Mai le tolu masina; Iuni -Aukuso 2012, ua mae’a fa’au’uina ai le to’a 57 o le ‘au su’isu’i, o nisi ua fa’ato’a a’oa’o mai le amataga o latou tomai e le ASCC - CNR Family Consumer Science Sewing Class, lea faia’oga ai le tama’ita’i o Diana Tarrant ma nai ona soa, ae maise o le fa’auluuluga o lea Polokalama i le tama’ita’i o Siaunofo Logologo ma le latou fo’i taupulega.

O le vaiaso mulimuli o le masina o Aukuso sa fa’asolo ai nei fa’au’uga, ma sa va’aia le agaga fa’aga’e’etia o tina uma sa a’otauina i lea taleni aoga, ma le fa’aaogaina tele i lo tatou atunu’u, aua e tali faia lava toniga i so’o se fa’alavelave, taligamalo, po’o mafutaga fa’atautaia i Ekalesia, nu’u ma Aiga potopoto.

Lea ua amata ona tino mai se miti, sa moemiti i ai ta’ita’i ua tuana’i o le Malo, ina ua mua’i fa’atuina le fale gaosi lavalava o le BCTC, ae na toe fa’aletonu ma soloia, ae le’i maua le ‘auga na afua ai, “ia a’otauina o tatou tagatanu’u i lea taleni, ae toe tu’ua ai lo tatou malo e uso e 300 mai Veit Nam sa auina mai, e amatalia lea falegaosi lavalava, ma a’oa’o ai tagata samoa e fa’aauau lea taleni aoga i le atunu’u.

E ui la ina le au lea fa’amoemoe i na tausaga amata, ae na toe faliu le ta’ita’i o tula’i nei, ma fa’auia mai le polokalama i le matagaluega o Tina, lea fo’i sa faia le latou fa’au’uga i le masina o Iuni 2012, e to’a 24 tina sa fa’au’u mai ai, ma ua atoa ai le 500 o lena faitauga o i latou ua mae’a a’otauina mai lea itu o le faigamalo.

Peita’i, o le taumafaiga lenei o lo’o faia e le tatou Kolisi Tu’ufa’atasi i le vaega o le Land Grant - ma ua atoa le 20 tausaga o le polokalama su’isu’i lenei. Ua so’o fo’i ia i latou ekalesia uma lava i a latou mafutaga tina, ua faia ai latou a’oga, ma ua fa’alua fa’atolu ma le fa’afa nisi o ekalesia, o soso’o lava a’oga nei e si’itia ai le tomai su’isu’i o tina auai ia iloa ona fua e fa’aaoga ai le fua ofu, tipi le fua o le ofu ma su’i loa.

O a’oga e ta’itolu masina ma fa’au’u le vasega i ona la’asaga e fa ua mae’a nei ona a’oa’oina. E ta’i lua aso o le vaiaso e faia ai a’oga ta’i tolu itula o le aso e tasi mai le 9:00 se’ia o’o i le 12:00.i le aoauli.

I le tele o molimau sa fa’afofogaina mai nei vasega fa’au’u e fa i le vaiaso na tuana’i, ua fa’ailoa ai e nisi, “O le taimi muamua sa matua le iloa tui se nila o le la’au su’isu’i, le iloa fa’aaoga se la’au su’isu’i uila, ae le taitai mai o na iloa fua se tasi ma tu’ufa’atasia e tipi aga’i i ai se ofu o so’o se ituaiga, ma atili ai lava, e matua le iluilu silafia se su’isu’i, fa’afetai sili la lea i le Atua i lenei vasega ua a’otauina ai lo’u tina, ua ou mafai ona su’i se ofutino o le tama o le aiga!”

I se tasi vasega, e to’afa le au uso ua mae’a a’otauina, ua mafua ona faia e i latou lea tulaga, ona ua i ai le fa’anaunauga e fa’atula’i se pisinisi su’isu’i, ua latou fa’ailoa mai, “O le taimi lenei, ua le toe popole i matou i ni ofu o matou matua, matou ta’ito’alua ma fanau. Ae o le mea sili, ua i ai le fa’amoemoe sa loma, na mafua ai ona sulufa’i lenei aiga atoa e saili lenei tomai, e fia fa’atula’ia se matou pisinifi fai to’afa. Afai ae mae’a tapena lea fa’amoemoe, o le a toe fa’ailoa atu i tusitusiga ma ata i nusipepa ma le televise a i tatou, e fa’ailo ai le aoga o lenei fo’i a’oa’oga, fa’afetai i le faia’oga ma le Kolisi Tu’ufa’atasi i lenei polokalama aoga mo i matou tina nofofale.”

