VAOVAO E LE FANAU LE TAMA A’O IA FASI LE LATOU TINA

O le ali’i lea na vaovao e lana fanau e to’alua ao ia fasi tigaina le tina o le aiga i le fa’aiuga o le vaiaso na te’a nei, atoa ai ma lona folafola o lona fasiotiina o si fafine pe afai na te fa’amatalaina i ni isi le mea sa tupu, ua molia nei e le malo i moliaga mama e lua o le fa’ao’olima i le tulaga tolu, atoa ai ma lona faia o ni gaioiga e save’u ai le filemu i totonu o lona aiga.

O lenei mataupu na tofi atu i le ofisa o leoleo i Tafuna, ina ua alu i ai le tina ma fa’aulu sana tagi fa’asaga i lona to’alua, i lona fasi lea o ia, titina lona ua, atoa ai ma lona taumafai e fa’aaoga se naifi e osofa’i ai o ia ae na taofi e lana fanau tama e to’alua, e 19 ma le 15 tausaga le matutua.

O le vevesi na mafua mai ina ua fesili atu le tina i le ua molia i se meaai i le po o le aso 2 Ianuari 2014, ae ita ai le ua molia ma amata ai loa le vevesi i se tauga upu, sosoo ai loa ma le tu atu i luga o le ua molia ua titina le ua o si ona to’alua, peita’i sa mafai ona aveese e le tina lima o lona to’alua mai lona ua, ma mafai ai loa ona taofi le gaioiga a le ua molia sa faia.

Na toe aapa atu le ua molia i se naifi fai meaai ma taumafai e tui ai le fatafatafa o lona to’alua, ae na oso atu lona atali’i 19 tausaga ma una’i ese o ia, ma le mafai ai ona taunu’u lana gaioiga sa taumafai e fai.

I le aso Sa na soso’o ai, Ianuari 04, na fesili ai le tina i le ua molia pe mafai ona alu atu e momoli latou i le lotu, ae na avea lea ma itu na ita ai le ua molia ma fai ai loa a la tuliga fa’ata’amilo i le fale.

Na te’i le fafine ina ua ia vaaia lona to’alua ua tamo’e atu ma se tama’i naifi, o lea na ia valaau ai loa i lana fanau e to’alua e o atu e taofi le la tama, ma tau fetuli atu ai loa tamaiti ma taofi le la tama ae aveese mai le tama’i naifi sa u’u i lona lima.

O le aso Sa lava lea na o ai loa le fafine ma lana fanau ua nonofo i le fale o lona auntyi Ottoville, peita’i na fa’ateia i latou ina ua alu atu le ua molia i le fale o lona aunty, ua tu atu i le faitoto’a ma oomi le logo o le faitoto’a mo le silia i le afa itula, peita’i sa musu lona aunty e tatala le faitoto’a.

Na taua e le fafine na a’afia i leoleo lona fefe tele i lona to’alua, ona sa ia folafola lona fasiotiina o ia pe afai na te ta’uina i se isi le mea sa tupu.

Na aga’i atu leoleo ma piki mai le ua molia mai lana fale faigaluega i le malae va’alele i Tafuna, ma auina atu loa i le ofisa mo suesuega, lea na ia ta’utino ai i leoleo, e moni tu’uaiga uma ua faia fa’asaga ia te ia e lona to’alua, i lona titina lea o le ua o lona to’alua, taumafai e tui lona fatafata i se naifi, atoa ai ma le faia o se la tuliga fa’atamilo i le fale i le naifi.

O ananafi na faila ai e le malo moliaga mamafa fa’asaga i le ua molia, e aofia ai moliaga mamafa e lua o le fa’ao’olima i le tulaga lua.

Afai ae mafai e le ua molia ona totogi le $15,000 lea ua fa’atulaga e le fa’amasinoga e tatala ai o ia i tua, ua poloaina o ia e aua ne’i ona toe taumafai e fa’afeso’ota’i lona to’alua i so o se auala, ua fa’asa fo’i ona toe alu i le fale, a ia saili se isi nofoaga e aumau ai e fa’atali ai taualumaga o lana mataupu lea ua fa’agasolo i le taimi nei.

IOE FALEFATU ASI I TU’UAIGA A LE MALO

O le ali’i lea na to’atolu i ai ali’i na tu’uaia e le malo i lo latou osofaia o le faleoloa o le Gold Conda Store i Fagaalu i le tausaga na te’a nei, ua ia ta’utino i le fa’amasinoga e fa’amaonia tu’uaiga fa’asaga ia te ia.

O le vaiaso nei na fa’alauiloa ai i luma o le fa’amasinoga le maliliega na sainia e Falefatu Asi ma le malo, lea e pei ona ia tali ioe ai i le moliaga mamafa o le taupulepule lea ma ni isi tagata e fa’atino le solitulafono o le faomea i le tulaga muamua.

I le tali ioe ai o Asi i le moliaga e pei ona ta’usala ai o ia, sa ia ta’utino ai e fa’apea, i se taimi o le po o le aso 30 Aperila 2014 ma fa’asolo atu ai i le vaveao o le aso 1 Me na sosoo ai, na alu atu ai i lana ta’avale ma piki mai Samuel Wright ma Alatuna Simi, ma latou taupulepule ai loa e osofa’i le faleoloa o le Gold Conda.

O Wright ma Simi na o i totonu o le faleoloa ina ua uma ona fusi o la foliga, ma se fana ua uma ona utu i ai pulu o lo o uu e Wright, ae o ia sa nofo i totonu o lana ta’avale ma va’ava’ai ni tagata e o atu.

Ina ua tamomo’e atu Wright ma Simi ma se tinoitupe faapea ai ma se pusa lole ma tulioso i totonu o lana ta’avale, sa ia fa’aoso loa le ta’avale i se saoasaoa uiga ese ma latou o ese loa.

Na ta’utino fo’i le ua molia, o le tupe sa gaoi mai e Wright ma Simi na latou vaevaeina. Ua malie fo’i Asi na te tuua le teritori ae toe fo’i atu i lona atunu’u na sau ai, pe afai ae mae’a ona tuli sona fa’asalaga fa’a falepuipui i le toese i Tafuna.

O lo o taofia pea Asi i le toese e fa’atali ai le aso lea ua fa’atulaga e lau ai lana fa’asalaga.