Ads by Google Ads by Google

$9 miliona, nofo aitalafu ai le malo i le Teugatupe Ritaea


[ata: foa'i]
Kovana Pulu: Faigata ona ausia totogi a tagata faigaluega o le malo ma le tele o aitalafu le totogia

Pago Pago - AMERIKA SAMOA

O le aso Gafua na se’i mavae atu nei, Ianuari 13, 2025, sa tatalaina aloaia ai le Fonotele muamua o le Tauaofiaga lona 39 a le Fono Faitulafono, i lalo o le Faavae Toe Teuteuina a Amerika Samoa, i lona mataupu 2 vaega e 8, i le H. Rex Lee Auditorium, i Utulei.

Sa faapea ona aofia potopoto ai le afioga i le Kovana o Amerika, Pulaalii Nikolao Pula ma le afioga i le Lutena Kovana, le matua ia Pulu Ae Ae, afioga i Senatoa ma Faipule, afioga i le Faamasino Sili ia Lealaialoa F. Michael Kruse faapea le afioga i le sui Faipule o Amerika Samoa i le laumua i Uasigitone, Uifaatali Aumua Amata.

I lana saunoaga autu o le aso, sa tatalaina ai e le afioga Kovana Pula lana tautalaga e faapea, i le saunoaga a Kovana Roma Mareko Atonio, “Ou te le’i sau e vivi’i Kaisara, na ou sau e auai i  lona toe sauniga.”  “E faapena so’u vaivai I lenei taeao, ma te le’i o mai, e avatu ni masei o le faigamalo tuai, pe saili ni viiga o le faigamalo fou.  A’o le agaga moni ia manino ma lausilafia e si o tatou atunuu le tulaga ma le faataotoga o le malo, o lo’o iai nei.”

 O le vaega atoa o le saunoaga a Kovana Pula sa fa’aaluina i le fa’apupulaina mai o le tulaga o le Paketi a le malo o iai nei, mo le tausaga tupe 2024-2025.  Ma sa le’i ‘alo se faamatalaga a le afioga i le Kovana i lona fa’alauiloa mai o le tulaga faaletonu o iai “i le fa’agaioiga o le tatou malo, ona o le aofai o le tupe maua o lo’o totoe mai, talu ona fa’aaogaina mai i le tuanai.”

Sa saunoa Kovana Pula, “O le tausaga tupe 2025 lea sa amata mai ia Oketopa 1, 2024 ae o le a fa’ai’uina ia Setema 30, 2025, e $28 miliona” le tupe maua na aoina i le kuata muamua.  “A faapea e fa’aauau lea faatatau mo leisi iva masina o totoe, e $111 miliona le tupe maua a le malo mo le tausaga tupe 2024-2025,” o a Pula lea.

“O le paketi sa pasia e le fono faitulafono, sa fuafua i tupe maua e $166 miliona mo fuafuaga a le malo,” o le faamanino mai lea a le afioga i le Kovana.  O lona uiga, e “pa’u le tupe maua a le malo i le $55 miliona.”

Na fa’ailoa mai foi e le afioga i le Kovana se lu’itau tele o feagai ma le malo, o le taumafai e fa’aauau lana tupe faasoa i vaiaso totogi mo tagata faigaluega a le malo.  Ma ua atili faigata lea tulaga, ona o le silia ma le $1 miliona lea sa fa’aaluina mo ‘pay out’ po o totogi, o le kapeneta a le Faigamalo lea na to’ai tula’i ese atu.

E ui i lenei ata le mautonu, ae ua talitonu le Faigamalo fou, o le fa’aitiitia o tupe fa’aalu, o le a mafai ai ona ausia e le Faigamalo ona faia totogi a ona tagata faigaluega.

Sa ta’ua foi e le afioga i  le Kovana le tele o aitalafu a le malo o lo’o mana’omia ona totogi.  E pei o le $9 miliona lea o lo’o nofo aitalafu i le Teugatupe a le Ritaea, o pili a le ASPA ma le tupe fesoasoani mo le Kolisi Tu’ufa’atasi a Amerika Samoa (ASCC), “...ma le tele o isi lavelave o teugatupe a le malo.”

Na saunoa le afioga Pula i tulaga o fa’atauga (procurement process) a le malo ua le usitaia aiaiga e pei ona taitaia ai.  Ma ua ia folafola mai le ‘faatulagaina e le Faigamalo fou o auala ina ia le toe tupu ai lea tulaga.  Ia aua ne’i iai se fa’aitu’au.”

