Ads by Google Ads by Google

Tofia Komiti e iloiloina tupe maua mai i tulafono mae’a ona pasia

ausage@samoanews.com

Ua tofia nei e le afioga i le ali’i kovana ia Lolo Matalasi Moliga se Komiti Fa’afoe fa’apitoa, latou te iloilo ma mata’itu auala e fa’aleleia atili ai tulaga o tupe maua a le malo, lea e maua mai i tulafono ua mae’a ona pasia e le Fono Faitulafono ma sainia e le kovana e avea ma tulafono.

 

O sui o lea Komiti Fa’afoe e aofia ai le Loia Sili a le malo ia Talauega Eleasalo Ale o le ta’ita’i, ma ona totino e aofia ai Ueli Tonumaipe’a, Catherine Saelua, Keniseli Lafaele, Taimalelagi Dr. Claire Tuia Poumele, Keith Gebauer ma I’ulogologo J. Pereira.

 

I se vaega o lana poloaiga na sainia i le vaiaso na te’a nei ina ua tofia totino o lenei Komiti Fa’afoe, na taua ai e le afioga i le ali’i kovana le tele o tausaga, e le o tulaga malosi le fa’amalosia o tulafono o lo o mafai ai ona fa’amalosia ma maua mai tulaga o tupe mo le tamaoaiga o le malo o Amerika Samoa, ae o lo o fa’aauau pea suiga i auala o lo o fa’atautaia ai vaega eseese i totonu o le malo e pei o pisinisi.

 

I tausaga e 4 ua mavae atu e pei ona saunoa le ali’i kovana, na amata ai loa ona vaavaai le faigamalo i tulafono nei, ma amata ai loa ona fa’atulaga ni isi o suiga ina ia mafai ai ona maua ni isi tupe fa’aopoopo mo le malo e pei o le vaavaai i tulaga o le totogi o laisene pisinisi, tulaga o lafoga o lo o totogi atu e pisinisi i le malo, atoa ai ma isi lava auala sa vaavaai i ai le faigamalo ina ia mafai ai ona fa’amalosia le itu tau tupe mo le tamaoaiga.

 

“O lenei polokalame e mana’omia le fa’aauau pea, ma ua maitauina ai le tatau lea ona tofia se Komiti Fa’afoe fa’apitoa latou te va’ava’ai i auala e fa’atumauina ai le lelei ma le malosi o tupe maua mo le tamaoaiga o le malo”, o se vaega lea o le saunoaga a le ali’i kovana.

 

O galuega tauave a le Komiti Fa’afoe e pei ona tofia ai e le kovana, e le gata latou te iloiloina tulafono o lo o i ai i le taimi nei o loo maua mai ai tupe mo le malo, ae o le a latou vaavaai fo’i i taimi ma aso o lo o aoga ai nei tulafono.

 

Afai ae mae’a galuega a le Komiti Fa’afoe mo le iloiloina o tulaga uma e fa’atatau i tulafono tupe o lo o maua mai ai le fesoasoani i le tamaoaiga o le malo, ona tu’uina atu loa lea o sa latou fautuaga i le kovana mo ni suiga e onomea ona faia i tulafono o lo o i ai nei, ina ia mautinoa e mafai ai ona fa’atupulaia pea tulaga o tupe maua mo le malo o Amerika Samoa.

 

Ae talu ai o le taua tele o galuega e tatau ona fa’atino e le Komiti Fa’afoe, ua fa’atulaga ai le aso 25 Fepuari o le tausaga nei e tatau ona tu’uina atu ai la latou ulua’i ripoti e tusa ai o le latou sailiiliga ua amataina nei.