VAELUAGA SOFARA

O lo o tu’uaia e le malo ia Vaeluaga Sofara i le moliaga o le fa’ao’olima i le tulaga tolu, ma ua toe tolopo nei lana mataupu e toe fofogaina i le ogatotonu o le masina nei, ae o loo fa’aauau pea poloaiga o loo tatala ai o ia i tua e ao ona usita’i i ai, e pei o le aua lea ne’i ona toe taumafai e faafeso’ota’i le teineititi o loo a’afia i lenei mataupu poo lona aiga i soo se auala.

E tusa ai o fa’amaumauga a le fa’amasinoga o lo o taua ai e fa’apea, o le aoauli o le aso 14 Setema 2016 na fa’afesoota’i ai e le Tina o le teineititi na a’afia le Ofisa o Leoleo i Leone e tusa ai o le mataupu e fa’atatau i se tagata faigaluega a le Ofisa o Aoga e kuka i le Fale’ai a le aoga a Leone Midkiff lea e aoga ai lana tama, sa ia fa’aoolima i lana tama, e ala i lona po o lona gutu i totonu o le Fale’ai a le aoga.

Na taua i fa’amaumauga a le fa’amasinoga fa’aitumalo e fa’apea, o le fa’alavelave na tula’i mai i le taimi o ta’aloga a tamaiti aoga, e ala i le tauai solo e isi tamaiti o fatu apu i isi tamaiti aoga i totonu o le Fale’ai, ma fa’afuase’i ai loa ona savali atu le ua molia ma po le gutu o le teineititi na a’afia, ma lagona ai e le teineititi le niniva atoa ai ma le tau tevateva o lana savali i le malosi o le po.

Na auina e le Tina lana tama i le falema’i mo togafitiga, ma molimauina ai se unaoa i le itu o lona alafau sa tau ai le po.

I le taimi na fesiligia ai e Leoleo le teineititi na a’afia ao i ai ma lona Tina, na taua ai e le teineititi e faapea, sa faia a latou ta’aloga ma isi tamaiti aoga i totonu o le Fale’ai a le aoga, e ala i le tau’ai e isi tamaiti o fatu apu aga’i i isi tamaiti aoga, ma alu atu ai le fatu apu ma tau i lona alafau, o lea na ia tago ai loa ma togi le isi ali’i o le Vasega 6 i le fatu apu ma lona manatu, o ia lea na togiina le fatu apu na tau i lona alafau.

O le taimi lea e pei ona taua e le teineitiiti sa ia vaaia ai le taufai tauai solo e tamaiti o fatu apu i totonu o le Fale’ai, ma vaaia ai le tali e ma fiafia solo tamaiti aoga i a latou ta’aloga o loo faia, na fa’afuase’i ai loa ona alu atu le ua molia ma fesili atu i tamaiti i le mafua’aga o a latou ta’aloga, lea na tago ai loa le teineititi na a’afia ma fa’amatala i ai le mea sa tupu, ona tago ai loa lea o le ua molia ma fa’atula’i le teineititi na a’afia i luma o tamaiti aoga ae po lona gutu.

Na taua atili e le teineititi na a’afia i Leoleo le fa’asaga e se o lona ulu i le taimi na tau ai le po i lona alafau, ma mafua ai ona ia tagi ina ua ia lagonaina le mamafa ma le malosi o le po sa tau i lona gutu, ona fa’atonu lea o ia e le ua molia e alu i le potu aoga, peita’i sa ia savali sa’o i le faletaele e fufulu ona lima, ae fa’afuase’i ai loa ona ia tau pogisa lana vaai ma savali tau tevateva atu i isi tamaiti aoga ma fesoasoani ai loa i latou e tau fa’atu o ia i luga.

Na teena e Sofara tu’uaiga fa’asaga ia te ia i le taimi o lana ulua’i iloiloga i le aso Faraile o le vaiaso na te’a nei.

FELISE VILIAMU

E 24 masina lea ua faanofovaavaaia ai e le fa’amasinoga fa’aitumalo le ali’i o Felise Viliamu, ina ua ta’usala o ia e le fa’amasinoga i le moliaga o le fa’atupu vevesi i nofoaga faitele fa’apea ai ma le fa’ao’olima i le tulaga tolu, e mafua mai i le fa’alavelave lea na ia fa’ao’olima ai i se isi i le taimi o le latou inugapia sa faia i le 2 masina talu ai.

I le taliaina ai e le fa’amasinoga o le maliliega sa sainia e le malo ma Viliamu ina ia tali ioe le ua molia i moliaga mama e 2 e pei ona taua, na talosaga ai loa le malo ina ia solofua le moliaga e tasi o loo totoe ai i le pepa o tagi sa latou fa’aulu, le moliaga o le fa’aleaga meatotino i le tulaga 3.

O se inugapia sa faia i le va o Viliamu ma ni isi o ana uo, lea na fa’ai’u puta ina ua tula’i mai se taugaupu i le va o le ua molia ma le ali’i na a’afia, e aofia ai le lafo o upu masoa ma leotetele, ma mafua ai loa ona vili e aiga tuaoi Leoleo, peita’i e fetaui lava le taunu’u o Leoleo ae fa’ao’olima loa le ua molia i le ali’i na a’afia e ala i lona tu’i o ona foliga ma ia togi le atigi fagupia na leaga ai le tioata o le ta’avale a le ali’i na a’afia.

E le o se taimi muamua lea ua tula’i ai Viliamu i luma o le fa’amasinoga ona o tu’uaiga lava o le fa’atupu vevesi ma le fa’ao’olima. O le tausaga e 2013 na ta’usala ai fo’i o ia i le moliaga o le fa’ao’olima ma fa’anofovaavaaia ai o ia mo le 12 masina, ae i le tausaga e 2015 na ta’usala ai fo’i o ia i le moliaga o le fa’atupu vevesi i nofoaga faitele.

O ni isi o tuutuuga o le poloaiga a Viliamu e aofia ai le fa’asa lea ona ia toe tagofia le ‘ava malosi i totonu o le 24 masina, fa’asa ona ia toe taumafai e fa’afeso’ota’i le ali’i na a’afia, a ia avea o ia ma tagatanu’u lelei e tausisi i tulafono a le malo, ma ia totogi le salatupe e $100 i le fa’amasinoga. Ua fa’amalumalu fo’i lona tuliina o lana fa’asalaga fa’a falepuipui e 30 aso, fuafua lava i lona usitaia o tuutuuga a le fa’amasinoga.

MICHAEL LAFAELE

O le vaiaso na te’a nei na faila ai e le malo le moliaga mamafa o le ave ta’avale ao se’i le laisene ave ta’avale fa’asaga i le ali’i o Michael Lafaele, e mafua mai i le fa’alavelave lea na maua ai o ia e Leoleo o loo ia fa’afoeina se ta’avale ae o loo se’i e le fa’amasinoga lona laisene ave ta’avale mo le umi e 6 masina, e mafua mai ina ua fa’amaonia e le fa’amasinoga fa’aitumalo le moliaga o le ave ta’avale ‘ona sa tu’uaia ai o ia i le fa’aiuga o le tausaga na te’a nei.

O tuutuuga ia ua tatala ai Lafaele i tua e fa’atali ai taualumaga o lana mataupu fou lea ua fa’agasolo i luma o le fa’amasinoga, o le fa’asa lea ona ia toe fa’afoeina se ta’avale, fa’asaga ona ia toe solia se tulafono a le malo, fa’asa fo’i ona ia toe tagofia se ‘ava malosi.