FA’AFETAI MAI LE OLIMIPEKA FAAPITOA A.S.

O se talotaloga fa’afetai a le Olimipeka Fa’apitoa a Amerika Samoa sa fa’atautaia i Utulei i le taeao o le aso Faraile na te’a nei e faafetai ai i le atunu’u mo le tapuaiga.

“O lenei fa’afetai e fa’ao’o atu i le mamalu lautele o le atunu’u ae maise le Faigamalo a Amerika Samoa ona o le tapua’iga ma le a’ao foa’i sa fa’aalia i ala eseese, na mafai ai ona fa’ao’o atu le ‘au ta’a’alo malosi a Amerika Samoa i le Olimipeka Fa’apitoa a le Lalolagi na fa’atasi atu i ai i le masina ua te’a,” o se fa’amatalaga lea a le sui mamalu o le Special Olympics Tafaimamao Tupuola.

Sa malaga fo’i le Tina o le atunu’u, Cynthia Moliga e fai ma sui o le faigamalo mamalu ma sa tula’i fo’i o ia e talotalo fa’afetai faatasi ma le fanau uma sa fai ma sui o le atunu’u, latou faia’oga ma faufautua ae maise o latou matua, ina ia fa’afo’i mai lea fa’afetai taua i le atunu’u.

O lenei fo’i se tausaga ese, aua sa faia fo’i le tala ma le ali’i na pine auro mai Amerika Samoa, Justin Lutu e le vaega a le Televise o le ESPN. O lana pine auro sa ia mauaina ina ua mua o ia i le tu’uga e 100 mita a ali’i.

Na vala’aulia fa’apitoa fo’i le tina o Etenauga Lam Yuen - Lutu na te taua’aoina nisi o pine auro ma fa’ailoga o se tasi o ta’aloga sa tauva ai fo’i nisi o fanau a le atunu’u.

FAAFOU LE PA A LE F.A.A E LE LVC Landscaping

O lo ua va’aia i le afiafi o le Aso Faraile ua te’a le galuega matagofie o le toe faaleleia o le Pa e siomia ai le eleele o le FAA lea e aofia ai ma le isi itu o le US Army Reserve Tuai lea e i ai le Falema’i mo Vetereni. Fa’ailoa e se tasi o tama matua sa va’aia o faia lea galuega lelei ma le fanau faigaluega i le LVC Landscaping, “O le galuega fa’atulaga  lava mo i matou e fa’atautaia, ma ua va’aia fo’i ua pala nisi o pou ae maise ua elea le pa uaea, ua tatau lava ona suia ma toe vali fo’i.”

E le’i manatu le tama e fa’ailoa lona suafa, peita’i, sa ia fa’ailoa mai, “Tau ina e alofagia e fa’aalu atu na’o ata o le galuega e iloa ai, sa faia le galuega, ma e foliga lelei fo’i mo le fa’amoemoe e puipuimalu lelei meatotino o lo’o lisia lea itu o eleele a le FAA.”

Ua iloga lava le itu ua mae’a faia i ai le galuega, au suia pou ua elea, ae maise o le pa uaea fo’i ua elea ua mae’a valia lelei siliva mama.