LAOLAGI: Ou te le fa’ailoga tagata.

Na tau fai si siisii o felafolafoaiga i le va o le afioga i le Tama’ita’i Faipule ia Vui Florence Saulo ma le taitaifono o le Komiti Soofaatasi a le Fono, le afioga i le Senatoa ia Laolagi Fonoti Savali Vaeao i le taeao ananafi, ina ua fa’ailoa e Vui ia Laolagi, “e pei lava ua tau fa’ailoga tagata” ana fa’aiuga, ae na tali fuaitau Laolagi “o ia e le fa’ailoga tagata ma ana fa’aiuga.”

O felafolafoaiga i le va o le tama’ita’i faipule ma le ali’i senatoa, na mafua mai ina ua fesili Vui i le Faatonusili o le Ofisa o le KVZK-TV ia Fagafaga Daniel Langkilde, pe aisea e le mafai ai ona o mai lana aufaigaluega e pu’e ma fa’asalalau taualumaga a le Fono Faitulafono.

E lei tali Fagafaga i le fesili a Vui, ae na fa’auilavea Laolagi ma saunoa e fa’apea, “o le fa’aiuga lena e fai e Ta’ita’i o le Fono Faitulafono, e fa’amalulu atu ai i le sui mamalu,” peita’i e le i fa’amalieina le finagalo o Vui i le tali a Laolagi, ae sa ia saunoa e faapea, “ou te mana’o lava e tali mai le ali’i Fa’atonu i la’u fesili.”

“Ou te fia malamalama pe totogi le fa’atinoina o lea auaunaga pe i ai fo’i se mafua’aga e ala ai ona le mafai ona fa’atino, ae i lo’u taofi, o nai tama ma tina matutua, e fia malamalama i latou i polokalame a le Fono,” o le isi lea saunoaga a Vui, ae sa toe fa’auilavea fo’i Laolagi ma saunoa i ai e fa’apea, “e pei ona fai atu se manatu o le laulau, o mea na e taatia lava i ta’ita’i o le Fono, o lea fo’i e i ai tatou camera, a mana’o lava Taitai o le Fono e fa’aalu i luga o le ea galuega a le fono, e fa’apena lava ona fai.”

Sa le’i muta ai saunoaga a Vui, ae sa ia toe saunoa e fa’apea, “e le o se taimi muamua lenei ua e fa’auilavea ai i a’u fesili, ae pule ia lau afioga a le ta’ita’ifono ... a tau lava o isi ua e le faauilavea, pei ua fai fo’i si faailoga tagata o lau afioga a le ta’ita’i komiti, o la’u fesili sa tu’uina atu, o le fesili i le fia malamalama.”

Ae na toe tali fuaitau Laolagi i le saunoaga a Vui ma ia fa’ailoa i ai e fa’apea, “e leai se leaga o la’u tali sa avatu, aua o mataupu ia e te fesili mai ai, o mea na e fitoitonu lava i le Fono, ae ta’atia loa na mataupu se’i i ai se taimi ona tatou ta’atalanoa lea i ai,” o le tali atu lea a Laolagi ia Vui, ma i’u ina fa’amuta atu ai ma le iloiloina o le paketi a le Ofisa o Fa’asalalauga a le malo, ae sa i ai ni isi o le komiti sa si’i o latou aao mo le fia maua o ni a latou avanoa e fesiligia ai le ali’i Fa’atonu.

Ina ua tu’ua e le Fa’atonusili totonu o le maota, na toe faamanino ai loa e Laolagi i le komiti le mafua’aga na ia fa’auilavea ai i le fesili a Vui.

“O lea sa ou taumafai atu e fa’amanino atili le tali o lau fesili, aua afai e o mai tagata faigaluega nei e pu’e galuega a le Fono ae tuli i fafo e le peresetene ma le fofoga fetalai, ona alofa ai loa lea i tagata aigaluega, mafua’aga lena sa ou talosaga atu ai e ta’atia mai le mataupu se’i uma ona tatou talanoa lea i ai, a o lea ua e lafo mai nei faaupuga fai mai e fa’ailoga tagata le laulau, e leai se mea fa’apena, ou te le fa’ailoga tagata ma a’u fa’aiuga sa tu’uina atu,” o le saunoaga lea a Laolagi.

Na saunoa le sui fofoga fetalai ma ia fa’amalulu i le komiti aemaise ai Laolagi, ona o se saunoaga a Vui ua lafo i totonu o le komiti, ma ia talosagaina ai loa le komiti ina ia fa’atafea i nuu mamao ni fa’aletonu, ae alo le komiti e toe fa’aauau lana galuega.

Na maua fo’i le avanoa o Vui e fa’amaualalo ai ia Laolagi e tusa ai o se saunoaga sa ia lafo, fa’atasi ai ma lana saunoaga, “e mama lava lo’u loto ma la’u fesili sa tu’uina atu, ae afai o le tulaga lena ua taoto ai le mataupu, ou te fa’amaualalo atu, ae tu’u ia i le Atua, na o ia e silafia o tatou loto.”