Ads by Google Ads by Google

Onosa’I I Mea Tiga

Vaega: 83

 

Ae alo maia, mo le toe fa’aauauina o la tatou tala mo lenei aso. Na muta mai la tatou tala, ina ua liliu atu nei aiga mo le fa’aipoipoga a le tama’ita’i o Filipina. Fai mai, o le va’ai a tagata i lea aso, ua matua’i aulelei le tama’ita’i, ma ua talafeagai fo’i le fai o lona to’alua Palagi, ae sa lagona lava le fa’anoanoa o le teine, ona ua le va’aia foliga o si ona tama, le toeaina o Mose i lona aso fiafia.

 

A alu alu le siva a le lo’omatua o Malia, liliu mai i tua, “Au mai lo’u to’oto’o ua tau pau le lo’omatua, a tou va’ai mai ua aliali mea na natia, ae tou telie mai.” Fai mai, ua alu le talie a tagata, ona e leai se tasi na iloa, e ta le malu a le lo’omatua, a’o lea ua fa’atoa fa’aaliali i le aso fiafia o lana tama.

 

Ae o le upu moni lava, e le i fa’aalialia le malu a le lo’omatua i le fa’aipoipoga a lana tama o Lilo. Ma e le i fa’apea fo’i se fiafia o le lo’omatua, e pei ona i ai i le aso fiafia o Filipina. O lea la na mata’i lelei e Filipina ma Lilo ma Luisa, fai mai, ua ‘ese lava uiga o si o latou tina, ua lagona le fiafia o le loto, ina ua iloa ma mautinoa e le lo’omatua, ua i’u manuia le olaga o Filipina.

 

O le itu lea na popole i ai lona loto, ae maise o si toeaina o Mose a’o soifua mai. E fai ai lava a la talatalanoaga, pe o le a i’u i fea le olaga o Filipina, a’o lea ua tali mai le Ali’i i a la talosaga ina ia maua se tofi lelei mo si a la tama teine. Ua saofa’i ifo nei i lalo le lo’omatua ua tau to lona sela.

 

Fai mai, o le tama’ita’i o Mataniufeagaimaleata, na avea ma uo sili a Filipina, o le vaitaimi lea ua sefuluvalu tausaga o Mataniu, ae sefulu tausaga o Ataataotauleleia. O le tala malie, fai mai e va’ai atu Filipina, ua talatalanoa le isi uso o lona to’alua i a Mataniu. Ua ‘ata Filipina ma tilotilo atu ia Mataniu, fai mai o se tama’ita’i e lalelei tele, e uliuli lona tino, ae mata aulelei.

 

O le mea fo’i lea na mata’iga tele e tagata, ona e leai ni foliga o le aiga o Lilo o lo’o maua e Mataniu, ae fai mai ua na o si masalosaloga ae e leai se mea e fa’avae ai o latou masalosaloga, aua ua matua’i natia lava i le ‘ele’ele, e le lo’omatua o Malia ma le toeaina o Mose.

 

Ua fa’ai’u le aso fiafia o Filipina ma Roger, ma ua amata fo’i ona alu le tagata latou i lona aiga, fai mai, o lu’uga mea’ai na fai nei e tagata o le nu’u. O le toeaina lava o Lefefe na tu i le to’oto’o e tali aiga ma tagata na o’o ane mo le aso fiafia o Filipina. Na ta ai fo’i ma le faleaitu a le toeaina o Lefefe i le va lea, fai mai, na alu alu le lauga a le toeaina e tali atu ai i le aiga o Malia na masi’i ane ona o le valevale alofa ia Malia ma si ana fanau, o lo’o nonofo pea i le aiga o Mose fa’apea tala a le toeaina.

 

“Ia e fa’apenei, alo maia so’u paolo ou te malu ai i itu e fa o Samoa, o le fa’aaloalo lenei e talimasineia ai lo outou au vasa mamao mai, o le ie lenei na puipui ai lenei aiga, o lea o le a te’a atu, e faigata o ta va tu’u nonofo, o le igoa o le ie, o le alu atu e le toe fo’i mai.”

 

E faia pea...