I le fa’aiuga lava o le iloiloga o le mataupu a Pelenato Maiava lea sa faia i luma o le fa’amasinoga maualuga i le aso Faraile na te’a nei, na fa’amanatu ai e le Fa’amasino Sili i le tama’ita’i loia sili lagolago ia Mitzie Jessop-Ta’ase e fa’apea, o lona tula’i ai i luma o le fa’amasinoga, o ia o le sui o tagata o Amerika Samoa e aofia ai lona taumafai ina ia mautinoa, e le mafai e tagata solitulafono e pei o Maiava ona toe oo atu i vaega o loo i ai fanau laiti, ae le o tula’i o ia mo tagata faigaluega a le Ofisa o Femalagaaiga.

O lea saunoaga mai ia Kruse, na tuuina atu i le taimi na talosaga ai Jessop-Ta’ase ina ia toe tolopo le iloiloga mo se isi 60 aso, ae o le taimi tonu lava fo’i lea o loo tu’i fesili ai e Kruse ia le Pulesili le Tumau o le Ofisa o Femalagaaiga ia Fagamalama Fualaau, i gaioiga e faia pe afai e talosaga se tasi mai Samoa i le pemita e 14 aso.

Na fa’ailoa e Kruse e faapea, e le fia fa’alogo le fa’amasinoga i ni fa’amatalaga e le moni, aua, e na o le Fono lava e mafai ona fai i ai ituaiga fa’amatalaga ia, ae fia faalogo le faamasinoga i mea moni, pau le popolega o le fa’amasinoga o loo i ai, ina ne’i taai fa’a fale fo’i fa’amatalaga e fa’atatau i lenei mataupu.

O le agaga atoa o le fa’amasinoga e pei ona poloaina ai sui o le Ofisa o Femalagaaiga e oo atu e molimau, o le taumafai lea e saili le mafua’aga na ala ai ona toe ulufale mai i Amerika Samoa le ali’i o Maiava, lea na poloaina e le fa’amasinoga le fa’asa lea ona toe ulufale mai i le atunuu mo le umi e 5 tausaga o lana faanofovaavaaia, ina ua ta’usala o ia i lona faia o uiga mataga i se teineititi e laititi i lalo o le tulafono i le 2011.

Ae i le mae’a ai ona fesiligia e le fa’amasinoga o ni isi o molimau, na atagia mai ai le tau uma o le pusa onosa’i o le ali’i fa’amasino sili i le Ofisa o Femalagaaiga, ona e foliga mai i a latou molimau ma tali, ua atili ai ona tele isi mau fesili e tutupu i le finagalo o le fa’amasinoga.

O le isi molimau sa valaauina e le fa’amasinoga, o le susuga a Tepatasi Lealofi, o ia lea sa faapipi’iina le ‘computer software’ a le Ofisa o Femalagaaiga i ni tausaga ua mavae, ao lea ua avea nei ma Pule o le IT a le kamupani i’a o le StarKist Samoa.

Na taua e Lealofi i lana molimau e faapea, i le taimi sa ia galue ai i le faapipiiina o le “comuter softward program” a le Ofisa o Femalagaaiga, e lei aofia ai se “Look Out List” i totonu.

O se tasi itu sa finagalo i ai Kruse, pe mafai ona fausia se polokalame i totonu o le “computer system” a le Ofisa o Femalagaaiga, ina ia mafai ai fo’i e le Fa’amasinoga ona mata’ituina gaioiga uma e mafai ona faia i totonu o le Lisi, ae na fa’ailoa i ai e Lealofi, e mafai ona faia le tulaga lea.

O le isi molimau na fesiligia e le fa’amasinoga, o le ali’i o loo avea nei ma Ta’ita’i o le IT a le Ofisa o Femalagaaiga, le susuga a Itai Sataua, lea sa ia fa’ailoa i le fa’amasinoga ina ua fesiligia o ia, e leai sona tomai poo se agava’a i galuega fa’a ‘computer’, ae sa tofia o ia e avea ma Supavaisa i le vaega lea, e sui tulaga i le ali’i sa galue ai na malolo litaea i le masina o Tesema na te’a nei.

Na faailoa e Sataua i le faamasinoga e fa’apea, ua latou tuuina le Lisi i le polokalame o le ‘excel’ ina ia taofia ai le to’atele o tagata e mafai ona latou o i ai ma fai suiga, ae o lea ua na o le to’afa i latou e mafai ona galulue ai i luga o le Lisi.

Na fesili Kruse ia Sataua poo tagata e to’afa ia ua mafai ona latou faia suiga i le lisi, o i latou foi ia e mafai ona latou pulea le Lisi ma fai i ai soo se suiga, ma tali Sataua ioe.