TATALA FALETALAVAI #2 I LE TAFUNA HEALTH CENTER

O le taeao o le aso Faraile na te'a nei na tatala aloa'ia ai le faletalavai lona lua o le tatou atunu'u, e tautuaina mai ai le mamalu lautele o le atunu'u, e ala i so'o se ituaiga o fuala'au ma vaila'au mo togafitiga o gasegase.

"O lenei faletalavai, ua faaigoaina o le 'Satelite Pharmacy' ua mae'a fa'atumuina i vaila'au uma lava, fuala'au uma fo'i ae maise o isi sapalai e masani ona mana'omia e le mamalu o le atunu'u e tala ai latou vai, aua latou togaifitiga. Ua e le toe tau alu i Faga'alu, ae ua mafai ona talaina i lea faletalavai pe afai ua tumu tele Faga'alu i aso ta'itasi,” o se fa'amatalaga lea a le aufaigaluega na i ai i le taimi o le asiasiga, ina ua mae'a tatalaina aloaia lea tautua i le taeao o lena aso.

I totonu ua va'aia le fa'atutumuina atoa o fata o vai ma fa'avasega fo'i e pei ona faia ia fa'afaigofie i le aufaigaluega totofi a le faletalavai, a latou tiute fai o le tu'ufa'atasia o vaila'au ma fuala'au a tagata gasolo atu e tautuaina.

"I totonu o le faletalavai lenei, ua mae'a fa'atumu i le tele o fuala'au ma vaila'au mo togafitiga e tusa lona tau aofai o le $75,000 i le taimi nei. O lona uiga ua atoatoa le aotelega o fuala'au ma vaila'au e ao ina tala atu ai vai a le mamalu lautele i so'o se taimi ua tatala ai ona faitoto'a mo le tautuaina o le atunu'u,” o se toe fa'amatalaga lea a le tama'ita'i pule i lea faletalavai fou.

Na fa'ailoa fo'i e le CEO o le LBJ Medical Center Faumuina John Faumuina, "O le paketi fa'asoa ale Falema'i LBJ Medical Center i le faletalavai i Faga'alu i le vaiaso e tasi e $115,000. E tatau lava ona i ai lea vaega tupe i a'ao o le Falema'i tele ina ia mafai ona aumaia uma vaila'au, fuala'au ma mea uma e fa'atau atu i le lautele i le fale talavai. O lona uiga afai e talaina au vai ina ia inumia mo lou gasegase, alofagia aua ne'i fa'amaumauina, pe fa'aleaogaina, ia fa'aaoga ina ia tatou malolosi ai, aua o le ala lea na tigaina ai le tatou falema'i ma le Malo e fa'avasega alagatupe nei ina ia maua mai tatou Vaila'au ma Fuala'au mo le togafitiga o gasegase o tagata uma."

I le polokalama fa'asolo o le taeao atoa, na ta'ita'ia e le susuga le Fa'afeagaiga Rev. Fa'ata'a Eliasaro, o le Taitaifono fo'i o le Community Health Center i Tafuna, le fa'apotopotoga i le tatalo.

Na auva'a potopoto le vasega o taitai o le Matagaluega o le Soifua Maloloinga ma le LBJ Med Center, Fa'atonu Motusa T. Nua ma Faumuina, i lea fa'amoemoe aua ua si'itia fo'i le la'asaga o le tautua mo le lautele i le tatalaga o lenei faletalavai. Na auai fo'i Ali'i ma Tama'ita'i Foma'i, ae maise fo'i o sui Fa'atonu o le DOH, Papali'i Marion Fitisemanu ma Farah Malaepule Utu, fa'apea fo'i tama'ita'i o lo'o pulea faletalavai a le LBJ ma le Tafuna Dispensary, Mrs Evelyn Anesi & Ms Elisapeta Ponausuia o le DOH, tainane fo'i le lasilasi o tama'ita'i o le a faigaluega i lea tautua ma Tausima'i Pasi a le Falema'i fa'aitumalo i Tafuna mo lea fa'amoemoe.

