuina mai mo le manuia o le Fono.

Saunoaga Tuiagamoa, e le lava le ta’i $10,000 lea ua tufa mai e le malo e fausia ai Ofisa mo Senatoa ma Faipule. I lona lava taofi, ua silia ma le 4 tausaga o nofo nofo solo Senatoa e leai ni Ofisa e galulue ai, sa tatau lava ona ta’i $10,000 i le tausaga e aumai e faaleleia ma fausia ai ni Ofisa mo le Fono.

I le faaiuga o lana saunoaga, sa ia faaalia manino ai lona talia ma le agaga faafetai o le faaiuga a le Kovana, ae o ia, e le toe faafoia lana siaki.

Ae i le saunoaga a le afioga i le alii Senatoa ia Faamausili Mau Mau Jr, sa ia faatusa ai le tulaga ua tula’i mai i le upu faa Samoa, “Ua toe pu lava le vaa o Ti’a ia Ti’a”. E foliga mai ua toe afaina lava le Sa o le Fono i afioga i Senatoa faapea ai fo’i Faipule ua latou manatu e toe faafo’i a latou siaki i le faigamalo.

Saunoa Faamausili e faapea, o le Kovana, o ia o le Ta’ita’i o le faigamalo, o ia fo’i na faia le faaiuga e pei ona faamanuiaina ai afioga i Senatoa ma Faipule, e tatau fo’i la ona talia ma sapaia e le Fono le faaiuga a le Kovana. 

Sa ia taua fo’i lona faanoanoa tele i le tulaga o loo galulue ai Ta’ita’i o le maota. I lona talitonuga, e tatau lava i le Sui Peresetene ona lagolago i soo se faaiuga e saunoa i ai le alii Peresetene, ae foliga mai o lea e tau solomua i le Sui Peresetene ona le lagolago.

“Tatou tausi i le mamalu ma le maualuga o le Fono a le atunu’u, o la outou tofa e malu ai le Fono al e atunu’u, ae tatou faia se faaiuga tatou te nonofo lelei ai ma faauma ai lenei mataupu,” o le saunoaga lea a Faamausili.

Na lagolagoina e le Senatoa mai Manu’a ia Logoai Siaki finagalo e fa’atatau i le tatau lea ona silasila toto’a i le tofa a le Fono Faitulafono ma ia maua se Fono e maopoopo ma mamalu ana tauaofiaga.

“O le finagalo a le maota lenei e tasi, aua tatou te feeseesea’i, e le aoga nei mea o tupe, o le $10,000 e uma lava taeao, ae tatou vaavaai i le mamalu o le Fono,” o le saunoaga lea a Logoai.

“Taofiofi le mamalu o le maota, e le o se maota a oe, o le maota a le Falesefulu ma Tootoo, o tupe o mea e fai fai uma ae o le mamalu ma le fealofaniga o le Fono e faalagolago lea i le tofa a tatou o Tama o le atunu’u.”