Ads by Google Ads by Google

Onosa’i i Mea Tiga

Vaega: 77

 

Tatou fa’afo’i pea le vi’iga ma le fa’amanu i le Atua Soifua, ona o Lana tausiga alofa ma Lana puipuiga tumau pea mo i tatou i aso uma o lo tatou ola. E ao ai ona o tatou fa’apea ifo, “Le Atua e, o ai ea i matou le tagata agasala ua e manatu mai pea i ai, ae matou te talitonu ma o matou fa’atuatua pea i Lau Afio, aua o la’u Afio e te talia o matou mana’o uma, afio mai, e te nofo tupu i o matou loto i lenei aso, a’o le vi’iga ma le fa’amanu matou te fa’afo’i atu i Lau Afio e fa’avavau, fa’avavau lava, Amene.”

 

Na muta mai la tatou tala, ina ua taua’imisa Faifeau i le po o le alalafaga mo Lilo ma Loleta ma si a la tama o Mataniufeagaimaleata. Ia o mea lava e fai i lalo nei, ae su’esu’e i luga, e pei o le tala a le isi toeaina o si o matou nu’u. Ua ta’ua’imisa nei Fa’afeagaiga, ia o le faiga lava lea o le galuega, ua taua’i misa i a la mamoe, fai mai le isi o lana mamoe, ae tali atu le isi, ana leai lana mamoe, e le ma’i le mamoe a le isi.

 

Ia o faiga lava ia o se mea, ae se i o tatou toe tepa tasi i le igoa lea ua fa’aigoa ai nei e le lo’omatua o Malia le afafine o Lilo. Fai mai, na i’u ina tau fetaui ai lo’omatutua i lea aso. Ae ua malo lava le igoa a le lo’omatua o Malia, fai mai na fa’apea ane le lo’omatua o Malia ia Susitina, “Tina, va’ai oe le lo’omatua, o lo’u igoa taupou lea ua ou fa’aigoaina ai le afafine o la’u tama, e i ai la sou igoa taupou e fa’aigoa ai, ia afai e leai, ia malolo ane i le vaitipolo a le fa’ili.”

 

Fai mai, ua le tautala le lo’omatua o Susitina, ae ua geno ane i ai le toeaina o Falaniko, e tu’u ai pea, o le igoa lava ua fa’aigoa ai e Mose ma Malia, o le igoa lava lea, e ‘ese fo’i le matagofie o le igoa taupou o le lo’omatua sa igoa ai, a’o talavou. Na toe fesili ane lava Falaniko ia Malia, pe o le a le uiga o lona igoa, ae fai mai, na liuliu ane i ai le lo’omatua o Malia ma lona loto fiafia, ona o lea o le a fa’afofoga Fa’afeagaiga ma o la Faletua, ae maise o i latou uma na ‘au ai, i le fa’amatalaina o le uiga o lona igoa taupou.

 

Ua amata le tala a le lo’omatua, “O a’u, na avea a’u ma taupou o si o matou nu’u, ona o lo’u aiga fo’i, e le o se aiga fa’ata’atia solo i le ala, e leai, o si o’u aiga ua iloga fo’i i a Samoa atoa. O le igoa taupou la na fa’aigoa ai a’u, o Mataniufeagaimaleata, fai mai, o le igoa lea ua iloga fo’i lona talatu’u, ona o le taunu’u mai o le talalelei a le Ekalesia i totonu o Samoa, o lea ua liuliu ai se tofa a’o se fa’autaga i a Samoa atoa, e fa’aigoa fa’apea, Mataniufeagaimaleata.”

 

Na toe tali le toeaina o Falaniko, “O le mea e sili ona taua, o le na lava e te silafia Malia le uiga o lou suafa, o lea fo’i e susu atu Susuga i Fa’afeagaiga, ia atonu o lo’o silafia fo’i e i la’ua le uiga o lou suafa.”

 

Fai mai, ua na o le punonou o Mose ma Lefefe ua leai se isi na toe tautala, ae o lo’o fa’aauau pea tala a le lo’omatua o Malia. Fai mai, ua tilotilo ane nei i ai lana tama o Lilo ma lulu lona ulu, ae i totonu o le loto o Lilo, sa ia lagona le loto fa’afetai i nai ona matua, e ui lava ina o lo’o i ai pea le mataupu o lo’o ia fia talatalanoa ai i nai ona matua, ae ua mautinoa i le loto o le tama, e fai aso le Ali’i, e faia lava e le Ali’i taimi ma aso o mea uma.

 

Fai mai, na toe tu’umuli Fa’afeagai ma la’uga, ona o fa’aaloaloga na alo i ai aiga ga lua, ae fai mai le tala, e fo’i Fa’afeagaiga, ae ua lagona le loto fa’afetai o Mose, Malia, Susitina ma Falaniko, ona o le lelei fo’i ona fa’afoefoe e a la matai o le po. Le fofoga o le po le matai ia Lefefe ae maise fo’i o Avemaoe, o i la’ua ia na feagai ma le fa’afeiloa’iga o Fa’afeagaiga fa’apea ma i latou uma sa auai.

 

E faia pea...