Ads by Google Ads by Google

Aga’i pea i luma galuega atina’e malo ma taaloga

O loo maitauina pea le o faatasi o galuega mo le faaleleia lea o atina’e mo le manuia o le atunuu ma lona tagata i le taimi nei, aemaise ai foi o le unaia lea e le malo o tulaga tau taaloga ia lelei ma tino mai.

O le ata manino o lea tulaga, ua faalauiloa ai e le afioga i le alii kovana ia Togiola Tulafono lona sainia o se lisi e 3.1 eka lona tele mai fanua a le malo, e faatinoina ai galuega ma le atina’eina o le Ofisa o loo gafa ma fuafuaga o taaloga a le Olimipeka (American Samoa National Olympic Committee).

Saunoa le alii kovana e faapea, o le faanaunauga o le malo, e le gata ia aga’i pea i luma le atina’eina o taaloga i le atunuu, a ia maua ai foi se nofoaga tumau e faatino ai galuega a lenei Faalapotopotoga.

“O le agaga maualuga le atunuu ua mafua ai ona aapa atu le malo e opogi ma lagolago lenei faamoemoe, ina ia lelei ai le tapenaina o alo ma fanau o loo auina atu  i au taaalo, e tausinio i taaloga faavaomalo ale lalolagi mo soo se taaloga,” o le saunoaga lea a le alii kovana.

E le gata i taaloga a le lalolagi o loo naunau le taitai o le malo e faaleleia, ae oo lava foi i au taaalo o loo fai ma sui o le atunuu i le tele o tausinioga a le Pasefika, ina ia mautinoa e lelei ma atoatoa tapenaga mo au taaalo.

O lenei mataupu na mapuna a’e foi ina ua taliu mai le au taalo a le atunuu lea na malaga i taaloga a le Pasefika i Niu Kaletonia e aunoa ma se pineauro ma maua mo Amerika Samoa.

O le faasea numera tasi na tuuina atu e nisi o le atunuu i le kovana ina ua maea taaloga ia i le tausaga na te’a nei, e mafua ona le lelei au taaalo o loo ave, e le o lelei fale e koleni ai au taalo.

Saunoa Togiola, o lona faanaunauga o loo i ai, ia faaaoga fanua a le malo o loo salalau solo e faatino ai fuafuaga taua nei mo le lumanai o alo ma fanau a le atunuu.

“O lo’u faanaunauga lea, e le gata ia o faatasi tulaga o le atina’e i taaloga, a ia tulaga lelei foi le atina’e o le tamaoaiga o le atunuu i soo se itu,” o le saunoaga lea a le alii kovana ina ua ia faalauiloa le tatalaina o nisi o galuega ua leva ona tau fuafua mai a le malo talu mai le tuanai ai o le galuega i le 2009.

O le vaiaso na tea nei na sainia ai e le alii  kovana le pemita mo le fausiaina lea o le faleaogaa le Aoga Tulaga Muamua i Fagasa, lea foi sa faaleagaina i le galulolo. Ua i ai le faamoemoe o le alii kovana, e tatau ona toe a’e le isi tausaga aoga fou o loo lumana’i nei, ua maea le galuega o le faleaoga.

E ese mai i faleaoga, e tolu isi galuega tetele mo le toe faaleleia o auala ma taligalu sa faaleagaina i le galulolo ua maea ona sainia e le alii kovana pemita, ma ua tuuina atu mo le amataina o ia galuega. O ia galuega e aofia ai Masefau, Poloa ma Afao.

I le amataina ai o nei galuega tetele, ua talosagaina ai foi e le alii kovana le atunuu ina ia lagolagosua  i le malo ma konekarate o le a fausia galuega, ae aua  le faalavelave aua ole isi lea mafuaaga e ala ai ona taofi galuega ma toe faafoi tupe i fafo, ona o le faalavelave soo o le atunuu i taimi e faatinoina ai galuega.

“Afai o le a faataunuu ia faamoemoe le atunuu, ia tatou galulue faatasi e faigofie ma manuia ai le atunuu i soo se atina’e, ae aua tatou te faalavelave ma le tuai ai o a tatou galuega,” o le talosaga lea a le alii kovana i afioaga ia ua faamatuu atu i ai pemita mo a latou galuega.