Ads by Google Ads by Google

Tofu Fa’amasinoga mataupu fa’atatau nofoa Manu’a #1 i le Senate


Le afioga i le ali’i Senatoa mai le Itumalo o Manu’a, Nuanuaolefeagaiga S. Nua. [ata AF]
ausage@samoanews.com

Ua tofu atu nei i luma o le Vaega Iloilo o le Fa’amasinoga Maualuga a le atunu’u se talosaga na fa’aulu e ni matai mai le itumalo o Ta’u i Manu’a, e talosagaina ai se poloaiga a le Fa’amasinoga e avea ai le afioga ia Vaitautolu Liugalua ma Senatoa o Ta’u i totonu o le Maota Maualuga o le Fono Faitulafono a le atunu’u, le nofoa o loo nofoia nei e le afioga a Nuanuaolefeagaiga S. Nua.

 

Ina ia aloaia i se poloaiga a le fa’amasinoga le talosaga ua fa’aulu, ua talosagaina ai loa e i latou sa fa’aulufaleina lenei tagi le fa’amasinoga, ina ia fa’atulaga vave loa se aso e iloilo ai lenei mataupu, ina ia mafai ai ona aloaia le tofia o Vaitautolu e avea ma senatoa o Ta’u, ma se poloaiga e fa’aleaoga ai le tauaveina e Nuanuaolefeagaiga o le nofoa o loo ia nofoia nei, ona e le tusa ma le Fa’avae le auala na filifilia ai o ia.

 

O i latou o loo fa’apogai i lenei tagi e aofia ai le afioga a Lefiti Atiulagi Pese, Maui Aloali’i ma Tauese V. K. Sunia.

 

O loo taua i se vaega o le tagi e fa’apea, o nofoa e lua mo le Itumalo o Manu’a #1 i luma o le maota maualuga a le Senate, o loo nofoia le tasi e Fitiuta, ae o le isi nofoa o loo nofoia e Faleasao ma Ta’u

 

O Ta’u e pei ona taua i le tagi, e lua ona pitonu’u mavaevae, o Luma ma Si’ufaga, ma e tofu lava fo’i le pitonu’u ma ana pulega fa’amata’i, ae a oo i mataupu e talanoaina ai mataupu e fa’atatau i Ta’u, ona potopoto fa’atasi lea o pitonu’u e lua mo se feiloaiga, ma e pei ona manino i le tagi, o le nofoa mo Ta’u i le 4 tausaga ua mavae sa nofoia e le afioga a Nuanuaolefeagaiga, o le sui mai le pitonu’u o Si’ufaga ua mae’a le taimi o lana nofoaiga, ma o le Fa’alupega fo’i na te valaauina le fonotaga e saili ai se tasi na te nofoia le nofoa o le Itumalo mo le paeaiga a le Fono Faitulafono e soso’o ai.

 

Ae i le aso 23 Novema 2016, na maua ai e le afioga a Lefiti se telefoni mai le afioga a Nuanuaolefeagaiga, e fa’ailoa atu ai lona taunuu aloaia atu i Ta’u mo se fonotaga fa’apitoa mo matai o Si’ufaga, lea fo’i na auai le afioga i le Fa’atui ia Lefiti e ui na te le’i silafiaina le mafu’aaga o lea fonotaga.

 

I le taimi o le fonotaga, na fa’ailoa aloaia ai loa e le afioga a Nuanuaolefeagaiga lona fanoga e toe fia alu i le nofoa o le itumalo mo le isi 4 tausaga, peita’i na fa’ailoa i ai e Lefiti, e le talafeagai lea tulaga, ona o lea ua mae’a le 4 tausaga o le nofoaiga a Si’ufaga, o lea fo’i ua mae’a ona valaau e le Fa’alupega ia Maui le fonotaga a le itumalo e saili ai se tasi na te tauaveina le nofoa mo le isi 4 tausaga i le aso 9 & 10 Tesema 2016, peita’i sa le’i finagalo i ai Nuanuaolefeagaiga.

 

Ao fa’agasolo pea le fonotaga, na fa’afuase’i ona tatagi le telefoni a Nuanuaolefeagaiga, mulimuli ane ai lona fa’ailoa i le fonotaga a matai o Si’ufaga, o lea ua telefoni atu le tofa a Faamausili [Pomele] mai le pitonu’u o Luma e fa’ailoa mai, o loo fa’atali mai le pitonu’u a Luma ia Si’ufaga ina ia aga’i atu mo se latou fonotaga e saili ai se senatoa fou mo le itumalo, peita’i sa le’i lagolagoina e le afioga a Lefiti ma isi matai lea fuafuaga, ona e i ai lo latou talitonuga, e le o faiga fa’avae ia a le itumalo.

 

I le mae’a ai o le fonotaga sa faia i Luma i le aso lea, na malilie ai loa Fa’amausili ma isi matai e to’afa, o le a toe filifilia Nuanuaolefeagaiga e avea ma senatoa o le itumalo o Ta’u. O lea fonotaga e le’i auai le afioga a Lefiti ma isi matai, e lei auai fo’i le Fa’alupega ia Maui mo le fa’amaoniaina o lea fa’aiuga.

 

I le fonotaga sa faia i le aso 9 Tesema 2016, na tasi ai loa Luma ma Si’ufaga, o pitonu’u mavae ia e lua o Ta’u, lea o loo fa’alupe o le Faletolu, ina ia filifilia so latou sui mo le nofoa a le senate, ma tasi ai le fa’afitiga o ale’aga i le afioga a Letalu Maui e avea ma o latou sui. O lea fo’i fonotaga sa auai le to’atele o matai o le Faletolu e aofia ai ma le Fa’alupega mo le fa’amaoniaina o lenei tofiga.

 

O le fonotaga i le aso 27 Tesema 2016 a Fitiuta, Faleasao ma Ta’u lea na usuia i le Ofisa o Mataupu Tau Samoa, na fa’ailoa ai e Faleasao lo latou filifilia o Vaitautolu e avea ma o latou sui, ae a fa’alauiloa e Fitiuta le afioga a Galea’i M. Tu’ufuli e avea ma o latou sui, ae o Ta’u na latou fa’alauiloa Letalu e avea ma o latou sui, ae i le fa’aiuga o le fonotaga i lea aso, na filifilia ai loa Galea’i ma Vaitautolu, o sui ia mo Manu’a #1 i le Fono Faitulafono, lea fo’i na fa’amaonia e le Fa’alupega ia Maui.

 

Na fa’aulu e Nuanuaolefeagaiga le pepa fa’amaonia e fa’ailoa i ai o ia o le senatoa mo Ta’u, e ui e lei fa’amaonia e le Fa’alupega, ae na fa’amaonia e le Kovana o le Falelima a Manu’a ia Misaalefua J. Hudson, ma fa’atauto ai loa Nuanuaolefeagaiga e avea ma senatoa i le aso 3 Ianuari 2017.

 

O le ali’i loia ia Marcellus Tala Uiagalelei o loo tula’i mo le itu tagi, ae o Gwen Tauiliili-Langkilde o loo tula’i mo Nuanuaolefeagaiga.