O LE TA LA’AU FA’AMAONI

Sa faia le galuega a se tama matua, o le tatu’uina lea o la’au i totonu o le vaomatua, ae se’e lana to’i ma pa’u atu aga’i i lalo o le mauga sa galue ai, ma pa’u i totonu o se vaitafe.

A’o le taimi lea o lo’o tilotilo mai ai le Atua o le vai, o Mekari ma ia taumafai ai e fesoasoani mai i le alii ta la’au.  Ae na manatu Mekari, o le a muamua ona su’esu’e le alii ta la’au.

Na a’apa Mekari i totonu o le vaitafe ma ia se’i mai ai se to’i auro ma tu’uina atu i le toeaina ta la’au.

Ona o lenei toeaina, o se tagata alofa tele ma toaga e galue ma o le mafuaaga lea ua alofa mai iai le Atua o le vai ma mana’o e fesoasoani ia te ia.  

Ae ina tu’uina atu e Mekari i le toeaina ia le to’i auro, sa faapea mai iai le toeaina, “Fa’afetai lava Mekari, ae e le’o sa’u to’i lena.  E ui i le matagofie o lenei to’i ae peitai, e sili atu ia te a’u la’u to’i tuai.  E mafai ona e toe tagai tasi atu lava i totonu o le vaitafe, pe e te maua mai la’u to’i tuai?”

Sa fa’ate’ia le Atua o le vai i le tali mai a le toeaina ta la’au faapea.  O lea na ia toe a’apa ai i totonu o le vaitafe ma se’i mai seisi to’i e gaosia uma i le siliva.

Ae peitai, sa toe tali mai foi le toeaina ta la’au, “O oe o se Atua alofa ma ou te fa’afetai i lau fesoasoani mai i le tau sailiga o la’u to’i, ae paga lea, e le o la’u to’i foi lena.  E mafai ona e toe tilotilo tasi atu lava i totonu o le vaitafe pe ono maua mai ai la’u lava to’i.”

Ua faapea loa ona toe a’apa atu Mekari i totonu o le vaitafe ma ia toosina mai ai i fafo le to’i tuai a le toeaina ta la’au ma sa oso atu le toeaina ma le agaga fiafia ma le agaga fa’afetai i le atua o le vai ma u’u mai lana to’i.

O iina na faapea mai ai loa le Tupu o le vai, “Ona o lou fa’amaoni tele, o le a ou fa’ameaalofaina atu ai le to’i auro ma le to’i siliva mo oe.”

(IA MANUIA FUAFUAGA UMA O LENEI VAIASO FOU UA O TATOU SAVALIA)