#9090

O le mafua’aga autu o le fa’afitauli o lo o fetaia’i ma le tele o fanau aoga i ni isi o afioaga, i le fai lea ma leai ni pasi aoga e la’uina fanau, e mafua mai i le le lava o pasi aoga o lo o tautuaina le silia i le to’a 10,000 fanau aoga i le atunu’u, e pei ona saunoa le Fa’atonusili o Aoga i se iloiloga sa faia i luma o le Senate i le vaiaso nei.

Na taua e Vaitinasa Dr. Salu Hunkin Finau i luma o le komiti o Aoga a le Senate, e 9 pasi aoga o lo o tutu e le o feoa’i, o lo o fa’atali totoga mai fafo e fa’apipi’i ona fa’atoa mafai lea ona toe feoa’i.

O le aso 25 Mati 2015 e pei ona fa’ailoa e Vaitinasa i luma o le komiti, e tapunia ai le taofoga mo se kamupani latou te aumaia pasi aoga fou e 10 ua fuafua le Ofisa o aoga e aumai, ina ia fesoasoani i le fa’afitauli o lo o tula’i mai.

Na taua e se sui o le Vaega o Pasi Aoga a le Ofisa o Aoga ia Epati Lang i le komiti e fa’apea, e tasi le isi pasi aoga fou lava ua latou toe fa’afo’i atu i le Ofisa o Oloa a le malo, ina ia toe fa’afeso’ota’i le kamupani sa fa’atau mai ai le pasi aoga lea, pe agava’a ona toe faia se siaki i le afi ma le tino o le pasi, i le mae’a ai lea ona latou maitauina o ni isi o fa’aletonu o lo o mafua ai ona malosi le asu i le afi o le pasi i taimi e fealua’i ai i luga o le auala.

Saunoa atili Lang e fa’apea, o le ituaiga fausaga fou o pasi aoga lea ua maua mai i le taimi nei, e manao ai ona agava’a o le aufaigaluega a le vaega o Pasi Aoga mo le tausia ma le vaaia lelei o pasi, aemaise ai o le fa’aaogaina o mea faigaluega talafeagai.

O le tele o pasi o lo o fa’aletonu i le taimi nei, o lo o tau fa’atali totoga o lo o oka i fafo, ma, afai loa ae taunu’u totoga, ona fa’apipi’i loa lea ma toe feoa’i pasi.

Ae na saunoa le afioga i le ali’i senatoa ia Laolagi Fonoti Savali Vaeao e fa’apea, o tulafono i mea nei o ta’avale e oka mai fafo, o le kamupani lava latou te okaina mai pasi aoga, o i latou fo’i e tatau ona okaina totoga o pasi, ae le o le tau tigaina o le malo e tau toe oka mai totoga i Amerika.

Saunoa le afioga i le ali’i senatoa ia Uti Petelo e fa’apea, o se tasi o mafua’aga e vave ai ona leaga pasi aoga fou, o le fa’atautala o ave pasi, e le manatu mamafa i meatotino a le malo o lo o tautua ai fanau aoga.

“O le isi fo’i uiga mataga o lo o maitauia i ni isi o ave pasi aoga, e ese le le mafaufau, e laulau vavale i totonu o pasi ao i ai fanau aoga, aemaise lava i fanau teine, o isi ia itu e tatau ona silasila toto’a i ai le Ofisa o Aoga,” o le fautuaga lea a Uti na vaaia ai Vaitinasa, o lo o tusitusi ana fa’amaumauga i luga o lana api.

O se tasi o fautuaga sa tu’uina atu e le afioga i le ali’i senatoa ia Soliai Tuipine Fuimaono ia Epati, o le fa’amaoni lea i le fa’atinoina o tiute i le vaavaiaa o pasi aoga a le malo.

Na toe fa’atepa e Soliai ia Epati ma Vaitinasa ni isi o fa’afitauli sa a’afia ai le vaega o pasi aoga a le malo i ni tausaga ua mavae, lea na i’u ina tofu atu ai le mataupu i luma o le fa’amasinoga, ina ua masalomia faiga fa’asolitulafono i le okaina mai o totoga o pasi aoga.

Saunoa Soliai e fa’apea, afai e le fa’autauta le aufaigaluega o lo o i ai ma leai se fa’amaoni, e toe tula’i mai fo’i se isi fa’aletonu i le lumana’i.

O le isi fa’afitauli e pei ona taua e ni isi o senatoa e mafua ai le vave leaga o pasi aoga, o le soona fa’aaoga lea i isi fuafuaga a le malo, ae ua le tuu e la’u ai na o fanau aoga.

Na taua e le alii kovana i le fonotaga mulimuli a le Kapeneta i le masina o Fepuari na te’a nei, e le tatau ona toe fa’aaoga pasi aoga e la’u ai valaaulia o le fu’a o le tausaga lenei, ae o le avanoa lelei lea e tatala atu ai le avanoa i le aufai pisinisi pasi tua, e fai so latou sao i le aso fiafia o Amerika Samoa, ae maua ai fo’i se fesoasoani tau tupe e fesoasoani ai i le atina’eina ma le fa’aleleia o a latou pisinisi.

O lea saunoaga mai le afioga i le ali’i kovana ia Lolo Matalasi Moliga, na tu’uina atu i le komiti o Fela’uaiga o le fu’a, lea fo’i o lo o aofia ai Vaitinasa, ina ua saunoa le tama’ita’i fa’afonusili o aoga i le le tatau lea ona toe fa’aaoga pasi aoga a fanau i taimi o aso faapitoa a le malo.

O se taimi o le tausaga nei lea ua faamoemoe e taunuu mai ai pasi aoga fou e 10 ua fuafua le malo e fa’atau mai.