Ads by Google Ads by Google

Tala otooto mai le Fono Faitulafono


Le afioga i le alii faipule ia Sataua Dr. Mataese Samuelu (ituagavale) ma le afioga i le ali’i faipule ia Fagaoatua Dorian T. Salave’a. [ata AF]
ausage@samoanews.com

FAUTUAINA FAIPULE FA’AAOGAINA UPEGA O FESO’OTAIGA

 

Na fautuaina e le afioga i le ali’i faipule ia Sataua Dr. Mataese Samuelu i le taeao ananafi, le tatau lea ona tu’uina atu se fautuaga a le ta’ita’i o le maota o sui i ni isi o afioga i Faipule o loo latou fa’aaogaina luga o upega o feso’otaiga fa’aonaponei, e fa’alauiloa ai ni isi o galuega a le Fono Faitulafono, aemaise lava galuega e lei oo atu i le maota ae ua fa’alauiloa i luga o upega o fesootaiga, ma ua avea ai ma auala ua to’atele ai tagata o lona itumalo ua telefoni atu ma talosaga atu mo ni fesoasoani mo i latou.

 

Mo se fa’ata’ita’iga e pei ona saunoa Sataua, ua fa’aaoga e ni isi o Faipule auala o fesootaiga e fa’alauiloa ai le mataupu e fa’atatau i se tulafono mo le si’itaga e 4% o saofaga a le litaea, ao lea e le’i oo atu se tulafono fa’apea i totonu o le maota.

 

O loo taua ai fo’i se tulaga e fa’atatau i mata uila ma moli o loo tufatufa fua atu e le Pulega o le Eletise ma le Suavai (ASPA) i ni isi o le atunu’u, peita’i e saili atu e le o i ai se auaunaga fa’apea o fa’atinoina.

 

Saunoa Sataua e faapea, ua avea fa’amatalaga nei ma auala ua to’atele ai tagata o lona itumalo ua telefoni atu ma tu’u fesili atu i mataupu nei, ona o isi ua popole i le mataupu o le siitaga o saofaga o le litaea, ae o isi ua manana’o e fia maua ni a latou mata uila moli mai le ASPA.

 

“O se talosaga e fia avatu, tatou vaavaai i auala e foia ai lenei fa’afitauli ma taofia ai le toe tula’i mai o lea fa’aletonu i le lumana’i, aua afai o se auala lea o loo fa’amalamalama ai e lea faipule i lona itumalo galuega a le Fono, i lo’u lagona e sese le auala o loo ave ai, ona o loo silasila uma ai ma le lalolagi atoa”, o le saunoaga lea a Sataua.

 

Na saili e le Samoa News fesootaiga i luga o le “Facebook”, ma maua ai fa’amatalaga e pei ona taua o loo fa’asalalau e se tasi o faipule e logoina ai lona itumalo i tulaga o mataupu galuega o loo ia fa’atinoina i luma o le fono.

 

FESILIGIA MAFUA’AGA UA LEAI AI NI TA’AVALE EMS I SASA’E

 

E le o se taimi muamua lenei ua fesiligia e le afioga i le ali’i faipule ia Lavea Fatulegae’e Palepoi Mauga le fa’afitauli o loo fetaia’i ma le Falelima i Sasa’e, o le leai lea o se auaunaga a ta’avale o le EMS mo le mamalu o le atunu’u o loo alala i lea itu o le atunu’u, i taimi e tutupu mai ai fa’alavelave fa’afuase’i e moomia ai le tautua a le aufaigaluega a le EMS.

 

O le vaiaso nei lea ua fa’atulaga e faia ai le iloiloga a le Komiti o le Soifua Maloloina ma le Falema’i a le maota o sui, e fesiligia ai le mafua’aga o le leai o se tautua a le EMS i le Falelima i Sasa’e, i lalo o le ta’ita’iga a le afioga i le ali’i faipule ia Vesi Talalelei Fautanu Jr o le ta’ita’i komiti.

 

Na tu’uaia e Lavea le leai o se ta’avale a le EMS e tautuaina le Falelima i Sasa’e o le mafua’aga na i’u ai le soifua o se tasi o ali’i foma’i ua tele tausaga o tautua i le atunu’u, lea fo’i sa avea ma senatoa mo le itumalo o Saole i tausaga ua mavae, le afioga a Fuata Dr. Tagiilima I’atala i le vaiaso na te’a nei.

 

Na taua e Lavea le fiu o le aiga o le ali’i foma’i e fa’atalitali mai le taimi e taunu’u atu ai le ta’avale a le EMS, peita’i e oo atu i le taimi na taunu’u atu ai ua tuai ma ua siliga taliiseu se fesoasoani mo le fa’asaoina o le soifua o le ali’i foma’i.

 

AVEA FUALAAU FA’ASAINA TOTONU AOGA MA FA’AFITAULI I LE LUMANA’I

 

E talitonu le afioga i le ali’i faipule ia Vesi Talalelei Fautanu Jr, afai ae fa’aauau pea le fa’atamala o le malo i le fa’amalosia lea o le saogalemu i totonu o aoga, e ono avea le fa’afitauli o fualaau fa’asaina i totonu o aoga ma se fa’afitauli e sili atu ona ogaoga i totonu o aoga i le lumana’i.

 

E le gata na fa’aleo e le afioga i le ali’i faipule mai Manu’a lona finagalo lea i le taimi o le iloiloga a le Komiti o Aoga a le maota o sui i le vaiaso na te’a nei, ma le Fa’atonusili o Aoga a le malo, ae sa ia toe fa’amanatuina fo’i le taua o lea lafoga i le taimi o folafolaga a le maota i le taeao ananafi, ina ua maua e afioga i Faipule le avanoa e fetufaa’i ma fa’asoa ai i ni isi o mataupu taua mo le manuia o le atunu’u.

 

“E taua tele lo tatou vaavaai i auala e fa’amalosia ai puipuiga i totonu o faleaoga, aua o le mea moni lava, ua i ai taimi e nana ai e fanau aoga fualaau fa’asaina i totonu o latou ato aoga, e le o se tala ula la’u tala lea e fai atu ae o mea moni ia ua tutupu e au ona mataala ai tatou o ta’ita’i, ina ne’i tatou naunau e fa’amalosia na o le isi vaega ae galo ai ona tatou vaavaai i le ata atoa o le fa’afitauli”, o le saunoaga lea a Vesi.

 

Ae na tula’i le afioga i le ali’i faipule ia Gafatasi Afalava ma ia toe fa’amausaliina lana mau sa tu’uina atu i le iloiloga i le vaiaso na te’a nei, i le tatau lea ona fa’a faigaluega ni Leoleopo i aoga eseese uma lava i le atunu’u, mo le puipuia o faleaoga mai le toe osofaia e tagata gaoi, ae na taua e ni isi o afioga i faipule popolega e fa’atatau i le fautuaga mo le fa’a faigaluegaina lea o ni Leoleopo i aoga eseese, ona o lea fuafuaga e mana’omia ai le fa’aalu e le matagaluega o aoga o se isi vaega tupe, a o lea ua manino i le folasaga a le tama’ita’i Fa’atonusili o aoga i le vaiaso na te’a nei, le fa’amuta o ni isi o konekarate sa sainia e le Ofisa o Aoga ma ni isi o konekarate teu fanua i le tausaga na te’a nei, ona o le taumafai lea e fa’asao mai tupe a le matagaluega mai le tulaga tau fa’asoasoa ma le utiuti ua i ai ana tupe i le taimi nei.