Sa ia ta’ua le tele o tupe na maua mai e Amerika Samoa mai i le malo feterale talu mai le Koviti19 faapea ai ma tupe fesoasoani mai i le ARPA (American Rescue Plan Act), ma o se tupe e sili atu nai lo tupe sa masani ona maua mai i le malo feterale.

Ae o lea tupe, e pei ona faamanino mai e Pula, o le a le fa’aauau pea i le lumanai.

Aua e pei ona sa ia faamanino mai, atonu o le a ‘ese foi se fuafuaga a le Faigamalo a Trump lea ua tula’i mai, o le a ave iai le fa’amuamua i le fa’asoasoaga o tupe feterale.

Sa ia saunoa, ua tatau ona fa’amautinoa, e le faavae ia le tala ole tupe a le tatou malo, i tupe tetele ia sa masani ona maua mai i le malo feterale, i le fa tausaga ua te’a atu.  Ae sa ia faama’oti mai le feagai o le malo ma fa’afitauli tau tupe, ona o le pa’u o le tupe maua faaopoopo ma le tele o tupe fa’aalu i tausaga ua te’a atu.

Na fa’aalia foi e le afioga i le Kovana ia le galulue pea o le malo i le taimi nei, ina ia maua se ata ma’oti o le tulaga o iai le tala o le tupe a le malo.  Ae ua o latou taga’i toto’a i taumatematega o tupe maua ma avanoa, ma mafai ai ona maua se faamaninoga e mafai ona toe ripoti mai i  le Fono Faitulafono.

Sa ta’ua foi i le saunoaga a le Kovana ia se vaegatupe e $36 miliona e le o mailoa pe na faapefea ona fa’aaogaina, ae o lo’o iai se talitonuga, e le na’o le pau lea.

Ma i sana faataitaiga na faaleoina, o se talanoaga lea ma se loia o se pisinisi tele na fa’afeso’ota’ia atu le malo ona o se latou pili e silia ma le $10 miliona, o lo’o nofo aitalafu ai le malo, ae leai se faamaumauga o lenei aitalafu i le Ofisa o Tupe.

O le mea lea, e pei ona sa faaleoina ai e le afioga Kovana Pula, na mafua ai ona ia sainia se fa’atonuga aloaia, i ni auala ma’oti ua mae’a ona fa’ata’atia ma usita’ia, e mafai ai ona fa’aitiitia le tupe fa’aalualu.

E aofia ai ma le taofia o le toe fa’aaluina o se tupe i poloketi e 44 lea o lo’o i totonu o le paketi $35.9 miliona mo ‘special projects’.

O nei galuega uma, e pei ona sa saunoa le afioga i le Kovana, o le a toe iloiloina uma ma toe fo’i mai i le Fono Faitulafono e soalaupuleina nisi ala e mafai ona toe fa’aaogaina ai le paketi mo nei galuega faapitoa.

Na talosagaina ai foi e le afioga Pula ia le Fono Faitulafono ma le lala o Faamasinoga, ina ia o latou tagai foi i ala e mafai ai ona fa’aitiitia tupe fa’aalu a o latou lala, e ui ina sa ia malamalama i le tuma’oti o lala ‘ese’ese e tolu a le malo ma lo latou tuto’atasi.

Sa fa’alauiloa mami e le afioga i le Kovana lona auai atu i le faatautoga o le Peresetene fou a Amerika i le vaiaso fou faapea ai ma lona auai atu i le Fonotaga o le Asosi a Kovana Faavaomalo ia Fepuari.

Na ia folafola mai se faamoemoega ia i la’ua ma le afioga i le Lutena Kovana, e u’una’ia le malo feterale mo nisi fesoaosani faaopoopo. Ma le la galulue faatasi ma le fono aemaise le afioga Uifaatali i se leo malosi e tasi.

I le siui o lana saunoaga, sa folafola mai ai le afioga Pula, le tumau pea o la latou fuafuaga e pei ona sa folafola atu i tagata o le atunu’u ae e le’i faataunu’uina le palota ia Novema, afai ae o la tula’i mai ma Pulu, o le a o la talosaga se su’esu’ega o tulaga uma o tala o le tupe a le malo.

Ma o le a fa’ao’oina atu ripoti i le Fono Faitulafono i le fa’agasologa o lea suesuega.