Ads by Google Ads by Google

Tala otooto o Fa’amasinoga

ausage@samoanews.com

OKESENE ALO

 

O le aso 4 Aokuso lea ua fa’atulaga e toe valaau ai le mataupu a le ali’i leoleo o le Falepuipui o Tamaitai i Tafuna (JDC) ia Okesene Alo, i le mae’a ai lea ona ia teena o moliaga mamafa e 3 lea ua tofu atu i le fa’amasinoga maualuga, i le mae’a ai lea o lana ulua’i iloiloga lea sa fa’ataunu’uina i luma o le fa’amasinoga fa’aitumalo i le amataga o le vaiaso na te’a nei.

 

E le gata na fa’aleo e le loia a Alo ia Sharron Rancourt lana tali tete’e i moliaga mamafa e 3 e pei ona tu’uaia ai o ia e le malo, ae sa ia talosagaina fo’i le tolopo o lana mataupu mo se 60 aso, lea fo’i na talia e le fa’amasinoga maualuga.

 

Afai ae finagalo le ua molia e fa’atulaga sana fa’amasinoga autu, o le aso 16 Tesema 2019 lea ua fa’atulaga e faia ai lea iloiloga, ae afai e avanoa isi aso o lo o i luma mai, ona mafai lea ona fa’ataunu’u lana fa’amasinoga autu i le aso 19 Fepuari 2018, e tusa ai ma le kalena a le fa’amasinoga maualuga ua i ai i le fa’atulagaina o taimi ma aso o fa’amasinoga autu, mo i latou uma o lo o tu’uaia e le malo i solitulafono mamafa.

 

E ese mai i moliaga mamafa e 3 o le faia o uiga mataga fa’asaga i ni tama’ita’i talavou se to’alua sa taofia i totonu o le Falepuipui o Tamaitai i Tafuna o lo o tu’uaia ai e le malo ia Alo, ae o lo o tu’uaia fo’i o ia i isi moliaga mamafa e silia i le 10 e aofia ai le umia fa’asolitulafono o fualaau fa’asaina, tu’uina atu o fualaau fa’asaina i fanau laiti sa taofia i le Falepuipui o Tamaiti, atoa ai ma le fa’ataga o ia tamaiti talavou e sosola i tua mai le Falepuipui sa taofia ai i latou.

 

O le va o le masina o Aperila ma Aokuso o le tausaga na te’a nei o lo o tu’uaia e le malo na alia’e mai ai lenei mataupu, lea o lo o tu’uaia ai Alo ma isi Leoleo o le Falepuipui e to’a 3.

 

O lo o taofia pea Alo i le toese i Tafuna, se’i vagana ua ia totogiina le tupe e $15,000 lea ua fa’atulaga e le fa’amasinoga ona fa’atoa mafai lea ona tatala o ia i tua, ae afai e mafai ona tatala o ia i tua, ua i ai poloaiga a le fa’amasinoga e ao ona ia usita’i i ai, e aofia ai le poloaiga e fa’asa ai ona ia toe taumafai e fa’afeso’ota’i molimau a le malo o lo o taua i totonu o fa’amaumauga a le fa’amasinoga.

 

MAKERITA LEITUANE

 

O le aso 2 Iuni lea ua fa’atulaga e fofoga aloaia ai i luma o le fa’amasinoga maualuga le maliliega aufa’atasi lea ua mae’a ona malilie i ai le malo, ma le itu a le tama’ita’i lea o lo o tu’uaia i lona ave fa’agaoi o tupe a le Ofisa o le Pulega o le Eletise ma le Suavai (ASPA) e silia i le $18,000, a o galue ai i le Ofisa o le ASPA i le motu o Aunu’u.

 

I lana iloiloga fa’apitoa sa fa’ataunu’uina i le aso Faraile na te’a nei, na fa’ailoa ai e le loia a le tama’ita’i o Makerita Leituane ia Douglas Fiaui i le fa’amasinoga, le mae’a lea ona tu’uina atu e le malo o le latou ofa mo le ua molia, ma ua latou malilie uma fo’i i ai i tuutuuga o lea maliliega.

 

Na talia e le fa’amasinoga maualuga le talosaga a Fiaui ma fa’atulaga ai loa le isi iloiloga a Leituane i le isi 2 vaiaso, ma ua toe taofia nei o ia i le toese ina ua le mafai ona ia totogi le tupe na fa’atulaga e tatala ai o ia i tua e fa’atalitali ai taualumaga o lana mataupu.

 

O lo o tu’uaia e le malo ia Leituane i moliaga mamafa e 2, e aofia ai le moliaga o le gaoi fa’apea ai ma le moliaga o lona ave fa’agaoi o ni vaega tupe sa tu’uina atu i lalo o lana vaavaaiga.

 

O ia moliaga na afua mai i le taimi ao galue o ia i le Ofisa o le ASPA i Aunu’u, mo le taliina o tupe e totogi atu e tagata mo a latou pili moli, i lalo o le auaunaga faifai pea a le ASPA mo ‘debit meter service’.

 

O lenei mataupu na tofu atu i le Ofisa o Leoleo ina ua umi se taimi e le o toe maua e le ofisa autu a le ASPA i Tutuila nei se ripoti mai le latou lala i Aunu’u, aemaise ai lava le itu tau tupe, ma fesiligia ai loa le ua molia e tusa ai o lenei mataupu, peita’i sa ia fa’aalia i le Ofisa autu a le ASPA le talepe ma osofa’i e tagata o le Ofisa i Aunu’u ae ave fa’agaoi le tupe e $18,50.

 

A o fa’agasolo ai su’esu’ega e uiga i lenei mataupu, na fa’afuase’i ona toe sui e le ua molia lana fa’amatalaga, ma ia ta’utino ai loa i lona fa’aaogaina o le tupe mo ia lava, ae ua ia sauni fo’i e toe totogi atoa lenei tupe.

 

O le moliaga o le gaoi atoa ai ma le ave fa’agaoi o ni vaega tupe sa tu’uina atu i lalo o lau vaavaaiga, o lo o fa’atulagaina i lalo o le tulafono, o le vaega C lea o solitulafono mamafa, lea e mafai ona fa’asala se tasi i le toese mo le umi e le silia i le 7 tausaga, po o le fa’asala foi i le salatupe e le sili atu i le $5,000 i le moliaga e tasi.