O LE FAGAFAO O POGI MA LONA SI’USI’U

Sa iai se fagafao e igoa ia Pogi, o le mea e fiafia lava e fai, o le moe.  O nisi aso, e uma lelei le aso o lo o moe lenei fagafao.

Atonu o le mafuaaga lea na lelava ai lona si’usi’u.  Ona e ala ifo Pogi i leisi aoauli, ua fiu e su’e lona si’usi’u.  Ua sola lona si’usi’u e tafao, ae tia’i o ia.

Ua fai sina matamuli o Pogi, ona ua ula uma atu iai isi pua’a, i le leai o sona si’usi’u.

O lea, na tonu ai loa ia Pogi, o le a alu e su’e mai lona si’usi’u.

E le’i umi ona savali Pogi aga’i i le togavao, ae se’e i ni laula’au.  “Oka matua’i tele le lapisi i totonu o lenei togavao,” o le tala lea a lenei fagafao ma savali lava.

E pasi teisi atu le lapisi, ae sulu Pogi i luga o se ogala’au, ma ta’avalevale atu ai i leisi itu o le togavao.

Ua tu a’e i luga ia Pogi ma tau autilo solo pe na iloa mai e seisi lana sulu lea na sulu ai.

Ua valaau atu nei Pogi, “Faamolemole lava pe na vaai seisi i la’u si’usi’u?”

Ae tali mai se faapulou aitu, “E le manaia pe a avatu se pulou aitu e fai ma ou si’usi’u?”

“E, e leai, o lea ou te mana’o i lo’u si’usi’u,” o le tali mai lea a Pogi.

Ua savali ese atu Pogi mai i le togavai, ae ua faatu lana savali aga’i atu i totonu o le a’ai.

“Oka! matua’i pisa tele lenei a’ai,” o le tala lea a le fagafao ma taumafai e tapuni ona taliga i le alamu solo o taavale ma pasi.

Ana le vave le oso i tua a Pogi, semanu e so’a o ia e se loli tele lava.

“Faamolemole lava pe na vaai seisi i lo’u si’usi’u?” o le valaau leotele atu lea a Pogi.

“E avatu se paluni e fai ma ou si’usi’u?” o le valaau mai lea a se lupe o lo o tum ai i luga o se fale, ma le ata leotele.

“E, e leai, ou te mana’o lava i lo’u lava si’usi’u,” o le tali atu lea a Pogi.

Ua liliu le fagafao ma agai ese atu ma le a’ai, agai i luga o se mauga ma na ia iloa mamao atu ai se ana, ma ia manatu ifo faapea, “Atonu o lo o lafi i totonu i o lo’u si’usi’u.”

Ua savali atu nei Pogi ma tu i le gutu o le ana, “Oka se pogisa o lenei ana,” o le manatu ifo lea a le fagafao.

Ua savalivali lemu Pogi i luga o ma’a i totonu o le ana, ae na faate’ia o ia, i lona sulu atu ma feto’ai ma se faaputuga ma’a tele lava.

“Faamolemole lava pe na vaai seisi i lo’u si’usi’u?” o le valaau atu lea a Pogi i le pogisa.

“E avatu ia se a’a la’au lea e fai ma ou si’usi’u?” o le fesili atu lea a se pe’a o lo o upe mai i luga o le ana.

“E, se leai, o lea ou te mana’o i lo’u si’usi’u,” o le tali atu lea a Pogi.

Ua savali atu nei Pogi agai i le malamalama i leisi itu o le ana, ae fa’afuase’i ona pa’u atu aga’i i totonu o le sami.

Na vaaia e Pogi le a’au mai o nisi o i’a o le sami, ma li’o o ia, ae taumafai ia Pogi e lafi i tua o se ‘amu.

“Faamolemole pe na tou vaai i lo’u si’usi’u?” o le fesili atu lea a le fagafao i i’a o le sami.

“E avatu se limu e fai ai lou si’usi’u?” o le fesili mai lea a se laumei.

“E Leai! O lea ou te mana’o i lo’u lava si’usi’u,” o le tali atu lea a le fagafao, ua amata ona ita.

Ua a’au ane i luga o le pa’u matu ia Pogi ma saofa’i ai i luga o le matafaga.  Ae te’i i le tolotolo atu o se pa’a ma saofa’i i ona tafatafa ma fesili atu, “O le a le mea ua e faanoanoa ai?”

Ua ea ane i luga le fagafao ma faapea atu, “O lea e tau su’e lo’u si’usi’u, ae ou te le iloa po o fea ua o’o iai.”

Ua liliu nei le pa’a ma toso atu se maea sa ta’atia i luga o le matafaga ma faapea atu ia Pogi, “E te le mana’o e avatu le maea lea e fai ma ou si’usi’u?”

Ua tilotilo atu Pogi i le pa’a ma le maea ma ia toe mafaufau i tua i si’usi’u ese’ese na ofoina atu e isi meaola ia te ia, ma ia faapea ifo, “E manaia foi sia mea o le ‘ese’ese o si’usi’u.” 

Na te’i si pa’a ina ua ata leotele ia Pogi ma faapea mai, “Ua lelei, o le a tu’u lo’u si’usi’u e alu e tafao, ae o le a ou toe fo’i i le fale ma o’u mau si’usi’u fou ia ua maua.”

[IA MANUIA FUAFUAGA O TOTOE O LENEI VAIASO]