O le ali’i lea na maua ua ia le usitaia tuutuuga a le fa’amasinoga sa tu’uina atu ia te ia, e fa’asa ai o ia ona ia toe ulufale mai i Amerika Samoa i totonu o le 7 tausaga o lana fa’asalaga fa’anofovaavaaia, ua poloaina e le fa’amasinoga maualuga lona tuliina o masina e 22 o lo o totoe mai lana fa’asalaga fa’a falepuipui e 28 masina, ina ua fa’amaonia lona toe ulufale fa’amalosi mai i le atunu’u.

O le ali’i o Fereti Aliva, e tolu ona igoa o lo o iloa ai o ia i fa’amaumauga a le fa’amasinoga. O isi ona igoa e aofia ai Fereti Loua ma Loua Aliva, ma ua poloaina e le fa’amasino sili ia Michael Kruse le malo ina ia mautinoa e aofia uma i fa’amaumauga a le Ofisa o le Loia Sili fa’apea ai le Ofisa o Femalagaaiga igoa uma e 3 e pei ona iloa ai le ua molia, ina ia mautinoa e le toe misi lona igoa i soo se taimi e maua ai i fa’amaumauga a le Ofisa o Femalagaaiga.

O le aso Faraile o le vaiaso nei na fa’atulaga e tu’uina atu ai le fa’asalaga a le fa’amasinoga fa’asaga ia Fereti, ina ua fa’amaonia e le fa’amasinoga tu’uaiga fa’asaga ia te ia, o lona le usitaia lea i tuutuuga o lana nofovaavaaia sa tu’uina atu e le fa’amasinoga i le 2010, e fa’asa ai ona ia toe ulufale mai i Amerika Samoa mo le 7 tausaga, ina ua ta’usala o ia e le fa’amasinoga i le moliaga o le talepe fale.

O le masina o Setema o le tausaga nei na maua ai e le Ofisa Fa’anofovaavaaia se fa’amatalaga e fa’atatau ia Fereti lea ua i toe ulufale mai i le atunu’u, ma latou talosagaina ai loa le fa’amasinoga mo sana poloaiga e fa’aleaoga ai tuutuuga o le nofovaavaaia a le ua molia, atoa ai ma le toe taofia o ia i le toese i Tafuna.

Na fa’aalia atili i fa’amaumauga a le Ofisa Faanofovaavaaia e fa’apea, ina ua ta’usala e le fa’amasinoga ia Fereti i le moliaga o le talepe fale i le tulaga muamua i le 2010, sa poloaina ai loa le faanofovaavaaia o ia mo le 7 tausaga i lalo o poloaiga e ao ona ia usita’i i ai.

O ni isi o tuutuuga o ia poloaiga a le fa’amasinoga e aofia ai lona tuliina o masina e 28 i le falepuipui, peita’i na manatu le fa’amasinoga e lava na o masina e 6 e taofia e Fereti, ae o masina e 22 o le a totoe ai, o le a fa’amalumalu lona tuliina, ae o le a poloaina o ia na te tuua le atunu’u ma toe fo’i atu ai i lona atunu’u o Samoa, e le fa’atagaina ona ia toe ulufale mai i le atunu’u mo le umi e 7 tausaga o lana nofovaavaaia.

Na faatoese Fereti i luma o le fa’amasinoga maualuga e tusa ai o lona le usitaia o tuutuuga o lana nofovaavaaia, e ala i lona toe ulufale mai i le teritori. E le gata sa ia talosagaina se fa’asalaga mama mo ia, ae sa ia talosagaina fo’i le fa’amasinoga mo se avanoa se’i toe fo’i atu ai i tua i lona aiga e tausi lona to’alua ma lana fanau, o ona matua aemaise ai le afioaga ma le Ekalesia.

Na talosagaina fo’i e le ali’i loia ia Douglas Fiaui sa tula’i mo Fereti le fa’amasinoga mo se fa’asalaga mama mo lenei ali’i, ina ia maua ai le avanoa e toe fo’i atu ai i tua e fa’aauau lana tausiga i lana fanau ma lona aiga.

Na taua atili e Fiaui e fa’apea, e tusa ai o le la talanoaga ma Fereti na fa’ailoa atu ai e le ua molia ia te ia e fa’apea, sa i ai lona manatu e 5 tausaga le umi o lana fa’asalaga fa’anofovaavaaia, o le mafu’aaga fo’i lena na ala ai ona ia toe ulufale mai i le atunu’u, ona o lea ua ia mautinoa ua mae’a tausaga o lana nofovaavaaia.

