Ads by Google Ads by Google

Onosa’i I Mea Tiga

ausage@samoanews.com

Vaega: 37

 

Fa’atalofa atu ma fa’afeiloa’i atu i le mamalu o le atunu’u i lenei aso fou, e i ai pea le fa’amoemoe, o lo’o aoina le masina i le soifua laulelei o tama ma tina matutua, ae maise fo’i o tupulaga lalovaoa o le atunu’u. Tatou momoli la ia o lapalapa o malo ma fa’afo’i le vi’iga i le Atua Soifua, ona o Lona alofa ma lona agalelei lea ua tatou maua ai le ola, ma le fa’amoemoega sili i mea uma tatou te faia.

 

Ae alo maia, o le a toe fa’aauau atu la tatou tala fa’asolo mo lenei aso, ae ia manuia lou alo atu i feau ma galuega o le a feagai ai. Na muta mai la tatou tala, ina to’a mai le lo’omatua o Malia, a’o lea ua tau maua atu ai ma le ova a le toeaina o Mose, ona o lea ua iloa nei e le lo’omatua, e muamua alu le fa’amalamalamaga a le tama i le aiga o le teine, ae e le i alu atu se fa’amalamalamaga a Mose ia te ia, na ona togi atu lava o  le tama’i ma’a e Mose, u’u loa ma lana ato ma la’a mai fafo ma o mai loa i le aiga o Mose.

 

Ae se i o tatou tulituliloaina pea, po’o fea o le a o’o i ai la tatou tala. Fai mai le tala, ina ua taunu’u ane le sola’aga a Mose ma Malia i le aiga o Mose, na fai ai loa ma le fa’aipoipoga i le aso e soso’o ai. O le tina lava o Mose na aunagi ane i lona to’alua, ia fai loa le fa’aipoipoga a Mose ma Malia, e fa’amama ai la’ua, ae maise fo’i o le va’aiga a le nu’u fa’apea le Ekalesia.

 

E le i iloa e matua o Malia, ua fai le fa’aipoipoga a Malia, ae fa’atoa alu atu le savali a le aiga o Mose e fa’ailoa. O le upu fo’i lea a si o tatou atunu’u, “Ua muamua ta le ‘aufa’i, ae mulimuli fa’anoi.” E sa’o ai la le nanu a si toeaina o si o matou, fai mai, “She is the life of my love.” Ae tali ane le isi toeaina, “Ioe, la lea, la lea, she is the wife of my love.”

 

Ua fa’apea lava ona fai, fai mai, o le gaioi a le lo’omatua i totonu o le aiga o Mose, e matua’i selau pasese, a’o le gutu oso o Malia, ua matua’i selau pasasa. E fa’alogo ma lava matua o Mose o alu atu le ote a Malia ia Mose. O le tala a le tina o Mose i lona to’alua, “Aua, tu’u ai pea, o le ote o se mea ua sili ona lelei, e fa’atonu ai le mafaufau vaivai o le tagata. O le ta tama o Mose, e vaivai lava lona mafaufau, ae ou te fa’afetai ua maua e Mose se tagata lelei e pei o Malia, ua na teuteu le mea atoa, tu’u ai la’ia, ‘aua lava ta te aia fua i le ulugali’i a Mose ma Malia.”

 

Ua le tautala le tama o Mose ae ua na o le punou ma fa’alogologo i le ote lae e sau mai le faleo’o o lo’o nonofo ai Malia ma Mose. A’o le lo’omatua o Sieni, o lo’o punou ma ‘ata i lea taimi. E na o le to’alua fo’i le fanau a Lopati ma Ataataotaulelei Sieni, ua na o Mose ma lona tuafafine ua maliu, le tina lea o Luisa. Ua tutusa lava la ma le fanau a Mose ma Malia lea o lo’o i ai nei, ua na o Lilo ma Filipina, peita’i, ua avea le tama a le tuafafine o Mose ma a la tama moni, aua ua maliu si ona tina.

 

O lea la ua toe fa’asolosolo nei mafaufauga o le lo’omatua o Malia i lea taimi, ona ua tau i ai lona loto i mea na tutupu a’o fa’atoa nofotane i le aiga o Mose. Ae fai mai le tala, o le toeaina o Lefefe o lona igoa na fa’aigoa ai a’o le i avea ma matai, o Mika. E fai fetauiga a Mika ma le lo’omatua o Malia, e aga malie fo’i le lo’omatua latou, ma e le fa’avaivai ai le lo’omatua i le faiga o le aiga o Mose.

 

“Malia, ia onosa’i ia oe le lo’omatua faigata, ua pau fo’i o la aso, ua ‘ese aso la, ‘ese aso nei, ua tau sau fo’i le matua latou, ae ia e maua le onosa’i ma le fa’apalepale, ae liliu  mai e fai se tonu lelei mo si a ta tama lea e nofo atu.”

 

“Ia ua lelei ali’i Mose na maua i le ato ‘ofe, ae va’ai oe, ua malolo atu a’u, ae fai mai e oulua ma Lefefe le tonu, ua ou malie fo’i i le mea ua fai mai ai si a’u tama o Lilo, ae fai, po’o le a le tonu lelei e fai, se manu o lea e lava le taimi.”

 

E faia pea...