Ads by Google Ads by Google

E FAI O LENEI AE O LENA


[ata: SN]

“O LE NOFOA LA’AU”

Sa savalivali lemu atu lava le loomatua i le nofoa la’au sa i totonu o le paka ma nofo ai loa i lalo ma to lona sela.  Oka se manaia o le mafanafana o le susulu mai o le la, e ui ina fai sina malulu teisi lava o le savali o lo’o agi mai.  Ae sa le’i ano tele iai le loomatua, ona o le mafanafana o lona peleue sa ofuina.

Ua ia tu’u lana ato i luga o ona tuli.

“Talofa, e mafai ona ou saofa’i atu i ou autafa,” o se toeaina lauulu pa’epa’e lea ua tu i leisi itu o le nofoa lea o lo’o saofai ai le loomatua.

“Oi ioe, o lou ava lena,” o le tali mai lea a Elise, o le igoa lena o le loomatua.

“O a’u o Siaosi,” o le tala lea a le toeaina.

Ua faapena ona o la lu lu lima ma faapea atu le loomatua, “O a’u o Elise.”

Na fai sina umi o nofonofo le to’alua lea e aunoa ma se faamatalaga, ona faapea mai lea o le toeaina o Siaosi, “E ese lo’u fiafia i le nofoaga lenei.”

Ua tepa atu le loomatua o Elise ia Siaosi, ae toe faapea mai le toeaina, “Talu lava ona ou laititi, o lo’u fiafia ia ou te sau ma ou nofo i’i ma matamata i nofoa afi.”

Sa tilotilo Elise i le nofoaga na faasino ai ia Siaosi.  Ua le o toe iai ni nofoa afi.

“I le tele o taimi e le iloa e o’u matua le mea ua ou alu ai.  Ae ua ese foi nei vaitaimi.   E iai sau fanau?” o le fesili mai lea a le toeaina o Siaosi.

“Ioe, e to’alua fanau a si a’u fanau ua iai,” o le tali atu lea a le loomatua o Elise.

“Amuia oe.  O ai o la igoa?” o le toe fesili mai lea a Siaosi.

“O Timoteo le tama matua ma e to’alua lana fanau.  Ua matutua foi la’ua.  E seasea matou Talanoa,” o le tali lea a Elise.

“Manaia lena igoa o Timoteo,” o le tala lea a Siaosi.

“O la’u teineititi e igoa ia Elena.  Na fa’aipoipo i le tausaga na te’a atu nei.  Ae ua toeititi atoa lona 60 ae o le la fa’ato’a fai lona to’alua,” o le tala ata lea a Elise.

“Sa o’u mana’o e fai sa’u fanau,” o le tala leo lemu a Siaosi.

Ua fai sina umi ua le toe pisa seisi o la’ua ia.

“A e mana’o e faitau lau nusipepa, aua e te popole mai ia te a’u,” o le tala lea a Elise.

“Leai, e manaia foi le talatalanoa ma se tagata,” o le tali mai lea a Siaosi ma fa’a’ivi mai lona matai a Elise.

Ua ‘ata le loomatua o Elise ma fesili atu ia Siaosi pe sa nofo I se nofoaga lata mai.

Na tali mai Siaosi, e le mamao le mea na tuputupu a’e ai ma a’oga ai.  Ae ua fiu Siaosi e tau mfaufau le igoa o le nu’u.

“Ua ta matutua foi, a ea?” o le fesili atu lea a Elise ma toe ‘ata.

“O lena lava,” o le tali mai lea a Siaosi ma ‘ata foi.

“E ave’esea mea sili ona taua.  O tatou tino, o tatou mafaufau ma mea sa o tatou manatuaina,” o le tala lea a Elise.

“Sa e faaipoipo muamua, Siaosi?” o le fesili mai lea a Elise.

Ua lue le ulu a Siaosi ma faapea atu, “E leai.  Na iai se teine sa ou iloa ae ua galo ia te a’u lona igoa.  Ae a oe?”

“Ioe, sa faamanuiaina lou olaga ona sa mafai ona ou faaipoipo i la’u uo mamae,” o le tala lea a Elise.  “Ae ua maliu o ia, ma ua tu’ua ai na’o a’u.”

Ua a’apa atu nei Siaosi ma tu’u lona lima i luga o le lima a Elise.  “O le a le umi talu ona maliu si ou to’alua?” o lana fesili lea.

“Pe a ma le lima tausaga.  E le o toe tutusa se mea talu ona maliu o ia,” ua amata ona tafe mai loimata mai i foliga o Elise.

“E leai seisi o lua nonofo i le taimi nei?” o le toe fesili atu lea a Siaosi.

Ua lulu le ulu a Elise ma faapea atu, “O Timothy e fai sina mamao o le a’ai e nofo ai.  E faapena foi si a’u tama o Elena.  Ua toatele a’u uo ua maliliu foi i latou.”

Na tago Siaosi ma se’i mai se solosolo mai totonu o lona peleue ma tu’u atu ia Elise.

“Ou te iloa e tatau ona ou maua le loto faafetai aua o lea ou te malosi ma o lo’o maloloina ma fiafia si a’u fanau,” o le tala lea a Elise.  “Ae ou te nofo lava ma mafaufau, po o le a le uiga o lo’u olaga.”

Sa leai se tali a Siaosi.

“E leai se ‘ese’esega o o’u lagona mai lava i le vaitaimi na ou talavou ai.  Ae ou tilotilo i le fa’ata, e ‘ese le loomatua o le tagata lea e toe tilotilo mai ia te a’u,” o a Elise lea.  “O le a le uiga o nei mea uma?”

Ua faamimigi tau’au a le toeaina o Siaosi ma faapea atu, “Ou te leiloa foi le tali o lena fesili.”

Ona toe nofonofo filemu ai foi lea o le to’alua lea.