Ads by Google Ads by Google

Tala otooto mai le Fono Faitulafono


[ata: foa'i]
ausage@samoanews.com

IUGAFONO E ALOAIA AI LE TAUTUA ACE TAGO

 

O le taeao ananafi na pasia ai e le maota o sui se iugafono malilie faatasi, e faaoo atu ai aamaisega ma faamafanafanaga a le Fono mo tagata o Amerka Samoa, i le faletua ia Catherine Jamentz-Tago ma le paia o le aiga Sa Tago, ona o le valaau paia a le Atua i le susuga ia Ace AGaese Tago, ma faaaloalogia ai lana tautua mo le malo, atunu’u ma lona aiga.

 

O Tago na soifua mai i le aso 29 Ianuari 1939 i lona aiga i Nu’uuli i Amerika Samoa, ae na faamanavaina e le Atua ana galuega i le so 8 Aokuso 2017 i lona aiga i San Mateo, Kalefonia ina ua 78 tausaga o lona soifua.

 

O lona soifua aoaoina na amata atu i Amerika Samoa nei, ma faai’u mai ai i Iunivesite i Amerika, e aofia ai le Iunivesite a Western Carolina i Cullowhee lea na fa’au’u mai ai ma lana faailoga BA.

 

O Tago le uluai Samoa na faa faigaluega i lalo o le faiga fou na amata e Kovana Hayden, o le aumaia lea o Samoa e galulue i le fausiaina o le malo i le 1969, ma i’u ina avea ai o ia ma Tausi Tusi, sosoo ai loa ma le filifilia o ia e avea ma Faatonusili lagolago o le Ofisa o le Tupe a le malo i le 1970.

 

Sa tautua o ia i le nofoaiga lona 15 a le Fono Faitulafono, ma avea ai o ia ma taitaifono o le Komiti o le Atina’e, ae sui taitai i le Komiti o le Paketi ma le Komiti o le Sailiga o Alamanuia o le malo.

 

O le tausaga e 1978 na toe fo’i ai Tago i totonu o le faigamalo ma filifilia ai ma Faatonusili o le Ofisa o Paka ma Malaetaaalo, ae o le tausaga e 1989 e oo atu i le 1993 na avea ai o ia ma Teutupe a le malo o Amerika Samoa.

 

E tele itu lelei e manatua ai lana auaunaga i le atunu’u, o lona aiga faapea ai soo se tasi. E tele fo’i tausaga na tautua ai o ia i le malo o Amerika Samoa i soo se vaega. E ui ua malolo litaea o ia, ae sa faailoa pea lona naunau e tautua le malo i soo se vaega. E le o se tagata sa fia iloa ni ana mea fai.

 

O lo o soifua mai pea lona faletua ma ona alo, faapea ai fanau a lana fanau. Ua mae’a ona tauaao atu lenei iugafono i le faletua o Tago, lea na fai ai le afioga i le ali’i faipule ia Vailoata Amituana’i ma sui o le Fono Faitulafono, lea fo’i na auai atu i ai ma faipule o le itumalo o Ituau i ona toe sauniga i lona aiga i Kalefonia.

 

AMATA ILOILOGA A LE SENATE MO PILI TUPE A LE MALO

 

O le aso Tofi o le vaiaso nei lea ua fa’atulaga e amata aloaia ai iloiloga a le Senate, mo le talanoaina lea o pili tupe a le malo lea ua mae’a ona taoto i luma o maota e lua a le Fono Faitulafono.

 

I le toe tauaofia ai o galuega a le fono i le vaiaso nei, na fa’alauiloa ai e le afioga i le ali’i sentaoa ia Magalei Logovi’i o ia fo’i lea o le taitai o le Komiti o le Paketi a le Senate le fuafuaga ua i ai, i le ave lea o le fa’amuamua a le Senate i iloiloga o le paketi, fa’atoa faia ai iloiloga i pili tupe a le malo mo lafoga o oloa.

 

Ae i le mae’a ai o se fautuaga na tuuina atu e le afioga i le ali’i Senatoa ia Tuaolo M. Fruean i le taeao ananafi, atoa ai ma le tuu alalo atu a le afioga i le ali’i peresetene o le Senate ia Gaoteote Palaie Tofau, na taua ai loa e Magalei le amata aloaia o iloiloga mo pili tupe a le malo i le taeao o le aso Tofi o le vaiaso nei.

 

O sui o le Komiti Faapitoa sa iloiloina lafoga o oloa a le malo (Revenue Task Force), lea ua fa’amoemoe e fesiligia e le komiti a le Senate e uiga i le agaga o nei mau lafoga.

 

E pei ona faamanino e le Komiti i luma o le Fono i le masina na te’a nei, o le agaga autu o lafoga tupe nei, ia maua ai e le malo se alagatupe mautu ma malosi e fa’atupe ai atina’e ma galuega fai a le malo i le lumana’i.

 

Na tauae le afioga i le ali’i kovana ia Lolo Matalasi Moliga e fa’apea, e le gata e manuia le malo i pili tupe nei, ae manuia ai fo’i pisinisi ma tagata o le atunu’u, e ala i le fuafuaga a le malo e taofia ai loa le lafoga o totogi e 2%, pe afai ae pasia le lafoga 7% mo oloa, ma fa’asolosolo malie ai le aveeseina mai o le lafoga o oloa e 5% a le malo ua leva ona i ai.

 

FIA ILOA PE FIA SE TUPE O LE PONE A LE MALO O LO O TOTOE

 

I le taeao o le aso Tofi o le vaiaso nei lea ua fa’atulaga ai le iloiloga a le maota o sui ma sui o le Komiti Faafoe o le Tamaoaiga a le malo o Amerika Samoa (ASEDA), mo le faamaninoina o mataupu o lo o fia malamalama i ai afioga i faipule, aemaise lava i le fesili e pei ona fa’atula’i e le ali’i faipule ia Timusa Tini Lam Yuen e fa’atatau i tupe o le Pone a le malo.

 

O le mae’a ai o le feiloaiga a le maota o sui ma sui o le Komiti Fa’afoe i le itula e 8:30 i le taeao, ona sosoo ai loa lea ma le iloiloga i le 11:00, e fa’amaonia ai totino fou o le Komiti Fa’afoe lea fa’atoa mae’a ona tofia e le Kovana e sui tulaga i sui tuai ua toe tofia i isi galuega a le malo.

 

Saunoa le afioga a Timusa e fa’apea, e taua tele le malamalama o le maota i le tulaga o le Pone a le malo, pe fia se tupe o totoe e le i fa’aaogaina, a o lumana’i ai le faia o se faaiuga i pili a le malo e fa’aee ai lafoga i oloa.

 

Sa ia taua foi le tatau lea ona faamanino e le Komiti Faafoe le aofa’i o le tupe ua mae’a ona totogi e le malo mo le Pone, atoa ai ma isi faamatalaga e tatau ona fa’ailoa mai i le maota mo lo latou silafia.

 

Na taua e ni isi o afioga i faipule e fa’apea, e taua tele le mataupu i le Pone ina ia silafia ai e le maota le tulaga tonu o lo o taoto ai le tamaoaiga o le malo. O se tasi o itu o lo o fia malamalama i ai faipule, poo i ai se faaletonu i le totogiina atu o le Pone, atoa ai ma tupe lotoifale o lo o ao mai e le malo, ina ne’i avea ma se tasi o fa’afitauli i le taumafaiga e totogi aitalafu toe fa’atupe auaunaga a le malo i le taimi e tasi.