Ads by Google Ads by Google

Fesiligia malosi o Pulenu’u e fa’amalosi ai tulafono fa’alapisi

ausage@samoanews.com

A o le i pasia e le maota o sui i le aso Faraile na te’a nei i lona faitauga fa’atolu, le tulafono a le maota maualuga e siitia ai le tulaga o le fa’amalosia o le tulafono o le fa’aotaota i Amerika Samoa fa’atasi ma suiga, na maua le avanoa o ni isi o afioga i Faipule latou te fesiligia ai le malosi lea ua tu’u atu i Pulenu’u latou te fa’asalaina ai tagata e maua o solitulafono.

 

E pei ona talosagaina ai e le faigamalo a Lolo ma Lemanu le toe teuteuga o le tulafono lenei a le malo, e na o le 6 lava Ofisa o le malo e tatau ona tu’u i ai le malosi latou te tu’uina atu ai pepa sala (ticket) i soo se tagata e maua ma masalomia i lona soliina o le tulafono o le fa’aotaota, ae o le fa’asalaga e aumai e le fa’amasinoga.

 

O Ofisa e 6 e aofia ai le Ofisa o Vaega o le Puipuiga o le Siomaga a Amerika Samoa (AS-EPA), Ofisa o Pulega o le Eletise ma le Suavai (ASPA), Matagaluega o le Soifua Maloloina, Ofisa Alamanuia o le Sami ma le Vaomatua, Matagaluega o le Paka ma Malaetaalo, fa’apea ai ma le Matagaluega o Leoleo.

 

Ae i le mae’a ai o iloiloga sa faia a maota e lua, na talia ai loa e le Senate le talosaga a le Ofisa o Mataupu Tau Samoa, ina ia tu’u i ai ma le latou Ofisa i le lisi o Ofisa e tu’u atu i ai le malo e mafai ai ona tu’u atu pepa sala i tagata e solia le tulafono, e ala lea i le fa’aaogaina o ali’i Pulenu’u, e ui o lea talosaga na teena e le maota o sui.

 

Na faigata i le maota o sui ona toe faia se isi a latou fa’aiuga e teena ai le suiga a le maota maualuga sa pasia fa’atasi ma le latou tulafono lea ua mae’a ona pasia, ona o le utiuti o le taimi na totoe e tatau ai ona faapasia lenei tulafono.

 

Ae na taua e ni isi o afioga i Faipule e fa’apea, e le tatau ona aofia ai Pulenu’u i le lisi o Ofisa a le malo lea ua tu’u atu i ai le malosi e tu’u atu ai pepa sala i tagata, aua o lea lava o lo o manino le matafaioi a Pulenu’u e fa’atino i totonu o le tulafono.

 

Saunoa le afioga a Puleleiite T. Li’amatua e fa’apea, afai e manatu le Fono e tu’u i ai ma le Ofisa o Mataupu Tau Samoa i le lisi o Ofisa, lona uiga e tatau ona i ai se taimi e faia ai ni a’oa’oga fa’apitoa mo Pulenu’u ina ia malamalama ai i latou i auala e fa’atino ai le galuega.

 

O le lagona lava fo’i lea e tasi sa lagolagoina e le afioga i le ali’i faipule ia Faimealelei A. F. Allen i le aso Tofi na pasia ai le faitauga lona lua o le tulafono. Saunoa Faimealelei e faapea, o Ofisa ua mae’a ona tofia e le malo e tu’u atu i ai le malosi, ua i ai le tomai i a latou tagata faigaluega e fa’atino ai le galuega, ae afai e toe fa’aopoopo i ai ma Pulenu’u, o le isi lena taimi e toe alu i le tau a’oa’oina o Pulenu’u i le auala e fa’atino ai le galuega.

 

Na fa’amanino e le Komesina o Leoleo ia Save Liuato Tuitele i le aso na iloiloina ai e le maota o sui le mataupu lenei, afai e manatu le Fono e tu’u i ai ma Pulenu’u i le lisi o Ofisa a le malo e fa’amalosia le tulafono, lona uiga e tatau fo’i la ona i ai se taimi fa’apitoa e faia ai ni a’oa’oga mo Pulenuu, ina ia fa’amalamalama ia te i latou le auala e fa’atino ai le galuega mo le fa’amalosia o le tulafono.

 

E pei ona manino i le vaega 25.2207 o le Tulafono Toe Teuteu a Amerika Samoa, “o se tasi o matafaioi o le Pulenu’u o le asiasia lelei lea o itu uma o lona afioaga ma isi afioaga i lalo o lana vaaiga, ina ia usita’ia uma aiaiga e tatau ai mo le tulafono.

 

O le Pulenu’u fo’i e ia te ia le pule e tu’uaia ai soo se tasi i totonu o lana puleaga i le le usitaia o soo se aiaiga o le tulafono, poo ni tuutuuga fo’i ua uma ona pasia i lalo lava o le tulafono. Afai e leai se fa’asalaga e mafai ona fa’asala ai i totonu o tulafono faaletonu, ona fa’afesoota’i loa lea e le Pulenu’u o le Loia Sili, o ia lena e faia le gaioiga e tatau ona faia.

 

Na taua e le afioga i le To’afia ia Alo Dr. P. Stevenson, o ia o le Kovana o le Falelima i Sasa’e i le aso na molimau ai i luma o le senate e fa’atatau i le mataupu lenei, e ui o lo o taua i le tulafono le matafaioi a le Pulenu’u e tatau ona fa’atinoina, peita’i e le o manino mai ai le tu’uina atu o le malosi i le Pulenu’u na te tu’uina atu ai le pepa sala i le tagata e fa’amaonia lona solia o le tulafono o le fa’aotaota.

 

Saunoa atili le afioga a Alo e fa’apea, talu ai o Pulenu’u o lo o tu’u atu i ai le malosi i le tausiaina o tulafono i totonu o le nu’u atoa ai ma le vaavaaiga o le matagofie o afioaga ta’itasi, e tatau ai fo’i ona aofia ai ma Pulenu’u i le malosia o le tulafono i le fa’aotaota, aua o gaioiga uma nei o lo o afua mai i totonu o le nu’u.

 

O le pasia ai e le Fono Faitulafono o le pili e siitia ai tulaga mo le fa’amalosia o le tulafono o le fa’aotaota, ua sauni ai loa mo le tu’uina atu i le Ofisa o le kovana mo le sainiaina o lenei tulafono.

 

O lenei tulafono o le a taualoa i totonu o le 60 aso talu ona tuana’i le tauaofiaga a le fono faitulafono na pasia ai lenei tulafono.