Ads by Google Ads by Google

Pasia Faipule pili fa’avae ai le Asosi a Tausima’i i Amerika Samoa


Sui o le Asosi a Tausima’i i le taimi na molimau ai i luma o le maota o sui i le vaiaso na te’a nei, e fa’atatau i le tulafono lea ua pasia nei e afioga i faipule e fa’avae ai le Asosi a Tausima’i i Amerika Samoa. [ata AF]
ausage@samoanews.com

E ui i le eseese o finagalo o afioga i Faipule e fa’atatau i le tulafono taufa’aofi lea sa latou iloiloina mai i le 3 vaiaso talu ai, mo se pili e fa’avae ai le Asosi a Tausima’i i Amerika Samoa, o le taeao ananafi na pasia ai e le maota o sui i le faitauga fa’atolu lenei tulafono i le palota e 13-5, ma ua sauni mo le tauaaoina atu i le maota maualuga lenei tulafono mo sa latou fa’aiuga.

 

O afioga i faipule na palota ioe i lenei tulafono e aofia ai Vesi Talalelei Fautanu Jr, o ia fo’i lea sa fa’aulufaleina le tulafono, ma le ta’ita’ifono o le Komiti o le Soifua Maloloina a le maota, Fetu Fetui Jr, Toeaina Faufano Autele, Lavea Fatulegae’e P. Mauga, Kitara Vaiau, Vailiuama S. Leasiolagi, Veevalu M. Mageo, Manumaua W. Wilson, Fagaoatua Dorian T. Salave’a, Vui Florence Saulo, Timusa Tini Lam Yuen ma Gafatasi Afaava.

 

O afioga i faipule na palota leai e aofia ai Matagi David Mauga, Vailoata Eteuati Amituana’i, Vaetasi Tuumolimoli S. Moliga, Sataua Dr. Mataese Samuelu ma Faimealelei Anthony F. Allen.

 

O le agaga o lenei tulafono e pei ona taua e sui o le Vaega a Tausima’i i luma o le maota o sui i iloiloga e 4 sa valaauina, e taua tele le faavae o se Asosi a Tausima’i i Amerika Samoa, ina ia fesoasoani ai i le fa’aleleia o galuega fa’atino a Tausima’i i Amerika Samoa, e pei o le si’itia maualuga o a latou laisene mo aoaoga, aemaise ai o le fa’a faigofie lea ona aloaia laisene ma aoaoga mo i latou i le Asosi o Tausima’i i le lalolagi.

 

Afai ae pasia e le Fono Faitulafono lenei pili ma sainia e le kovana e aloaia ma tulafono, o le a mafai loa ona aloaia le Faavaeina o le Asosi o Tausima’i i Amerika Samoa, ma tofia fo’i lana Komiti Fa’afoe e faamaonia laisene mo Tausima’i e galulue i le Falema’i i Fagaalu.

 

O le Komiti Fa’afoe e to’a 7 ona totino o lo o aofia ai i le tulafono, e tofia mai i Tausima’i ua i ai fa’ailoga ma laisene, atoa ai ma le sui e to’atasi mai le atunu’u lautele.

 

E 3 iloiloga sa valaauina e le Komiti o le Soifua Maloloina a le maota o sui ma sui o le Asosi o Tausima’i i le atunu’u, ma le iloiloga e mulimuli e tasi e atoa i ai le fa o iloiloga sa valaauina mo lenei tulafono taufa’aofi, lea sa molimau fa’atasi ai sui o le Asosi o Tausima’i atoa ai ma sui o le Komiti lea e faamaonia laisene o foma’i e galulue i Amerika Samoa (Regulatory Board), lea o loo ta’ita’ifono ai le Faatonusili o le Matagaluega o le Soifua Malolonia ia Motusa T. Nua, ma ona totino o foma’i ma tausima’i ua i ai laisene.

 

Na atagia i molimau a sui o le Komiti lea lo latou popole i le gagana o le tulafono lea o loo taua ai le tofia o se Komiti Fa’afoe a Tausima’i latou te iloiloina ma faamaonia laisene o tausima’i e galulue i le falema’i i Fagaalu.

 

Na taua e Motusa ma le Foma’i Sili ia Dr. Iotamo Saleapaga i a la molimau i luma o le maota o sui i le vaiaso na te’a nei e fa’apea, o le popolega o lo o i ai, ina nei avea la tofia o le Komiti Fa’afoe a Tausima’i ma auala e aveesea ai le malosi o loo umia e le Komiti a le Regularly Borad e faamaonia ai foma’i fai laisene e galulue i le falema’i, ma talia foma’i mai fafo e galulue i le falema’i.

 

O le molimau lea a sui o le Komiti a le Health Regularly Board na mafua ai loa ona tele fesili mai ni isi o afioga i Faipule, o le fete’ena’i o galuega a Komiti e lua e pei ona taua, atoa ai ma isi vaega o le tulafono lea o loo talanoa mai ai i tulaga o auala e saili ai tupe a Tausima’i.

 

Ina ua sauni le maota e faitau fa’alua le tulafono lenei i le aso Gafua na te’a nei, na tele fa’afinauga mai ni isi o afioga i faipule e aofia ai ma le Fofoga Fetalai, ona o le taumafai e fa’amanino ni isi o vaega o loo i totonu.

 

Saunoa Savalii Talavou Ale e fa’apea, e tatau ona manino tulaga o tupe o loo taua i le tulafono, pe lava tupe ia e fa’afaigaluega ai le Pulesili o le Asosi a Tausima’i o loo taua i le tulafono, ae o ai fo’i e teuina tupe a le Asosi o Tausima’i, ina nei fete’ena’i ma le tulafono o loo i ai, o tupe uma a vaega eseese a le malo e teu e le Teutupe a le malo.

 

O se tasi o tulaga sa tele i ai finagalo fa’aalia a ni isi o faipule, o le fete’enaiga e ono tula’i mai i le va o le Komiti a le Regularly Board ma le Komiti Fa’afoe a Tausima’i, ona e talitonu ni isi o faipule, e tasi lava le Komiti e mafai ona faa faigaluegaina foma’i mai fafo ma fa’amaonia laisene o tausima’i, e na o le Komiti a le Regularly Board.

 

Ae na fa’amanino e Vesi e fa’apea, e le avea le pasia o le tulafono lenei ma fa’avae le Komiti Fa’afoe a Tausima’i ma auala e aveesea ai le malosi o le Regularly Board, latou te tofia ai ma faamaonia foma’i mai fafo e galulue i le falema’i i Fagaalu, na pau le vaega o loo talanoa mai ai le tulafono e au i ai le malosi o le Asosi a Tausima’i, o le fa’amaonia lea o laisene o tausima’i e galulue ai, ae o le fa’a faigaluegaina o foma’i mai fafo, o le matafaioi lava lea a le Komiti a le Regularly Board.