Ua toe amatalia galuega a le Koalisi a le Ma’oputasi, lea e i ai le latou Ofisa autu i le McDonald’s building i Fagatogo, i lona fogafale lona lua, ina ia taofia le tagofia o fuala’au fa’asaina, inu ava malosi, ma le ulaula tapa’a i tupulaga talavou e le’i uma pule a matua i le itumalo o le Ma’oputasi.

O le manulauti mo lenei fa’atupega mo le Ma’oputasi, e ao ina fa’atino galuega e taofia ai le tagofia e fanau talavou o le ‘ava malosi ma le sikareti ma fuala’au fa’asaina. Ona o lenei vaitau ua matua malosi le taumafaiga a le tupulaga talavou o le Ma’oputasi i le faiva i le Tai, o lea ua fa’aaoga ai e le laulauatofi a le Koalisi a le Ma’oputasi le avanoa, e tima’ia ai i le tupulaga ina ia taofia le tagofia o vaila’au ma fuala’au fa’asaina, ava malosi ma le tapa’a.

O le susuga le Peresetene o lea Koalisi, afioga Pulu Ae Ae Jr. sa ia saunoa i le tupulaga, “Ia outou iloa, e ao ina soifua outou i le olaga mama i le tausiga o lou tino, soifua maloloina lelei, ma ia matua maua le malosi lelei o le tino e ala i fa’amalositino i ta’aloga ma galuega fai i aiga ma galuega o tautua ai i le atunu’u, ekalesia ma aiga, aua nei tou tagofia fuala’au fa’asaina, ava malosi ma pia fa’apea le tapa’a, aua e mama’i ai ma tino vale outou, ona toe tigaina fo’i lea o matua e saili togafitiga e toe fa’amalosi mai ai outou.”

“Lona lua, e a’afia ai outou i ala o le tulafono, ma o’o ai le olaga i le falepuipui ma le ta’uvalea ona o fuala’au fa’asaina ma vaila’au o’ona fa’apea le pia. Fa’aaoga tatau le malosi.”

I lea tautalaga sa fa’ailo i le tupulaga talavou uma o lo’o koleni fa’apitoa e l le “Fetu ole Afiafi” le latou Sa o le tutu’u i le fa’agatama i le tai i lenei sisigafu’a 2017. O se ta’ita’i fo’i na o’o ane ma le nofoatofi o le Koalisi a le Ma’oputasi, e aofia ai le Powerade ma le Vaimalu, fa’apea ma latou toniga e alo ai i a latou koleniga mo le fa’amoemoe ua loma nei.

O se tala mai le Failautusi o lea Koalasi, le tina o Sa ma sa ia fa’ailoa atu ai i le tupulaga talavou i Fagatogo, le auva’a o le Iseulaolemoana 2 ma le 3, “Ia tautuana ma outou, le ta’uleleia o le igoa o le afio’aga pele o Fagatogo. Pe a outou faia amio lelei, e fa’apena fo’i ona mulimuli mai le ta’uleleia. Peita’i, le maasiasi e, pe afai e ta’uvalea mai fo’i nisi ona ua fa’atupu vevesi talu ai ua tagofia fo’i fualaau fa’asaina, po’o ava o’ona ma ulaula lava ua maua so’o i fanau e le’i uma le pule a matua, soia tou te naunau i mea e leaga ai outou, ta’uvalea atu ai ma nai matua pele. Manumanu i o outou tino e aoga mo galuega lelei e pei o le faiva o lo’o outou alo atu nei i ai, ia maua mai le Mua e le tatou auva’a i lenei tausaga.”

Na matua patipatia lea saunoaga a le tina failautusi a le Koalisi e le fanau talavou, ma atili ona latou fiafia ina ua mae’a ane, ua tofusia i le ofu matagofie ua mae’a lomia ai le igoa ISEULAOLEMOANA, ae o le papatua ua i ai le manulauti a le Koalisi i lenei tausaga, “TAOFI LE INUAVA I TUPULAGA LAITI.”

O le fonotaga lea ma le tupulaga alova’a a Fagatogo sa faia i le afiafi o le aso Lua, Aperila 4, 2017, i le Faleva’a o le afioaga i Fagatogo lava. Sa auai atu ai fo’i taitai o le afio’aga i ona tulafale Taesaliali’i Savea Lefiti, ma le Komiti o le Iseula o le Moana i lona Kapeteni ma le ‘au faia’oga.

Na fa’ao’o atu fo’i le ta’ita’i a le Laualauatofi o le Koalisi a le Ma’oputasi, o le fa’ainu mo le tupulaga o pusa Powerade, ma le Vaimalu, ae maise fo’i o le toniga taugata mo a latou koleniga po’o le aso patino fo’i o le tu’uga o lenei tausaga. O lo ua loma nei fo’i le fa’amoemoe mo le fonotaga ma le Auva’a o le Aeto mai Pago Pago, fa’apea ma le auva’a fo’i o le a alo i le “God is Great” ua faailoa mai, ua alo fo’i e Pago Pago.

A mae’a lea ona o’o atu lea o le fonotaga ma le auva’a po’o tupulaga o le afio’aga o Aua, lea fo’i e lua ona Sa ua mae’a fa’aulu mo le fa’amoemoe i le tai o lenei sisigafu’a. O mea uma nei e ao ina fa’ataunu’u a’o le’i oo i le aso patino mo le tu’uga.

O le a se fe’au taua o avatu e ta’ita’i ua taulimaina e le Koalisi a le Ma’oputasi mo le fanau talavou ua alofaiva e alo latou Fautasi i lenei tausaga?

“Aua le toe inu i le ava malosi ma le pia, ae taumafa i le vaimalu e manino ma aoga tele i le tino. E fa’atupu malosi ma e le gasegase ai i latou, toe leai ni fe’au sese latou te fa’atupu i le mafaufau vaivai o le fanau talavou, e le fa’aoso ita e oo lamatia ai lo latou ola usiusita’i i lagona lelei. O le toniga, ua taumafai e fa’ailoa atu ai, le sapaia e le Koalisi a le Ma’oputasi, le ola tauva i mea lelei, fa’agatama e masani lelei ai le tupulaga, ma fefa’auoa’i i mea lelei na tausinio ai.”