Ads by Google Ads by Google

Tala otooto o Fa’amasinoga

ausage@samoanews.com

SEMURANA AUMOANA

 

E 28 masina lea ua poloaina e le fa’amasinoga maualuga le ali’i o Semurana Aumoana na te tuliina i le toese i Tafuna, ina ua fa’amaonia e le fa’amasinoga tu’uaiga o lona le usitaia lea o tuutuuga o lana nofovaavaaia sa tu’uina atu i ai i le 2014.

 

O le aso 2 Oketopa 2014 na fa’asala ai e le fa’amasinoga ia Aumoana e taofia i le toese mo le 28 masina, o se tasi lea o tuutuuga o lana nofovaavaaia e 7 tausaga, ina ua fa’amaonia le moliaga o le talepe fale i le tulaga lua sa molia ai o ia e le malo.

 

E na o le 12 masina na tuli e Aumoana ae faila e lana loia se talosaga i le masina o Tesema 2015, mo se avanoa e tatala ai le ua molia i tua e saili sana galuega e totogi ai lana salatupe e $1,000, lea fo’i na talia e le fa’amasinoga ma tatala ai loa le ua molia i tua ina ua mae’a ona ia tuliina masina e 12 i le toese, ma le tuutuuga o le a fa’amalumalu masina e 16 o loo totoe o lana fa’asalaga fa’a falepuipui e 28 masina, pe afai e tumau pea lona usita’i i poloaiga a le fa’amasinoga.

 

O ni isi o poloaiga a le fa’amasinoga sa tu’u atu ia Aumoana e usita’i i ai, e aofia ai le fa’asa lea ona ia toe tagofia o le ‘ava malosi poo fualaau fa’asaina, totogi lana salatupe e $1,000 ma ia avea o ia ma tagata e tausisi i tulafono a le malo, ae i le masina o Iuni 2016 ina ua fa’atino e le Ofisa Fa’anofovaavaaia se suega i le tino o Aumoana, na fa’amaonia ai i lea suega le i ai o le vailaau o loo i le pauta o le aisa i lona tino, aemaise ai e le’i mae’a ona totogi lana salatupe e $1,000, ae na o le $200 ua mae’a ona ia totogiina.

 

Na talosaga le ali’i loia ia Mathoni McCormick i luma o le fa’amasinoga maualuga i le aso Faraile ua te’a, mo se avanoa e toe tatala ai Aumoana i tua e saili sana galuega tumau e totogi fa’amae’a ai lana salatupe o loo totoe.

 

I le mae’a ai ona iloilo e ali’i fa’amasino o fa’afinauga a loia atoa ai ma fa’amaumauga a le fa’amasinoga e uiga i lenei mataupu, na poloaina ai loa e le fa’amasinoga ia Aumoana na te tuliina masina o loo totoe mai lana fa’asalaga fa’a falepuipui e 28 masina, tusa le e 16 masina.

 

Afai ae tatala o ia i tua, ua fa’atonuina o ia ina ia saili sana galuega tumau, ma ia aua ne’i ona toe tagofia le ‘ava malosi poo fualaau fa’asaina, a ia avea o ia ma tagatanu’u e tausisi i tulafono a le malo. I le tulaga o le salatupe o loo totoe, ua manatu le fa’amasinoga ua lava le $200 lea ua mae’a ona totogi e le ua molia e fai ma ana salatupe i lenei mataupu.

 

O le afioga i le ali’i fa’amasino ia Elvis P. Patea sa iloiloina le fa’asalaga a le ua molia, fa’atasi ai ma le lagolagosua a afioga i ali’i Fa’amasino Lagolago ia Mamea Sala Jr.ma Tumupopo Faleafaga.

 

MUAIGA SIATIU ‘aka’ POVI

 

O le aso Faraile o le vaiaso nei lea ua fa’amoemoe e toe fofogaina ai i luma o le fa’amasinoga maualuga le mataupu a le ali’i o Muaiga Siatiu poo Povi e pei ona iloa ai e le to’atele, ona o lea ua talosaga le malo e aveese mai o ia mai le nofoaga o loo taofia ai i le taimi nei, o le potu taofia lea o loo i ai i le ofisa autu o Leoleo i Fagatogo, ae tu’u sa’o atu loa e taofia i le toese i Tafuna.

 

O le aso Faraile ua te’a na fa’aalia ai e le loia a Povi ia Mathoni McCormick lona tauaaoina lea o mau fa’amaonia o le tagi a leoleo, ma ua fa’amoemoe o le isi lua vaiaso o loo lumana’i nei o le a latou failaina ai loa se maliliega ua malilie i ai itu e lua ma le fa’amoemoe e fa’amuta ai lenei mataupu.

 

Na talosaga le loia a le malo ia Gerald Murphy i luma o le fa’amasinoga maualuga mo sana poloaiga, e fa’aleaoga ai le poloaiga sa tu’uina mai e le fa’amasinoga fa’aitumalo i le fa’aiuga o le tausaga na te’a nei, ina ia aveese mai Povi mai le toese i Tafuna ae taofia i se isi nofoaga e mafai ona i lalo o le vaavaaiga a le malo.

 

Na taua e le fa’amasino sili ia Michael Kruse le faigata lea ona ia faia se fa’aiuga e fa’aleaoga ai le poloaiga sa tu’uina mai e le fa’amasinoga fa’aitumalo, ona e le o manino le mafua’aga na ala ai ona faia e le fa’amasinoga fa’aitumalo le poloaiga e taofia ai Povi i le potu taofia i le ofisa autu a Leoleo i Fagatogo.

 

O le afioga i le Tama’ita’i Fa’amasino le tumau ia Gwen Tauiliili-Langkilde na faia le poloaiga e aveese mai ai Povi mai le toese i Tafuna, ae taofia i le ofisa o Leoleo i Fagatogo, ona o puipuiga o lona saogalemu, talu mai le fa’alavelave lea na fasi fa’amo’amo’a ai o ia e ni ali’i pagota se to’alua.

 

Na taua e Povi i le fa’amasinoga le fa’aaoga e ali’i pagota e to’alua sa tu’uaia i le fasiga o ia, o se nofoa u’amea e fa’ao’o ai manu’a i lona tino.

 

O ali’i pagota e to’alua na tu’uaia e le malo i lenei mataupu o Mosegi Solia Jr ma Reggie Va’avale, lea na molia i le moliaga mamafa o le fa’ao’olima i le tulaga lua, peita’i na toe talosaga le malo i le fa’amasinoga fa’aitumalo ina ia solofua le tagi sa latou fa’aulu fa’asaga i ia ali’i pagota.