Ads by Google Ads by Google

Tala otooto o Fa’amasinoga

ausage@samoanews.com

REGGIE MALAE VA’AVALE

 

O le ali’i e 24 tausaga le matua lea na tu’uaia e le malo i le fa’alavelave lea na ia taumafai ai e osofa’i se fale o se aiga, ua ia ta’utino i luma o le fa’amasinoga i le taeao ananafi, e fa’amaonia tu’uaiga fa’asaga ia te ia.

 

Na ulua’i tu’uaia e le malo le ali’i o Reggie Malae Va’avale i moliaga e 3, lea e aofia ai le moliaga mamafa o le taumafai lea e talepe se fale o se aiga, atoa ai ma moliaga mama e 2 o le fa’ao’olima i le tulaga tolu ma le fa’atupu vevesi i nofoaga faitele.

 

Ae i lalo o le maliliega lea ua mae’a ona sainia e itu e lua ma ua talia fo’i e le fa’amasinoga maualuga, ua tali ioe ai Va’avale i le moliaga muamua lea ua toe sui e le malo, ina ia fa’ailoa ai le moliaga mamafa o le gaoi.

 

I le tali ioe ai o Va’avale i le moliaga o le gaoi, sa ia ta’utino ai i luma o le fa’amasinoga maualuga e fa’apea, i se taimi o le aso 21 Iulai 2015, sa ia ulufale fa’amalosi ai i totonu o le fale a le aiga na a’afia ma le fa’amoemoe na te fa’atinoina ai se isi solitulafono.

 

A o i ai o ia i totonu o le fale, sa fa’afuase’i ona ia vaaia se tagata o aga’i atu ia te ia, o lea na ia tu’iina ai loa le tagata na alu atu ma pau ese ai lana masini laptop sa u’u i lona lima, ona ia alu ai loa lea ma ave le masini laptop.

 

Na taofia fa’afuase’i taualumaga a le fa’amasinoga e uiga i lenei mataupu i le taimi lea, ina ua fesili le ali’i fa’amasino sili ia Michael Kruse ia Va’avale pe ua ia malamalama i tuutuuga uma o le latou maliliega ma le malo, ae na tali le ua molia, “e leai, ou te le o malamalama uma i isi vaega o le maliliega”.

 

Na toe fesili Kruse ia Va’avale pe aisea ua ia le malamalama ai i tuutuuga o le latou maliliega ua mae’a ona sainia ma le malo, ae na toe tali le ua molia, “ou te le o malamalama i isi vaega o le maliliega, ona na faatatope atu lava le au ali’i ia ma fai mai ia te a’u e saini le maliliega”.

 

Na toe fesili Kruse ia Va’avale poo ai le au ali’i ia na o atu ma fai atu ia te ia e saini le maliliega, ae na tali le ua molia, “O Jr ma White”. O Jr, o le Fa’aliliu upu lea a le Ofisa o le Loia Fautua mo Tagata Lautele, ae o White, o le ali’i loia fautua lea o lo o avea ma loia a Vaavale, le susuga ia Michael White.

 

Na avea tali a Va’avale ma mafua’aga na taofia ai galuega a le fa’amasinoga, ae tu’u atu e ali’i fa’amasino le avanoa i loia e toe talanoa ai ia Va’avale e uiga i le latou maliliega, ae i le tuana’i ai o le itula na taofia ai galuega a le fa’amasinoga, na toe fa’ailoa ai loa e loia ma le ua molia i ali’i fa’amasino, le mae’a lea ona latou talanoa ma ua malamalama atili le ua molia i tuutuuga o le maliliega.

 

Ina ua toe fesiligia e Kruse ia Va’avale e tusa ai o le latou maliliega ma le malo, na ta’utino ai le ua molia e fa’apea, ua ia malamalama atoa i tuutuuga o le maliliega, ua ia ioeina fo’i lana gaioiga sa faia.

 

Na taua e le malo e fa’apea, o le masini laptop lea a alu ma le ua molia, e tusa ma le $1,500 lona tau aofa’i.

 

O le mae’a ai ona talia e le fa’amasinoga o le maliliega sa sainia e itu e lua, na tu’uina mai ai loa e le fa’amasinoga ma le fa’aiuga e solofua ai isi moliaga sa faila e le malo faasaga ia Va’avale, ae ua poloaina nei se ripoti mai le Ofisa Fa’anofovaavaaia e fuafua i ai se fa’asalaga a le fa’amasinoga, lea ua fa’amoemoe e tu’uina mai i le aso 6 Ianuari 2017.

 

O lo o taofia pea Va’avale i le toese i Tafuna e fa’atali ai le aso lea ua fa’atulaga e lau ai lana fa’asalaga.

 

ONOSA’I FINAU

 

O le ali’i lea na ia fa’aaoga se laupapa se fa’aoo ai manu’a i se isi ali’i sa latou inupia fa’atasi, ua tu’uaia nei o ia e le malo i moliaga mama e 2 o le fa’ao’olima i le tulaga tolu, ma le fa’atupu vevesi i nofoaga faitele.

 

O le fa’alavelave e pei ona tu’uaia ai e le malo ia Onosa’i Finau, na alia’e mai i le amataga o le vaiaso nei i Pava’ia’i ina ua logo e se aiga tuaoi le Ofisa o Leoleo mo se fesoasoani, i le mae’a ai lea ona latou molimauina o se ali’i o lo o i ai ni manu’a i ona foliga ma lona ulu.

 

Na taunu’u Leoleo ma latou vaaia ai se motu o tagata o lo o laulaututu i luma o se fale, ma se tagata o lo o taumafai ni isi e taofiofi, ae ina ua su’esu’e e Leoleo le mafua’aga o le vevesi na iloa ai, o le ali’i o loo taumafai tagata e taofi, o ia lea o Finau.

 

Na taua e le ali’i na manu’a i Leoleo e fa’apea, na amata lelei lava le latou inugapia, peita’i na fa’afuase’i ona ita le ua molia i a latou tala malie sa faia, ma aapa atu ai loa i se laupapa sa ta’atia i tafatafa o le falefou o lo o latou fausia ma ta ai lona ulu, sosoo ai ma lona ta tu’iina o ona foliga, o le mafua’aga lea na ia tu ai loa i luga ma savali ese, ae iloa mai ai e tagata tuaoi ona manu’a ma latou viliina ai loa Leoleo.

 

Na teena e Finau tu’uaiga fa’asaga ia te ia, ma ua poloaina lona totogi o le $500 e tatala ai o ia i tua, e fa’atali ai taualumaga o lana mataupu lea ua fa’agasolo i luma o le fa’amasinoga.

 

O ni isi o tuutuuga e tatau ona usita’i i ai pe afai ae mafai ona tatala o ia i tua, o le fa’asa lea ona ia toe tagofia le ‘ava malosi, fa’asa ona ia toe taumafai e fa’afesootai le ali’i na a’afia, aua fo’i nei taumafai e sola ese ma le atunu’u, a ia avea o ia ma tagatanu’u lelei e tausisi ma usita’i i tulafono a le malo.