I le mae’a ai o le talosaga a Fiaui i le fa’amasinoga mo se fa’asalaga mama mo Fereti, na ia fa’asaga atu ai loa ma lafo le mafua’aga o le fa’afitauli i le malo ma le Ofisa o Femalagaaiga, i le le fa’atinoina lea o a latou tiute e ala i le puipuia o le toe ulufale mai o tagata ua mae’a ona poloaina e fa’asa ona toe ulufale mai i le atunu’u.

Saunoa atili Fiaui e fa’apea, e le o se taimi muamua lenei ua tula’i mai ai lenei fa’afitauli i le atunu’u, o le maua lea e le malo o se tagata sa toe fa’afo’i e le fa’amasinoga i lona atunu’u o lo o fealua’i sa’oloto i laufanua na fa’asa e le fa’amasinoga o ia ona toe tuvae mai ai.

Na finau fo’i Fiaui e fa’apea, o le tiute o le malo aemaise lava le Ofisa o Femalagaaiga, ia galulue fa’amaoni i le fa’amalosia o tulafono tau i le puipuiga o laina tuaoi a le atunu’u, ina ia mautinoa e le toe ulufale mai i totonu o le atunu’u tagata e pei o Fereti ua mae’a ona poloaina e le fa’amasinoga e aua ne’i toe ulufale mai mo le umi e 7 tausaga.

E fetaui le mae’a o le fa’afinauga a Fiaui ua sauni le fa’amasino e tu’u atu le avanoa i le loia a le malo ia Jerard Murphy mo lana fa’afinauga, ae fa’afuase’i loa ona tatagi le telefoni a se tasi o tagata sa i totonu o le potu fa’amasino, ma fa’atonu ai loa e Kruse le Masela a le fa’amasinoga ia Michael Nix ina ia aveese mai le telefoni sa tatagi, ma ia fa’atonuina ai loa le tagata e ana le telefoni ina ia totogi muamua le $25 i le Failautusi o le fa’amasinoga ona fa’atoa mafai lea ona toe fa’afo’i atu lana telefoni.

I le fa’afinauga a Murphy, sa ia finau ai i le fa’amasinoga ina ia fa’asala Fereti i se fa’asalaga talafeagai, ona o lea ua fa’amaonia lona le usitaia o tuutuuga a le fa’amasinoga sa tu’uina atu ia te ia, e fa’asa ai ona ia toe ulufale mai i le atunu’u mo le 7 tausaga.

Ae i le tu’uaiga a Fiaui e fa’atatau i le fa’atamala lea o le malo aemaise lava i le Ofisa o Femalagaaiga i le fa’amalosia o le tulafono atoa ai ma poloaiga a le fa’amasinoga, na taua ai e Murphy e fa’apea, e ui na te le o manino lelei pe na fa’apefea ona maua e Leoleo ia Fereti ua toe i ai o ia i le atunu’u, peita’i o le itu e tatau ona malamalama i ai le fa’amasinoga, e ui o le Ofisa o Femalagaaiga e gafa ma le fa’amalosia o tulafono tau i femalagaaiga, peita’i e le o se tiute o le malo le alu e taofi le tagata mai lona taumafai e toe ulufale fa’amalosi mai i le teritori.

I le mae’a ai ona iloilo e ali’i fa’amasino o fa’afinauga a loia atoa ai ma le fa’atoesega a Fereti e uiga i lenei mataupu, na saunoa ai loa Kruse e fa’apea, o le fa’asalaga fa’a falepuipui e 28 lea na fa’asala ai e le fa’amasinoga ia Fereti, lea na poloaina ai loa o ia e tuli na o masina e 6 ae fa’amalumalu masina e 22 o lo o totoe ai, ua poloaina nei Fereti ina ia tuliina fa’amae’a masina e 22 o lo o totoe o lana fa’asalaga sa tu’uina atu e le fa’amasinoga.

Afai ae mae’a ona tuli masina e 22 o lo o totoe o lana fa’asalaga i le falepuipui, ona ia tuua loa lea o le atunu’u, ua fa’asa ona toe ulufale mai i totonu o le atunu’u se’i vagana ua mae’a tausaga o lana faanofovaavaaia.

Ua poloaina fo’i e Kruse ia Murphy ina ia tu’u atu se kopi o le poloaiga ma le fa’aiuga a le fa’amasinoga i le Loia Sili a le malo, fa’apea ai ma se kopi i le Ofisa o Femalagaaiga, ina ia latou malamalama ai i fa’aiuga a le fa’amasinoga.

O le afioga i le ali’i fa’amasino ia Fa’amausili Pomele ma Tunupopo Faleafaga na lagolago i le afioga a Kruse i le tu’uina atu o lenei fa’aiuga.