Ads by Google Ads by Google

Tala otooto mai le Fa’amasinoga


[ata: archive]
ausage@samoanews.com

SIAOSI LAULU

 

O le taeao ananafi lea na amata aloaia ai taualumaga o le fa’amasinoga iloilo a le ali’i o Siaosi Laulu, e tusa ai o tu’uaiga mamafa ua faila e le malo fa’asaga ia te ia, e mafua mai i se fa’alavelave na tula’i mai i le masina o Iuni o le tausaga na te’a nei, lea o lo o tu’uaia ai o ia i lona faia lea o uiga mataga i se teineititi e talavou i lalo o le tulafono.

 

O moliaga mamafa e 4 o lo o tu’uaia ai e le malo ia Laulu e aofia ai lona tagofia o itutinosa o se teineititi e talavou i lalo o le tulafono (sexual abuse 1st degree), faia o amioga fa’asotoma (sodomy), ma moliaga e 2 o le talepe fale i le tulaga muamua ma le tulaga lua.

 

O lo o teena e Laulu tu’uaiga a le malo fa’asaga ia te ia, i lona ulufale fa’amalosi lea i totonu o se fale o se aiga i le po ma le fa’amoemoe e fa’atino ai le solitulafono o le faia lea o uiga mataga i se teneititi.

 

O le ulua’i iloiloga a Laulu i luma o le fa’amasinoga maualuga i le masina o Iulai 2016, sa ia fa’ailoa ai i le afioga i le ali’i fa’amasino lona matua le malamalama i le mataupu o loo tu’uaia ai o ia e le malo, e le’i fa’amalamalama atu fo’i e lana loia ia te ia uiga o moliaga o loo tu’uaia ai o ia.

 

Ina ua maua lona avanoa mai le afioga i le ali’i fa’aasino ia Elvis P. Patea i se tasi o ana iloiloga i le tausaga na te’a nei, na fa’ailoa ai e Laulu e fa’apea, na pau lava le tala sa fa’ailoa atu ia i le taimi na fa’agasolo ai ana iloiloga i luma o le fa’amasinoga fa’aitumalo, o le tali “ioe” i soo se fesili e tu’uina atu e le fa’amasinoga.

 

Sa ia taua atili fo’i i le fa’amasinoga e fa’apea, a o taofia ai o ia i le toese i Tafuna, sa ia telefoni i le Ofisa o lana loia ma ia talosaga ai i le fa’aliliu upu o loo galue ai, mo se avanoa e fia talanoa ai ma lana loia, peita’i na pau le tali na ia maua mai le fa’aliliu upu, e na o palauvale ma upu mataga, ae ina ua fai atu i ai i le fa’aliliu upu e le o lona igoa lea sa fa’aigoa ai o ia e ona matua, o le a ia failaina fo’i se ripoti e fa’atatau ia te ia, sa fai atu le tagata lea i luga o le telefoni ia te ia, “Alu la e ripoti a’u a o le a ou tago e eli lou tu’ugamau”.

 

O le taeao ananafi lea na amata ai ona saili ni ali’i ma tama’ita’i fa’amasino latou te iloiloina se fa’aiuga o le tagi a le malo fa’asaga ia Laulu, ma le fa’amoemoe o le taeao nei e amata aloaia ai loa taualumaga o lenei fa’amasinoga autu.

 

O afioga i ali’i fa’amasino ia Mamea Sala Jr ma Tunupopo Faleafaga o loo lagolago i le afioga i le ali’i fa’amasino ia Patea i le fa’atautaiga o le mataupu a Laulu, ae o le ali’i loia ia Douglas Fiaui o loo tula’i mo Laulu, ma le susuga ia Gerald Murphy o loo tula’i mo le malo.

 

OKESENE ALO

 

Na toe solofua fo’i e le fa’amasinoga fa’aitumalo i le vaiaso na te’a nei moliaga fou na toe faila e le malo fa’asaga ia Okesene Alo, ina ua talia e le afioga i le ali’i fa’amasino ia Fiti Sunia le talosaga a le loia mo le malo ia Gerald Murphy, mo se avanoa e toe solofua ai moliaga fou ua faila e le malo fa’asaga ia Alo, ae se’i toe ave i tua le mataupu e iloilo ma toe su’esu’e.