O lenei se galuega ua tautailua e le Matagaluega o le Soifua Maloloina ma le Pulega o le LBJ, ma o se mea lelei, aua ua si'itia ai le tautuaina o le atunu'u i lona aotelega.

Na mua'i tula'i le Fa'atonu o le Matagaluega o le Soifua Maloloina, e na te fa'ailoa nisi o mea e patino i le galuega lea ua tatalaina. O le falema'i sa tau fa'aavanoa lava se vaega ina ia fa'aofi i ai se isi faletalavai, e pei ona talanoaina ma ua manatu fa'atasi i latou ma le pulega o le LBJ Med Center e ao ina faia.

"O se potu sa tala mai ai na'o se vaega o vaila'au na mua'i fa'atula'ia lea i le 4 tausaga talu ai. Ae ina ua toe soalaupule ma ia mana'omia lava ona fa'alautele lea tautua i se isi nofoaga atoatoa fa'apea, na toe feliua'i ai loa le tofa ma totogia le Kamupani o le PJ Construction a le susuga Iupeli, latou te suia le fausaga o lea itu ina ia fa'aofi atu i ai le faletalavai i Tafuna nei. O le totogi o lea galuega na tula'i mai le $50,000 peita'i na i ai nai suiga o le galuega ma ua uma ane ua sili teisi i lea aotelega le tau."

Na toe fa'aalia fo'i le vaega na fa'atupe mai ai lea galuega o le Medicaid lea, ma e tatau fo'i ona tutusa lelei le aofa'iga o le tupe e totogia e le Medicaid ma le tupe e totogia e le tatou Falema'i, ma ua mae'a fo'i la ona faia fa'apea.

O le taimi na tula'i ai Faumuina ua na'o le fa'afetai lava, ma le tima'iga, "Ina ia le fa'amaumauina vaila'au ma fuala'au o loo okaina mai mo tou togafitiga. Ia inumia e pei ona fa'atonuina, ia maua ai so outou ola laulelei."

Ina ua mae'a sa vala'auina fa'aaloalo le susuga Rev Fa'ata'a Eliasaro ina ia toto'o i le lipine e tatala aloa'ia ai le faitoto'a o le Faletalavai. Ae vala'auina fo'i le CEO o le LBJ ma le Fa'atonusili o le DOH ina ia la'ua fa'amanuiain le Keke o le aiga fiafia mo lenei la'asaga fou.

O le aiga fiafia na fa'amanuia fo'i i le keke o le fa'amoemoe na faaiu ai le aso ma ua tatala aloa'ia fo'i le tautuaina o le mamalu o le atunu'u mai le faletalavai fou i le Tafuna Health Center.

SUI MANUMALO I FA'AILOGA O TA'ALOGA ESEESE - ALE ASNOC

Fa'amalo ia i latou ua maua fa'ailoga i ta'aloga ta'itasi sa ta'alo fa'atauva ai i Ta'aloga o lo'o faitaulia e agava'a ai le fa'atupega a le ASNOC. O le fa'amoemoe na fa'atautaia ia Fepuari 23:

• taule'ale'a mo le fa'ailoga Tama Ta'alo o le tausaga o Josh Failauga mo le ta'aloga Pi'i.

• Tagata mo Ta'aloga i le tausaga - Faiivae Iuli Godinet mo le Soka.

• Faia'oga o Ta'aloga o le tausaga - Sa Sulua'i mo le ta'aloga o le Football.

• Tagata Ofisa o Ta'aloga mo le tausaga - Peter Reid  lll i le Sauia Body Building.

• Tama'ita'i Ta'alo o le tausaga - Raquelle Toleafoa o le Basketball.

• Teineiti Laiti Ta'alo o le tausaga - Naomi A'asa o le Handball.

• Tamaititi Ta'alo o le tausaga - Faleniko Tautu o le Boxing.

• Au Ta'a'alo o le tausaga ua maua lea e le 'au ta'a'alo Olympic Games Team American Samoa.

• Asosi o Ta'aloga mo le tausaga -  AYFS.

• Poloketi o Ta'aloga fa'aletausaga ua maua lea e le Poloketi a Paula McDonald o le South Pacific Water Sports.