UA FOLA VALE LAU TA’AMU O AOPO

O le isi lenei Vavau a le atunu'u e le gata na mafua mai ai ni isi o muagagana fa'aalaga'upu mai le amataga, ae o le tulaga malie fo’i o lona fa'amatalaina. Fai mai le mau a tagata A'opo i Savai’i, o le Sau'ai lenei o Fa'aufilau'ulu, e tele lava ina nofo i luga o le sami, ia po o le isi fo’i ona igoa sa fa'aigoa ai i aso ua mavae, o le pupu, e pei o le pupu o lo o i le nu'u o Taga. O le mau la a tagata A'opo e fa'apea, o le Pupu lenei, sa masani ona pipisi ina a'e le suavai magalo mai le manava o le 'ele'ele, ma o le suavai lea sa fa'aaoga e tagata A'opo e fai ai a latou taumafa i aso ua mavae, ona o le nu'u e naumati i le suavai.

A o'o la i le po, ona o mai lea o tagata A'opo ua ta mai lau ta'amu, ua fola fa'ata'amilomilo i le gutu o le Pupu, ina ia mafai ona tali tali ai le suavai lea e pipisi mai e le Pupu i le po, ma, a o'o lava i le taeao, ona o mai lea o tagata ua ao atu suavai ia na maua i le po, ma 'ave ua fa'aaoga e fai ai mea'ai. Ae fai mai le mau a le nu'u, o se tasi taeao, na aga'i atu ai tagata o le nu'u e asi a latou lau ta'amu ia sa fola fa'ataamilomilo i le 'augutu o le Pupu, pe o i ai ni suavai, ae asi atu, e leai ma se suavai o to’a mai ai, talu ai se mea mata’utia sa tupu i le po, ao tofafa le nu'u atoa.

Fai mai le tala, ona o le malosi o galu i lea po, na mafua ai ona leotele le e'e a le Pupu o Fa'aufilau'ulu, pe a o'o i le taimi na te pipisi ina ae ai le suavai magalo i uta, ma o le leotele tele o le e'e a le Pupu o Fa'aufilau'ulu, na mafua ai ona tei valevale le Sau'ai o lo o nofo i le Pupu i Taga. Ae ona o le ita tele o le Sau'ai o lo o nofo i le Pupu i Taga i le leotele tele o lenei tagata e e'e atu, na mafua ai ona ia alu e sa'ili, po o ai lava lenei e le mafaufau i le leva o le po, ma le isi itu, sa i ai le manatu o le Sau'ai mai Taga, e na o ia lava le Sau'ai leotele o totonu o Salafai atoa, ae o lea ua maua ane, e i ai le isi Sau'ai e sili atu lona leotele nai lo ia.

Ua amata le sa'iliga a le Sau'ai mai Taga, i lona fia mauaina o le tagata le mafaufau lea o lo o e'e leotele i le leva o le po, fai mai ua alu pea le sa'iliga ma ina ua latalata i le tulua o po ma ao, na taunu'u ai loa le Sau'ai mai Taga i le vaega tonu o lo o e'e mai ai le Pupu o Fa'aufilau'ulu. Fai mai e le'i toe fa'atali le Sau'ai mai Taga i se isi lava mea e fai, ae ua fa'asaga atu loa ma sasau lana po malosi i le alafau po o le manifinifi o le Pupu o Fa'aufilau'ulu. Na 'avea le tauga o le po a le Sau'ai mai Taga i le gutu o Fa'aufilau'ulu ma itu na motu fa'afuasei ai lana e'e, ma 'ese ai loa le mea ua fa'asaga i ai lona gutu, ua le fa'asaga sa’o mai i uta i le pa’u matu e pei ona masani ai, ae ua fa'asaga i tai i le sami.

Ua malama le taeao, ona aga'i mai loa lea o le nu'u o A'opo e asi a latou lau ta'amu lea sa fola i le po, pe o to’a ai se suavai, peita'i e taunu'u mai, e leai ma se suavai o to’a atu ai. Na o latou taumafai e sa'ili pe o le a le mafua'aga, ma o latou iloa ai, o le suavai magalo lea sa masani ona pipisi mai e Fa'aufilau'ulu i uta, ua pipisi aga'i i tai i le sami, ona ua fa'asaga i tai i le sami lona gutu, ma o i'ina lea na maua ai le muagagana lea e masani ona fai e le to'atele e fa'apea, “Ua fola vale lau ta'amu o A'opo.” O lona uiga, ua mao A'opo i le folaina o a latou lau ta'amu, ae leai se suavai na maua ai, ma fai mai fo'i le mau a tagata A'opo, e o'o mai lava i aso nei, ua le toe pipisi mai i uta le Pupu o Fa'aufilau'ulu, ae o lo o pipisi pea i tai i le sami. Soifua