VAEGA 07

E toe fa’atalofa atu i a tatou pa’aga i so’o se tulimanu o le kelope o lo’o maua mai ai lenei auaunaga, aemaise i nai o tatou tama ma tina matutua i Amerika Samoa. E fa’atalofa atu i le faaopoopoga fou o le tatou Fagogo. E tatou te tau fai si’faatasi le viiga ma le mua i lo tatou Tapa’au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa’i ma le manuia i lenei taeao fou.

Ia ae se’ese’e mai loa i ou se’malu, ae o le a taumafai atu le tatou Fagogo – O LE AVE PASI A’OGA.

*****************************************

Sa gata mai le tatou FAGOGO i le vaiaso ua mavae, ina ua su’esu’eina e le alii a’oga o Simeona ia le latou ave pasi, le alii o Paulo, ina ua va’aia e Simeona foliga o Paulo, ua tulaga ese lava.

“O e ‘ona? Ua matua’i tetele lava le pupula o ou mata,” o le toe faapea mai lea o Simeona.

“Sole, e leai,”  o le tali atu lea a Paulo.  “E le’i lelei la’u moe anapo.”

“E ala ona ou fesili, leaga e faapena ia foliga o lo’u uso pe a uma ona ia fa’aaogaina ia ni fualaau faasaina,” o le tala lea a Simeona.

“Sole Simeona.  O oe o se fomai?” o le ‘ote mai lea a Paulo.

“E leai, e le o a’u se fomai.  Ae ou ke iloa foliga o se kagaka pe a fa’aaoga fualaau faasaina,” o le faapea mai lea a Simeona.

“Ia alu loa e gofo i lalo, ae ou ke le’i alaku po oe,” o le oso mai lea a Paulo.

Ua iloa lelei e Paulo, ua mate’ia e Simeona, ia lana tupua.  Ma ua va’aia foi le masalomia o ia e tamaiti a’oga uma lava sa i totonu o le pasi.  Ma e tasi lava le tamaititi po o le teineititi, e mao sana tala i le puleaoga, e iloa lava ua fa’ate’a o ia.

Ma e le tau fa’atalitalia foi i le faia o ni su’esu’ega.  Ma ua oso ai loa mafaufauga a le alii ave pasi o Paulo, ua tatau loa ona fa’atino lana gaioiga lea fafau, ma ia faatino i se taimi lata mai.

Ma o lea, na tonu ai loa i le mafaufau a Paulo, o le a oso atu lana pasi i le auala umi, lea e le masani ona tami atu ai.  O le auala lea, e mafai ona o’o ai le saoasaoa o ta’avale i le 70 po o le 80 maila i le itula.  Ona tu’usa’o atu lava lea o le pasi i se pou moli, po o se pa sima.

E le o mautinoa e Paulo, pe fia tamaiti a’oga o fa’aaogaina a latou fusipau.  O se tulaga e tatau ona ia siakiina i taeao uma, ae e fa’atalale lava ona ia faia.  Ma e o’o lava ia te ia, e le o faia soona fusipa’u nofoa.

[E FAIA PEA]