Ads by Google Ads by Google

TUAOLO: Mana’omia ni tama fanau atunu’u e maua agava’a Fua Fanua


Sui o le Komiti Fua Fanua a le malo i le taimi o le latou iloiloga i luma o le Senate i le 2 vaiaso talu ai. [ata AF]

Le afioga i le ali’i senatoa ia Tuaolo M. Fruean [ata AF]
ausage@samoanews.com

Na taua e le afioga i le ali’i Senatoa ia Tuaolo M. Fruean le matua mana’omia lava o ni tama fanau a le atunu’u i le taimi nei, e i ai le agava’a o le avea ma Fua Fanua a le malo, po o isi lava fo’i agava’a e feso’ota’i ma lea ituaiga auaunaga, ina ia mafai ai ona fesoasoani i le galeuga taua o loo fa’atinoina e le Komiti Fa’afoe o Fua Fanua a le malo lea ua tofia e le Kovana.

 

E to’afa totino o le Komiti Fua Fanua a le malo na tofia e le afioga i le ali’i kovana ia Lolo Matalasi Moliga ma ua fa’amaonia e le Fono Faitulafono, e galulue fa’atasi ma le Fa’atonusili o le Ofisa o Galuega Lautele a le malo, mo le fa’atinoina o galuega e fa’atatau i le fuaina lea o fanua.

 

O totino e to’afa o le Komiti Fua Fanua lea ua fa’amaonia nei e le Fono Faitulafono, o i latou ia o lo o umia laisene inisinia e taua o le PE (Professional Engineer) mai Amerika, ae o i latou fo’i ia o loo umia laisene e avea ai ma fua fanua i le atunu’u, poo le PLS (Professional Land Survey).

 

Saunoa le afioga i le ali’i senatoa ia Tuaolo e fa’apea, e le faigofie le galuega o lo o fa’atinoina e i latou ua taua o fua fanua i le atunu’u i le taimi nei, ona o i latou ia o loo fa’alagolago i ai le nonofo fealofani o aiga ma nu’u pe afai e tula’i mai mataupu e fa’atatau i le fuaina lea o eleele.

 

“E taua tele la outou galuega i totonu o le atunu’u, ona o le isi lenei mataupu ua tele ai fa’amasinoga ua vavao ai aiga ma afioaga, e mafua mai i le le lelei lea ona fua o fanua o tagata, ona o ni isi o tulaga e pei ona maitauina i tausaga ua mavae, afai lava e fiafia le tagata fua fanua i le aiga poo se afioaga, ona tago lea ua fua fa’atele le fanua o lena aiga poo le afioaga fo’i, ae a le fiafia i le isi itu ona fa’apena fo’i lea ona ia tago ua fa’alaititi le fuaina o le fanua, ae o le taua o la outou galuega, e moomia ai le fa’amaoni ma le alofa moni i le atunu’u”, o le saunoaga lea a Tuaolo ina ua mae’a ona fa’amanino e se tasi o totino o le Komiti Fua Fanua ia Taulapapa Willie Sword ni isi o agava’a ma tautua o loo fa’atinoina e le Komiti.

 

Ina ua fesiligia pe to’afia se aofa’i o Fua Fanua o loo i ai i Amerika Samoa, na saunoa ai Taulapapa e fa’apea, e tusa ma le to’a 20 tama fanau a Amerika Samoa ua latou umia laisene e avea ai ma fua fanua i le atunu’u, ae na o le to’a 5 lava i latou o loo mafai ona fa’atinoina pea lea tautua i le taimi nei.

 

Na taua e le afioga i le ali’i senatoa ia Faiivae Godinet lona lagona fiafia ina ua mafai ona tofia e le kovana i latou e to’afa nei e avea ma totino o le Komiti Fua Fanua a le malo, ma ua agava’a fo’i i latou i le fa’atinoina o le latou tautua.