 

O le fa’alua ai lea ona solofua e le fa’amasinoga fa’aitumalo isi moliaga sa faila e le malo fa’asaga ia Alo. E ese mai i moliaga o le umia fa’asolitulafono o vaega o le pauta fa’asaina o le aisa, atoa ai ma le fesoasoani e fa’asosola i tua tamaiti sa taofia fa’apagota i le Falepuipui o Tamaiti i Tafuna (JDC) lea ua tofu atu i luma o le fa’amasinoga maualuga, o moliaga mamafa e 14 o le feusua’i ma se teineititi e laititi i lalo o le tulafono na ulua’i tu’uaia ai e le malo ia Alo, o moliaga ia o lea ua fa’alua ona solofua e le fa’amasinoga.

 

O le mae’a ai o le ulua’i iloiloga a Alo sa faia i le amataga o le masina o Aperila na te’a nei, lea na taumafai ai le malo e fa’amaonia i le fa’amasinoga mau fa’amaonia e lagolago ai le latou tagi fa’asaga ia Alo, na solofua ai loa e le fa’amasinoga fa’aitumalo moliaga mamafa e 14 o le feusua’i ma se teineititi e laititi i lalo o le tulafono fa’asaga ia Alo, ina ua talitonu le fa’amasinoga e lei mafai e le malo ona tu’uina atu mau fa’amaonia e lagolago ai le latou tagi fa’asaga ia Alo.

 

O moliaga ia na toe faila e le malo fa’asaga ia Alo i le vaiaso na te’a nei, o moliaga uma fo’i ia ma fa’amatalaga sa latou mua’i faila fa’asaga ia te ia i le masina na te’a nei, lea fo’i na solofua e le fa’amasinoga fa’aitumalo.

 

Na taua e Murphy i le fa’amasinoga le fa’aauau pea o a latou su’esu’ega e uiga i lenei mataupu, ma le fa’amoemoe e tatau ona mautu mai i se taimi e le o toe mamao fa’amatalaga fou e lagolago ai moliaga o loo fa’amoemoe pea e faila fa’asaga ia Alo, lea o loo taofia pea i le toese i Tafuna ina ua le mafai ona ia totogiina le tupe e $50,000 ua fa’atulaga e le fa’amasinoga e tatala ai o ia i tua mai le toese.

 

TAVITA SAPE

 

“Alu ma e mafaufau i le avanoa lea ua tu’uina atu e le fa’amasinoga ia te oe, e te toe tagofia loa le ‘ava malosi i soo se taimi, e le gata o le a e tuliina loa aso e 18 lea ua fa’amalumalu mo lau fa’asalaga fa’a falepuipui, ae o le a mafai fo’i e le fa’amasinoga ona taofia oe i le falepuipui mo se taimi e sili atu nai lo le 18 aso”, o le lapataiga mulimuli lea sa tu’uina atu e le afioga i le ali’i fa’amasino ia Fiti Sunia fa’asaga i le ali’i o Tavita Sape i le vaiaso na te’a nei, ina ua ta’usala o ia i le moliaga o le inupia ae lei atoa lona 21 tausaga le matua.

 

Na umi se taimi na fa’aalu e le afioga a Sunia e faufautua ai ia Sape i le leaga o le le usita’i i poloaiga a le fa’amasinoga. O ni isi o tuutuuga o lana nofovaavaaia e 12 masina e aofia ai le fa’asa lea ona ia toe tagofia le ‘ava malosi, mafai ona faia se suega i lona tino ina ia iloa ai poo ia tagofia le ‘ava malosi, aua ne’i ona toe solia se tulafono, auai i aoaoga e fesoasoani ai i le leaga o le ‘ava malosi.

 

“O le uiga o le poloaiga lea e faia ai le suega i lona tino ina ia iloa ai poo e tagofia le ‘ava malosi, e mafai lava ona faia i soo se nofoaga e maua i ai oe, poo luga o le pasi, poo lou aiga, poo lou sau i le fa’amasinoga, pe maua fo’i oe i soo se vaega o le taulaga, o lou sa’olotoga la o loo i ou lava lima”.

 

O isi poloaiga mo Sape e aofia ai le totogi o le salatupe e $100 ma saili sana galuega tumau e galue ai.