Pago Pago - AMERIKA SAMOA

I le fa’agasologa o le iloiloga a le Komiti o le Soifua Maloloina a le Senate ma Dr. Akapusi Ledua ma Dr. Jean Anderson, i le aso Gafua na se’i mavae atu nei, Setema 9, 2024, sa fa’atula’i ai e nisi o afioga i Senatoa se manatu, mo le fa’ata’apeina o le komiti fa’afoe a le LBJ, ae toe fa’afo’i le falemai i lalo o le va’ava’aiga a le Kovana ma le faigamalo.

Na saunoa Tuaolo, talu lava ona fa’afoeina e le komiti faafoe o faatonusili ia le falemai, ua tele ni faafitauli ua tula’i mai, pe a faatusatusa i le taimi na mataituina ai e le faigamalo ia le falemai.

Ma na fesiligia ai e Tuaolo ia Ledua i sona manatu pe afai ae finagalo le Maota Fono e ave’ese le komiti faafoe a le LBJ, ae toe aumai i lalo o le taitaiga a le kovana, e pei lava o isi faatonusili.

Sa tali Ledua, i sona talitonuga, o so’o se tulaga e avea ma puniala i le faaleleia atili o auaunaga mo le tausiga lelei o le soifua maloloina, e tatau ona fai iai se fuafuaga.  Na saunoa foi Ledua, o le sini e le o se tagata se to’atasi po o se komiti faafoe – ae o le sini, o le tausia lelei o le soifua maloloina mo tagata uma aua le lumanai a sau.

Na fa’aalia e Ledua le manaomia o se auaunaga sili atu mo le tausia o soifua maloloina o o tatou tagata, ma afai e iai se puniala e ono taofia mai ai le ausia o lea tulaga, e tatau lava ona faia iai se faaiuga.

O lana talosaga, e pei ona saunoa Ledua, o le a aumaia e le Atua le atamai e faia ai se faaiuga sa’o.

Sa fa’aalia e le afioga i le Senatoa ia Soliai Tuipine Fuimaono ia lona lagolagoina o le saunoaga a le peresetene a le Senate, i le tulaga lelei na iai le falemai i tausaga ua tuanai a’o le’i tutoatasi ma e le’i iai ni faafitauli tetele. 

Ma na saunoa Soliai, afai ae ioe iai Ledua e soloia le koiti faafoe, o le a faapea ona soalaupuleina e le Fono lea tulaga ma afai ae pasia, o le a ave loa se I’ugafono taufaaofi i le kovana, ina ia toe faafo’i le LBJ i le mea sa iai muamua.

Na fesiligia foi e Soliai ia Ledua i le la fonotaga ma le Kovana, po o le a se mea sa talanoaina ai.

Sa tali Ledua, na fesiligiaina o ia e le kovana i ana fuafuaga ma pe mafai ona toe fo’i atu i le falemai.  Ua mae’a ona fa’ailoa e Ledua i le kovana, e mafai ona ia toe foi atu i le falemai.

I le iloiloga a le Komiti o le Soifua Maloloina a le Senate ma nisi e to’alua ua fa’ate’a mai i a la galuega i le LBJ, na fesiligia ai e le Peresetene o le Senate, le afioga ia Tuaolo Manaia Fruean ia Dr. Akapusi Ledua lea ua fa’ate’a mai i lana galuega o le Faatonusili a le LBJ, pe moni ia tu’ua’iga a le taitaifono a le komiti fa’afoe a le falemai, e faapea, o le konakarate lea sa sainia ma se kamupani fa’amama toto mai Amerika, na sainia e ia (Ledua) ma seisi taitai o le LBJ, e aunoa ma se fa’atagana, pe na pasia mai foi e le komiti faafoe.

Na tali Ledua, e le moni ia tu’ua’iga.

Sa faamanino e Ledua, ae e le’i sainia ia le konakarate, sa ia muamua fa’afeso’ota’i le komiti faafoe mo se fa’atagana e mafai ai ona o’o mai le CEO o le kamupani faamama toto mai Amerika, e fai sana folasaga ma na taliaina e le komiti lana talosaga.

I le mae’a ai o le folasaga a le CEO mo le kamupani faamama toto mai Amerika, sa ta’ua e Ledua, le fiafia o le komiti faafoe ma fautuaina ai le o’o mai o le CEO lea, i luma o sui o le Maota Fono, e fa’asoa mai ai lana folasaga ia i latou. 