 

Saunoa atili Fai’ivae e fa’apea, o se tasi o fa’afitauli tele sa ia maitauina i tausaga e tele ua mavae atu, o le tau saili mai lea i Samoa o ni fua fanua latou te fa’atinoina le galuega o le fuaina o fanua i Amerika Samoa, ma e le gata e tele ai tupe alu ae o se tulaga fo’i e maitauina ai le fa’anoanoa, ona e foliga mai sa leai ni tama fanau a le atunu’u na fiafia e fa’atinoina lenei galuega i tausaga ua mavae.

 

“Sa maitauina lava le tau leai o ni tatou tagata e fiafia e fa’atino lenei ituaiga tautua i tausaga ua mavae, ae lagona le fiafia ina ua molimauina le i ai o outou ua maua agava’a ma tusi pasi e avea ai ma fua fanua a le atunu’u i le taimi nei ma le lumana’i,” o le saunoaga lea a le afioga i le ali’i sentaoa ia Fai’ivae.

 

Ae na taua e le afioga a Taulapapa i lana molimau i luma o le Senate e fa’apea, e le gata o loo latou fa’atinoina galuega tau fua fanua i le atunu’u, ae o loo latou faia fo’i suega mo i latou uma lava e fia avea ma fua fanua ma maua tusi pasi amata mo lenei galuega.

 

E ui e le o mafai ona su’e i Amerika Samoa nei le tusi pasi o le PE e pei ona saunoa Taulapapa, se’i vagana ai lava Amerika, ae o loo fa’aauau pea ona latou unaia ma fa’amalosia ni isi o tupulaga talavou a le atunu’u ina ia aga’i atu e su’e le suega.

 

“E le to’atele naua ni isi e fiafia i lenei ituaiga galuega, atonu e mafua mai i le ituaiga si’osi’omaga o loo i ai le galuega, e pei e faigata i tagata ona latou vaavaai i lona taua, ae o tausaga uma lava matou te unaia ai lava fanau aoga ina ia o mai e su’e le suega e avea ai i latou ma fua fanua i le atunu’u, ina ia mafai ai ona to’atele le aofa’i o tagata latou te mauaina lenei tusi pasi”, o a Taulapapa lea.

 

I luma o le maota o sui ina ua fesiligia e afioga i faipule agava’a o totino o le Komiti Fa’afoe, na fautuina ai e ni isi o le maota o sui totino o le Komiti Fua Fanua ina ia galulue fa’atasi ma le latou Ta’ita’ifono, o le Fa’atonusili fo’i lea o le Ofisa o Galuega Lautele a le malo, i le vaavaaia lea o auala e foia ai fa’afitauli e pei ona tula’i mai i le tele o galuega tetele a le malo o loo fuafua e fia fausia i ni isi o afioaga, aemaise lava i galuega o auala, ona o loo i ai aiga o loo fa’alavelave.

 

Saunoa le sui fofoga fetalai ia Fetu Fetui Jr e fa’apea, o lo o i ai le tulafono o loo aiaia mai ai le mamao e tatau ona i ai se fale poo pa a aiga ma le auala tele a le malo, ina ia vaoia ai le tula’i soo mai o fa’afitauli o le fa’alavelave o aiga i soo se taimi e taumafai ai le malo e fa’aleleia auala i totonu o le atunu’u.

 

“O le isi lea mataupu e tatau ona silasila toto’a i ai la outou Komiti i taimi e fua ai fanua a aiga, ia mautinoa e tausisia tulaga o tulafono i le mamao e tatau ona i ai pa a aiga poo fale fo’i ma le vaega ua fuafua e fausia ai le auala, ina ia taofia ai le toe tutupu mai o fa’afitauli ma tuai ai atina’e a le malo”, o le fautuaga lea a le sui fofoga fetalai i sui o le Komiti.

 

E 15-0 le palota na pasia ai e le maota o sui totino o le Komiti Fua Fanua a le malo, ae 18-0 le palota a le Senate na pasia ai fo’i i latou nei.