Ads by Google Ads by Google

Tala otooto o Fa’amasinoga


[ata: archive]
ausage@samoanews.com

TUFE MULIPOLA

 

O le vaiaso nei lea na faila ai e le malo le moliaga mamafa o le ave ta’avale ao se’i le laisene fa’asaga ia Tufe Mulpola, e mafua mai i le fa’alavelave lea na maua ai o ia e Leoleo o loo ia fa’afoeina se ta’avale i luga o le auala a le malo i Leone i le masina na te’a nei, ae o loo se’i lona laisene ave ta’avale mo le 6 masina, ina ua fa’amaonia e le fa’amasinoga fa’aitumalo le moliaga mama o le ave ta’avale ‘ona sa tu’uaia ai o ia.

 

O ni isi o tuutuuga o le faanofovaavaaia a Mulipola ina ua se’i lona laisene ave ta’avale, o le fa’asa lea ona ia toe aveina se ta’avale, faasa fo’i ona ia toe solia se tulafono a le malo. O le faaiuga o le masina lenei ua fa’amoemoe e toe valaau ai le mataupu a le ua molia i luma o le fa’amasinoga fa’aitumalo.

 

EWARD JR EARY

 

Ua toe taofia nei i le falepuipui i Tafuna le lai’i o Edward Jr Eary, ina ua talia e le fa’amasinoga maualuga le talosaga na fa’aulu e le itu a le malo, ina ia toe taofia loa le ua molia i totonu o le toese, e mafua mai ina ua le mana’o lona Tama e fa’aaua pea ona fa’aaoga o lana tupe e tatala ai le ua molia i tua.

 

Ina ua taofia ma molia e le malo ia Eary i le masina na te’a nei, ona o tu’uaiga e mafua mai i le fa’alavelave lea na tula’i mai i Leone, lea o loo tu’uaia ai o ia i le osofaia o se fale o se aiga, na fa’atulaga ai e le fa’amasinoga le tupe e $5,000 e totogi ona fa’atoa mafai lea ona tatala o ia i tua.

 

E pei ona taua e le malo, o le Tama a le ua molia na totogiina le tupe ma tatala ai loa lona atali’i i tua e fa’atali ai le aso lea ua fa’atulaga e toe valaau ai lana mataupu i le faaiuga o le masina nei, ae i le vaiaso na te’a nei, na toe oo ai le Tama a le ua molia i le ofisa o le Loia Sili ma talosaga i le loia a le malo o loo tauaveina le mataupu a lona atali’i, ina ia toe aveese mai lana tupe lea sa totogi e tatala ai lona to’alua, ae toe ave lona atali’i e taofia i le toese i Tafuna e fa’atalitali ai taualumaga o lana mataupu.

 

Na taua e le itu a le malo i luma o le fa’amasinoga e fa’apea, o le itu o loo popole i ai le Tama ua mafua ai ona toe sui lona mafaufau, ona e foliga mai e le o usita’i le ua molia i ni isi o tuutuuga o loo tatala ai o ia e le fa’amasinoga i tua.

 

Na vave ona talia e le afioga i le ali’i fa’amasino sili ia Michael Kruse le talosaga a le malo, lea fo’i na lagolagoina e le loia a Eary ia Doug Fiaui, ma poloaina ai loa e le fa’amasinoga le toe taofia o le ua molia i totonu o le falepuipui.

 

O ni isi o tuutuuga e masani ona tu’uina atu e le fa’amasinoga i soo se taimi e tatala ai i tua i latou o loo tu’uaia i moliaga eseese, o le fa’asa lea ona toe soli se tuafono, a ia auai i soo se taimi e valaau ai a latou mataupu.

 

LEUPENA ITELE

 

O le vaiaso fou lea ua toe tolopo i ai le mataupu a le susuga ia Leupena Itele, ma le fa’amoemoe o le fa’amasinoga e tatau ona oo atu i le vaiaso lea ua mautu se maliliega ua sainia e itu e lua e fa’amuta ai lenei mataupu.

 

Na fa’aalia e le loia a Leupena Itele i luma o le fa’amasinoga maualuga i le taeao nei, le mae’a lea ona la tauaao ma le ua molia o mau fa’aamaonia mai le malo e fa’atatau i le fa’alavelave e pei ona tula’i mai, atoa ai ma le ofa a le malo ua tuuina mai mo le ua molia, o le mafua’aga lea e mana’omia ai le toe tolopo o lenei mataupu, ina ia maua ai se avanoa la te talanoa ma fa’asoa ai ma le ua molia.

 

O Itele o loo tu’uaia e le malo i moliaga mamafa e lua o le talepe fale i le tulaga muamua ma le gaoi, e mafua mai i le fa’alavelave lea o loo tu’uaia ai o ia, i lona osofaia lea o se fale o se aiga i Vaitogi i le po o le aso 17 Tesema 2016, ma ave fa’agaoi ai se vaega tupe e tusa ma le $5,000, e ala i lona tata’e o se fa’amalama o le fale ma ulufale fa’amalosi ai i totonu.

 

O ni isi o mau fa’amaonia na mafai ona maua ma taofia e Leoleo, e aofia ai le ie lavalava lea sa masalomia na sulu ai le ua molia i le taimi o le osofaiga, sa maua i se nofoaga e le mamao ese mai i le fale na ‘aafia, ma o loo pisia uma i le toto, lea na mulimuli ane fa’ailoa e le ua molia i Leoleo, o ia e ana le ie lavalava lea.

 

O ni isi sa i ai i le fale piliati i Vaitogi i le po na tula’i mai ai le fa’alavelave, na latou faamaonia i Leoleo, sa latou taaalo piliati ma le ua molia i le po e pei ona taua, ae na vave alu o ia i lona fale ina ua gau uma lana tupe sa i ai i le piliati, peita’i i se taimi o le leva o le po, na vaaia ai le toe aga’i atu o le ua molia ma toe taalo piliati, ae o le taimi fo’i lea sa vaaia ai taalo o ia i temu ta’i $20 e oo atu i le $30.

 

O lo o taofia pea Itele i le toese i Tafuna e fa’atali ai lana iloiloga lea ua toe fa’atulaga e faia i le aso Lulu o le vaiaso fou, ina ua le mafai ona ia totogi le tupe e $10,000 na fa’atulaga e tatala ai o ia i tua.

 

O le moliaga o le talepe fale i le tulaga muamua, e mafai ona fa’asala ai se tasi i le toese i Tafuna mo le umi e amata mai i le 5 tausaga ae le silia i le 15 tausaga, ma le moliaga o le gaoi, e mafai ona fa’asala ai se tasi i le toese mo le umi e le silia i le 5 tausaga, poo le fa’asala fo’i i le salatupe e le silia i le $5,000, ia poo le fa’asala fo’i i fa’asalaga uma ia e lua.