Sa ta’ua foi e Ledua, sa ia fesiligia le komiti faafoe, pe mafai loa ona sainia le konakarate ma le kamupani mai Amerika.  Ma na fa’ama’oti mai i le molimau a Ledua, le tu’uina mai o le fa’atagana mai i le komiti faafoe, ae sa latou fa’ailoa mai ia te ia, le le mafai ona o latou auai mai i le sainiga o le konakarate, ona o lo’o pisi i nisi tiute.

Na molimau foi Ledua, i se latou feiloaiga ma vaega fa’asalalau ina ua mae’a ona sainia le konakarate, sa ia ta’ua ai foi le pasiaina o lenei konakarate e le komiti faafoe.

I lana molimau, na fa’aleoina ai e Dr. Jean Anderson, lea ua fa’ate’a faatasi ma Ledua, lona masalosalo tele i lenei faaiuga ua faia e le komiti faafoe, lea ua fa’ate’a faatasi la’ua ma Ledua, i le taimi e tasi.

Na ta’ua e Dr. Anderson, o lona tiute sa faatinoina i le avea o ia ma COO a le falemai, o le mataituina lea o galuega fa’ainisinia ma le fa’aleleia (maintenance) o le falemai.  O le latou ofisa lea o lo’o fa’atautaia foi le tele o poloketi, e aofia ai ma le fausia ma le toe faaleleia o le fale maliu ma le falesa a le LBJ

Sa fesiligia e Tuaolo ia Dr. Anderson pe sa ia mauaina se fesootaiga mai i seisi o le Fono, po o ia (Tuaolo) foi, e tusa ai ma se galuega a le LBJ.  Na tali Anderson, e leai, e leai lava se kamupani fau fale lotoifale, na faafeso’ota’i sa’o atu o ia, mo se galuega a le falemai.

Ae peitai, i le fa’aauau ai o le molimau a Anderson, sa ia ta’ua ai le fa’afeso’ota’i atu o ia e se tasi o sui o le komiti faafoe a le falemai, ma faatonuina o ia e ave le galuega o le fale maliu ma le falesa, i se tasi o kamupani.

E le’i faaleoina e Anderson le suafa o le sui o le komiti faafoe, po o le kamupani.

Na fesiligia e Tuaolo ia Anderson, po o iai sona manatu e fai sana tagi e faasaga i le komiti faafoe a le LBJ, ona o le fa’ate’aina o ia mai lana galuega.  Sa tali Anderson, e leai sona manatu o iai e faia lea tulaga.  Ae o lo’o ia toe fia fo’i e fa’aauau lana tautua i le LBJ, pe afai e mana’omia lana fesoasoani.

Sa fa’aalia e Anderson, o lo’o iai sana lava kamupani tua o lo’o pisi ai, ae o lona fatu o lo’o i le LBJ.

I le saunoaga a le afioga i le Senatoa ia Alo Paul Stevenson, sa ia faaleoina ai le agaga fa’afetai ia Ledua ona o lana tautua ma lona agaga faanoanoa i le faafitauli ua tulai mai, ona ua afaina ai lona tagata.

Na saunoa Alo, e na te leiloa po o le a seisi fautuaga e tu’uina atu, ona ua leai seisi tulaga e mafai ona o la faia (Ledua ma Anderson), ona o lea ua fa’ate’aina o ia ma ua tu’ua’ia foi i la’ua i nisi o tulaga ma o nei mea uma, o le a fa’amaumauina i tala’aga o la la’ua tautua, ma o se tulaga e a’afia ai i la’ua.  

Sa fautuaina e Alo ia molimau ina ia o la faia le mea e tatau ona o la faia, ina ia toe fa’amamaina ai o la tala’aga.

Ae peitai, sa faamanino e Alo o lo’o iai pea se naunautaiga i le Senate, ina ia fa’aauau pea le la tautua.

Na fa’aleoina e Ledua lona agaga fa’afetai i afioga i Senatoa ona o upu faala’ei’au ma ia ta’ua e faapea, e pei lava o isi tagata faigaluega, sa amata mai lava ona galue mai i le pito i lalo o le apefa’i, lea ua ia tau i le tumutumu, ina ua filifilia o ia e avea ma CEO o le falemai.

Na ia saunoa foi e faapea, ua o’o mai o ia i se tulaga ua a’e ai se manatu e sui mai lana tautua i se gasegase e toatasi, ae ia tausia se faalapotopotoga tele, e mafai ona aofia ai ni tagata se to’atele.

Sa fa’aalia e Ledua, o lana sini autu o iai, o le fa’aleleia atili lea o le tulaga o le tausiga o le soifua maloloina i totonu o le teritori, ina ia mafai ai ona le toe manaomia ona faimalaga atu tagata o le atunu’u, e fai a latou talavai i Hawaii po o Niu Sila.