Ads by Google Ads by Google

Tuumalo le afioga Faleomavaega Eni ina ua afu lana tautua


[ata: archive]
ausage@samoanews.com

O le vaiaso nei na fa’ateia ai tagatanu’u o Amerika Samoa aemaise ai ona ta’ita’i, ina ua puaina mai i peau o le ea le tala fa’avauvau e le mafai ona toe galo i loto ma agaga o le atunu’u, i le fa’amanavaina lea e le Atua o galuega a se tasi o ta’ita’i ua afu lana tautua ia Amerika Samoa, le Pasefika fa’apea ai ma le malo tele o Amerika, le afioga Faleomavaega Eni Fa’aua’a Hunkin.

 

O le aso Lulu o le vaiaso nei na tuua ai le malo e Faleomavaega i lona aiga i Provo, Utah ao si’omia o ia e lona faletua ia Hinanui fa’apea ai uo ma aiga, i le umi ai o se taimi o feagai o ia ma gasegase o le tino.

 

I se pepa o fa’amatalaga sa tu’uina mai i le Ofisa o le afioga i le ali’i kovana i le vaiaso nei, na fa’amaonia mai ai le tuua o le malo e Faleomavaega, atoa ai ma le misia o ia e tagatanu’u o Amerika Samoa.

 

O le soifuaga tuputupu a’e o Faleomavaega na amata mai i lona afioaga o Vailoatai, le nu’u na ia soifua mai ai ma malaga atu ai loa i le setete o Hawaii e fa’aauau ai lona soifua tuputupu a’e atoa ai ma le fa’alauteleina o le olaga tau a’oa’oga, seia oo atu ai i Amerika mo le a’oa’oina o lana mataupu fa’aloia.

 

Na tautua Faleomavaega i vaega ‘au a le malo tele o Amerika, e aofia ai le taua i Vietnam, ma litaea mai ai i le tausaga e 1969, ma galue ai i le ofisa o le sui o Amerika Samoa i Uosigitone i le taimi ao avea le afioga ia A.U Fuimaono ma sui o le atunu’u i le konekeresi, ma toe taliu mai ai loa i le atunu’u i le tausaga e 1981 ma galue ai i le tulaga o le loia sili lagolago mo le malo o Amerika Samoa.

 

O le tausaga e 1984 na avea ai o ia ma Lutena Kovana ae avea le afioga a A. P Lutali ma kovana o le atunu’u, ma tautua ai i lea tofiga mo le 4 tausaga, ae i le tausaga e 1988, na filifilia ai loa o ia e avea ma Faipule o Amerika Samoa i le konekeresi a le malo tele o Amerika, ma fa’aauau ai lava lana tautua mo tausaga sosoo e 26, ma avea ai o ia ma totino o ni isi o Komiti i totonu o le maota o sui a le malo tele.

 

Sa faa’auau pea le tautua a Faleomavaega i le nofoa o le atunu’u mo le laumua i Uosigitone talu mai le tausaga e 1988 seia oo mai i le tausaga e 2014 ina ua malolo i le tofa a Aumua Amata i se palota finau.

 

I tausaga e tele o lana tautua i totonu o le konekeresi a le malo tele, sa ia finauina ai vaega tupe e fesoasoani ai mo Amerika Samoa, e aofia ai tupe mo le fa’aleleia o auala, aoga, fa’apea ai atina’e tetele i le atunu’u. Sa tu malosi fo’i o ia e tete’e i fuafuaga e ono a’afia ai le soifua manuia o tagata lautele o Amerika Samoa.

 

O le a manatua pea lenei ta’ita’i o le atunu’u i loto ma agaga o tagata uma. E le o mautu mai i le taimi nei fuafuaga a aiga, pe momoli mai le Sa o le afioga a Faleomavaega i le atunu’u, pe lagomau ai lava i lona aiga i Kalefonia.

 

“E momoli atu fa’amaisega i le faletua ia Hinanui ma le aiga, a o feagai ai ma taimi faigata o le olaga, ona o le motusia o le mafutaga ma le Tama o le aiga”, o se vaega lea o le fa’amaisega a le afioga i le ali’i kovana ia Lolo Matalasi Moliga, fa’apea ma le afioga i le lutena kovana ia Lemanu Palepoi Peleti Mauga ma o la aiga, e fai ai ma sui o tagatanu’u uma o Amerika Samoa.

 

I se pepa o fa’amatalaga mai le kamupani tu’uapa a le StarKist Samoa, na taua ai e le Peresetene ia Andrew Choe, o ia fo’i lea o le Pulesili o le kamupani le fa’anoanoa o le pulega atoa o le kamupani ina ua latou mauaina le tala e fa’atatau i le tuumalo o Faleomavaega.

 

Na taua e Choe le manatua pea o uiga tausa’afia o lenei ta’ita’i, i lona fiafia lea e mafuta ma lulu aao ma i latou e moomia lana fesoasoani, aemaise ai lona lagolagoina malosi o fuafuaga e puipuia ai kamupani tu’uapa i Amerika Samoa.