Ua le gata le va’ai i totonu o aiga, o se sini lea sa mafua ai ona manatu le ta’ita’iga o le Land Grant ASCC e fa’atula’ia lenei polokalama o le CNR/FCS Sewing Class. Ua mae’a fa’asalalauina ni ata o nisi vasega fa’au’u o le vaiaso na te’a, ae o le fa’asologa lenei o le vaiaso ma fa’au’uga e fa sa fa’atautaia ai: Aso Gafua sa fa’atautaia ai le fa’au’uga o Tina Tonga mai le Ekalesia Metotisi Tonga i Nuuuli, ae sa auai i ai tina e to’alua mai le Ekalesia Katoliko i Nuuuli lava, ma latou fa’au’u fa’atasi ai, ma maua ai le faitauga e to’a 18 le ‘au fa’au’u lea.

O le vasega fa’au’u a le Worship Center Christian Church i Nuuuli sa fa’atautaia i le maota i tua ane o le Maota o Pisinisi a Savaliga i Nuuuli, sa faia le latou fa’au’uga i le aso Lua, ma e to’a 15 le latou ‘au fa’au’u na i ai: Faletua o Marie Aukuso, Leva’ai Liu, Sosefina Lagafuaina, Sesilia Ah Sam, Vieni Sa’ako, Mr Petaia Brown, Si’itia Iosia, Chrisitina Malo, Lina Villar, Ivona Suitulaga, Naomi Kalolo, Ulu Lehauli [Tonga] ma Koloni Cook [Tonga].

Mai le Vasega su’isu’i a le Ekalesia Fa’apotopotoga Kerisiano i Iliili sa tu’ufa’atasia mai e le tina o le galuega Ann Marie Hollister, sa aofia fa’atasi ai ma ia i le vasega e to’a 12 sa fa’au’uina i le aso Lulu o le vaiaso na te’a. O i latou na maua tusi pasi o le faletua o le galuega, Fele A’asa, Fa’atali Maualuga, Lili Suapilimai, Tilila Letuligasenoa, Failefa Suapilimai, Joyce Saleimoa, Sauleone Sauleone, Levao Sefo, Nive Tufuga, Rasela Futi ma Fa’aa’asa Pa’aga e to’a 12 i ai nei sui.

Mai le vasega a le LDS i Pava’ia’i, lea na mua’i fa’asalalauina le latou ata i le itu fa’aperetania o le Samoa News, na fa’au’u ai le to’a 12 o tina ua mae’a a’otauina i le su’isu’i, ma o le toe fa’au’uga lea o le vaiaso na te’a. E i ai se sui e to’atasi sa le mafai ona auai ona o tuatuagia, peita’i na taua’aoina pea lona tusi masi ma ua atoa i ai le to’a 58 o sui na lautogia i lea fo’i matata aoga i le teritori.

Fa’afetaia le fa’atonu o le Land Grant - Tapa’au Dr Daniel Aga i lona sogasoga fo’i e fa’atautaia nei ituaiga o polokalama aoga tele mo tina o le atunu’u, ae ua mafai fo’i ona a’otauina ai ma tama o lo’o maua avanoa e a’oa’oina ai. E to’atolu tama o lenei 3 masina ua tuana’i, ae o lo’o ua toe fa’agasolo fo’i le lesitala mo nisi vasega e amata i le masina o Oketopa se’ia o’o i le fa’ai’uga o le tausaga.

I nei fa’au’uga uma sa auai uma sui iloga o lea matagaluega, ma sa tofu sao i le agaga fa’afetai mo tina ua tumau le onosa’i, finafinau ma le fia tautua lelei i lona aiga ma lona atunu’u e ala i le saili o nisi tomai fou e fa’aau’upegaina ai i latou mo nei faiva aoga i le lumana’i. Sa sili le fa’afetai i le tama’ita’i faia’oga ma ana soa, ae maise o le a i ai ma le vasega mo kuka o mea’ai paleni mo le fa’aleleia o le tino ia le so’ona mamafa ma ia fa’afualoa ai fo’i le soifua, e ofoina fa’atasi ma le su’isu’i i lenei kuata mai lea lava itu o le tatou Kolisi Tu’ufa’atasi.