O SE ASO FANAU MAOA’E

Na umi se taimi o nofonofo si toeaina o Siaosi i le polotito pito i luma o lona fale.

Ua mae’a ona fa’amama lelei lona fale.  Sa ia faia foi se kuka.  Ma ua mae’a foi ona kiliva mai le keke aso fanau.

O nei e atoa iai le 90 tausaga o lenei tama matua ma o lo’o ia faatalitali mo le taunu’u mai o si ana fanau e to’alima, ma o latou taitoalua ma a latou fanau, ma fanau a fanau, mo le faamanatuina o lona aso fanau.

O Siaosi ua lima tausaga talu ona maliu si ona to’alua ma ua ta’itasi ona malaga ese atu le fanau, i le mae’a ai o le la tausiga ma si ona to’alua, ma i’u lelei a latou a’oga, e saili so latou lumana’i manuia.

Ae peitai, ua atoa nei le tolu tausaga, ua maitauina e le toeaina o Siaosi, ua fa’afaigata ona toe fo’i mai lana fanau e asi mai o ia. 

Ua le toe o mai i aso fiafia, ua le toe o mai i lona aso fanau, ua o’o lava i le aso faamanatu mo si ona to’alua, ua le toe o mai foi.

O le mea lea ae e le’i o’o mai i le aso e faamanatu ai le 90 tausaga o si toeaina o Siaosi, sa ia tago ma fai fa’alelei lava ni tusi valaaulia mo lana fanau e to’alima ma lafo iai, e valaaulia ai i latou i le faamanatuina o lona 90 tausaga.

O le taeao o lona aso fanau, na usupo lava Siaosi i le matua’i faamama uma lona fale atoa, faapea i fafo i le lotoa.  Ona ia kukaina lea o mea’ai o lo’o ia manatua, e fiafia ai lava lana fanau.

Ona sauni loa lea o Siaosi i ona la’ei manaia ma ia savali atu loa i le saofa’i i luma o le polotito i luma o le fale, ma faatalitali ai mo le taunuu mai a lana fanau.

Ae paga lea, na o’o lava i le afiafi, o saofa’i si toeaina o Siaosi, ae leai lava seisi o lana fanau na sau.

O le tulata o le ta o le 4 i lea aoauli, ae fa’alogoina e Siaosi le gase mai o luma o le faitoto’a o le pa.  Ua tu fiafia i luga ia Siaosi ma lona manatu, o se tasi o lana fanau.

Ae sa matua’i faanoanoa lona agaga, i lona vaai atu, o se tasi o ona tuaoi lea e savali mai.

“Malo le soifua Siaosi!” o le valaau fiafia mai lea o le alii o Peniamina.

“O le a le mea e te mana’o ai?” o le tali atu lea a Siaosi ua le nanaina lava lona le fiafia ma le tiga o lona loto.

“O iai sou avanoa se’i ta talanoa ai?” o le fesili mai lea a Peniamina ma ata mai.  “O lea na ou sau ma le pai lea na fa’ato’a uma lava ona tao e si loomatua o Naomi.”

“E leai! O lea ou te pisi!” o le tali mai lea a Siaosi ma liliu atu o le a toe fo’i i totonu o lona fale.

“Oka, e le mafai na uma ia te a’u lea pai.  Ae o lena e te iloa na’o a’u lo’u fale,” o le tala ata lea a Peniamina.

Ua tu le toeaina o Siaosi ma tilotilo mai ia Peniamina.  Ua manatua e Siaosi, o Peniamina, e nofo to’atasi na’o ia.  E le’i leva ona maliliu ona matua.  Ae e leai ni ona uso po o tuafafine.

Ua toe saofa’i ifo loa i lalo ia Siaosi ma faapea mai, “Ia alu oe e aumai le naifi ma ipu mai totonu o le fale.”

Ua ata leotele Peniamina ma ia tamo’e faatopetope i totonu o le fale, ae na ia toe valaau mai.  “O lea o le a ou tago e tunu le ta kofe e ‘ai ai le ta pai.”

A’o ‘a’ai le toalua lea i luma o le fale, sa faasoa atu e Peniamina i le toeaina o Siaosi, le faigata ia te ia, o vaitaimi o aso fiafia lea ua latalata mai, ona o le leai o se tasi i lona aiga.  Ua lagona e Siaosi lona alofa ma lona malamalama lelei i le tulaga o lo’o pagatia ai le loto o Peniamina.

Na te’i Siaosi i le fesili atu o Peniamina, “O le la na ou va’ai i le keke i luga o lau laulau.  O sau teine na sa faatali?”

Ua ata le toeaina ma faapea atu ia Peniamina, “E leai, o nei e atoa ai le 90 o o’u tausaga.”

“Auoi! Aisea na e le fai mai ai?  Ia fa’atali tasi atu la i’i.  Aua ne’i e alu i se mea,” o le tala lea a Peniamina ma tu loa i luga ma tamo’e atu agai i le auala.

E le’i umi na alu Peniamina, ae vaaia e Siaosi le amata ona gasolosolo mai o tagata o le latou nu’u i lona fale, e o mai lava ma aumai mea’ai ma meaalofa.

O se pati fiafia sa faia i lena afiafi mo le toeaina o Siaosi ma sa mafai ona faamama ai le mafatiaga o lona loto ma lona mafaufau, i le le auai mai o lana fanau.

O lena afiafi, sa fa’ailoa atu ai e Peniamina i le nu’u atoa, o ia o le atalii fai a le toeaina o Siaosi.

[IA MANUIA TAUALUMAGA UMA O LENEI VAIASO FOU]