E toe fa’atalofa atu i le aufaitau i lenei aso, faamoemoe sa outou maua se vaiaso manuia i feau ma tiute masani, ae alo mai loa, o le toe sosooina lenei o le tatou talafaasolo lea na gata mai i le vaiaso na te’a nei i le taimi lea na feto’i fa’afuase’i ai le lauga fa’aumiumi a le tamaloa o Liko ina ua ia fa’alogo ua vevesi mai tua i le umukuka.

O le fia iloa e Liko o le mea ua mafua ai ona pisa mai lana fanau i tua i le umukuka na vave ai ona tu i luga ma savali loa i fafo ma le fale, ae o le taimi lea o lo o tau fa’a valavala mai le lauga a si olomatua, le tina o Tania. O le te’i tele o Liko i le vaaiga lea ua ia iloa atu na mafua ai ona alaga leotele atu i lana fanau e tau fetuli ese ma le sapelu, ae vaaia loa le tamaloa o Veli ma le agaese e tau fai maai uma itu e lua ua tamo’e mai ma ia ma sasau solo, pei lava o le la e sasa vao povi i lana gaioiga o lo o fai, ma muamua ai lava taia le atali’i matua o Liko i le agaese, o le ali’i fo’i lea na fiu lava si olomatua, le tina o Taina e tau fa’ato’ato’a atu i le taimi na fa’atoa taunu’u atu ai ma lona tama ae ua atili ai le malomaloa i luga ma folafola lona lima e le lavea i se tasi, ae na matua fa’ateia le olomatua ina ua ia vaaia le palasi ifo i lalo o le atali’i matua lea o Liko ma alaga i le fia ola, a o tu Veli ma le pelu i lona lima, ua matua iila le tino o le fai ‘ava mai Savai’i i le ita ona o tu’uaiga sese ua latou faia fai mai o ia lea na gaoia le latou ma’umaga ma fa’aleaga le toga ta’amu a le latou aiga.

“ ...Veli! Veli! Veli ea”, o le tauvalaau atu lea a le olomatua i le to’alua o lana tama ma savali atu lava i ai, ae o Liko ma le isi vaega o lana fanau, ua na o le laulaututu ua leai ma se isi toe gagana i le taimi lea, ina ua fa’ateia i latou i le vaaiga mata’utia lea ua latou vaaia mai le tamaloa o Veli. “Aisea ua oukou faia ai gei fa’amakalaga makaga e fa’aleaga ai a’u ma le aiga o lo’u ko’alua, kou ke iloa e o o lava i pili ma mo’o ua kalagoa ai i le maka’ukia o kala ua oukou faia, afai kou ke fia iloa le kagaka ga fa’aleagaiga la oukou ma’umaga, o e saili i le ofisa o leoleo kou ke maua ai, ae le o le fa’alele solo o gei mau kala le mogi”, e fai lava tala a le tamaloa o Veli ma toe sasau lana ta i le lau o le sapelu i le papatua o le atali’i o Liko lea e ta’atia i lalo ma oi i le tauau ua lavea uma i le agaese, ona tu lea ma tusi lona lima i le tamaloa o Liko, “O le a le mea ua oukou soli mai ai le fagua, se’i vaai isi gei olomakua makua ma laga fagau ga o keige ma kamaiki laiki, ae se’i fa’auka i le aukau ga e sau ma aumai, afai e kele lou faku, savali mai loa la i le kaimi legei”, e fai lava tala ia a Veli, ma togi ese le agaese o lo o uu i lona lima, ae ua savali aga’i sa’o atu nei i le tuli manu o le umukuka lea e tu mai ai le tamaloa o Liko, ae na te’i le tamaloa o Veli e le i latalata atu ae tatagi loa ma tulivae o Liko i luga o le paepae ma’a ma fa’apea ana upu, “Veli lo’u uso, fa’agamalo mai Liko ma laga fagau ..”