NUANUA

Na iai se tamaloa mau’oa e igoa ia Solomona ma sana fanau tama e to’afitu.

Ua ma’i le toeaina o Solomona ma ua fail ana mavaega ma lana fanau.  Ma sa ia fesiligia ia ona atalii to’afitu po o le a se mea e latou te manana’o ai mai ia te ia.

Na tali le tasi atalii, e mana’o i le fale a le toeaina, o leisi na mana’o i le fanua, o leisi atalii sa mana’o i auro a le toeaina, ma faapena ai lava.

E o’o atu i le atalii mulimuli, po o le ui’i a le aiga, ua le toe iai ni oa ma fanua a le toeaina o totoe seia vagana ai ni solofanua o lo’o tata’a i luga o se a’ega.

Ua faapea mai loa le tamaititi laititi, po o le ui’i a le aiga, “Ia ua lelei, afai ua leai seisi mea o totoe, o le a ou aveina ia solofanua e fitu a lo tatou tama.”

E ui ina talie ia tama matutua ma faapea mai, ua valea le ui’i ma le mana’o i solofanua e fitu, ae peitai, e le’i ano iai le tama laititi. Ua fiafia ua maua ana fagafao.

Ua alu nei le atalii laititi e va’ai i ana solofanua, ona e fai lava sina mamao teisi o le mea e tata’a ai nei solofanua.  Ma ina ua taunu’u le atalii laititi, sa faamalieina lona loto i le pepeti ma le aulelei o ana solofanua.

Aemaise ai se tasi o solofanua, e sili atu lona lapo’a isi solofanua ma le lanu efuefu o lona lauulu.

Ua faapea ifo nei le atalii laititi, o le a tu’u isi ana solofanua ina ia mafai ona fa’atele ai solofanua o lana lafu, ae o le a ia ave le solofanua lapo’a ma le aulelei lea, e fealua’i ai.

Ae peitai, na te’i le atalii laitiit i le talanoa mai o le solofanua ma faapea mai, “Leai, tu’u a’u mo seisi tausaga, ae ave ia solofanua na e ono i le maketi e faatau ona e tago lea e fa’aaoga le tupe e faatau mai ai ni vao mago ma tu’u i totonu o le fale malepe le la e tu’u mai i o, ma e o’o  atu i le tausaga fou, ua tatau ona lava lo’u lapo’a e ta te o malaga ai.”

Ua ioe atu nei le atalii laititi i le tala a lana solofanua ma ia aveina atu ai loa ana solofanua e ono ma faatau i le maketi ma faapena ona faia tulaga uma e pei ona sa fautua mai ai lana solofanua.

Ona alu malaga lea na o le atalii laititi, mo le tausaga atoa.

I lona toe fo’i mai, na ia toe alu atu ai e asi lana solofanua ae ua toe faaopoopo mai ni isi solofanua.

Ae o lana solofanua lea sa totoe, ua fa’ateleina lona lapo’a ae o lona lauulu, ua pei ua le toe silika i le vaai ma le tago, ae e pei ua satini.

Ua faapea atu nei le atalii laititi i lana solofanua, “Sauni o lea o le a ta o.”

Ae tali mai le solofanua, “Leai, e le’i o’o i le taimi.  Toe alu e faatau solofanua ia, ae toe faatau mai ni ta vao mago ona faatali lea mo se tausaga atoa.”

Na faapena ona toe fai e le atalii laititi ma i le fa’ai’uga o le tausaga lona lua, na toe fo’i mai ai le atalii laititi ma ia va’aia foi le toe faaopoopo o solofanua i lana lafu.  Ae ua ia le va’aia ia lana solofanua lapo’a.

A’o tu le atalii laititi ma fetilofa’i lana solofanua lapo’a sa fa’ate’ia o ia i le lu lu o le lauele’ele.  Ma le tilotilo atu o le tama i  luga o le a’ega, o lo’o fa’aifo mai ai se solofanua ua maoa’e lona lapo’a ma le maualuga.

“Oka, fa’ato’a ou vaai lea i se solofanua pito sili ona tele i lo’u olaga atoa,” o le tala lea a le atalii laititi.

Ua taunu’u mai le solofanua o NUANUA, aua o le igoa lea ua fa’aigoa ai e le atalii laititi, ma faapea atu i le atalii laititi, “Ua o’o i le taimi e ta te faimalaga faatasi ai.”

[IA MANUIA FUAFUAGA UMA O LENEI VAIASO]