Ads by Google Ads by Google

Faataoto e le ali’i Kovna lu’itau mo tupulaga talavou a AS


Fanau aoga mai le polokalame o le JROTC a aoga maualuluga i le atunu’u i le fa’amanatuina o le 118 tausaga o le fu’a a Amerika Samoa i lenei tausaga. [ata AF]
ausage@samoanews.com

Na fa’ataoto e le afioga i le ali’i Kovana ia Lolo Matalasi Moliga lu’itau mo Tupulaga o Amerika Samoa, i auala e ao ona ui ma ola ai ao tuputupu a’e o latou olaga i totonu o aiga ma le atunu’u.

 

“O outou o tupulaga o le lumana’i o Amerika Samoa, e tatau fo’i ona outou fa’alogo i le fa’asinomaga e tuuina atu e o outou matua, aua o le auala lena e manuia ai o outou olaga”.

 

Na faafeiloaia e Lolo sui o malo o le Pasefika atoa ai ma sui o vaega eseese o le malo o Amerika sa auai i le molimauina o lenei fa’amoemoe taua mo le atunu’u.

 

Na faapitoa lana faafeiloaiga i le sui Failautusi o le Initeria i atumotu o le Pasefika, susuga Doug Domenech, o ia fo’i lea sa saunoa i le saunoaga faapitoa o le aso. Saunoa Lolo e fa’apea, o le auai mai o le susuga Domenech, o se ata vaaia lea e atagia mai ai le naunautaiga e galulue faatasi pea le Vaega a le Initeria, o sui lea o le malo tele ma Amerika Samoa.

 

Sa ia faafetaia aloaia foi le peresetene o Amerika ia Donald Trump mo le tali sapaia o le talosaga a Amerika Samoa, mo se fesoasoani mo tagata Amerka Samoa ina ua mae’a le ‘afa o Gita na a’afia ai le atunu’u.

 

I lona talanoa ai i le autu o le fu’a o lenei tausaga, “Tupulaga o le Lumana’i mo Taeao”, na fa’amamafa ai e le ali’i Kovana i lana saunoaga le taua o le soifuaga fa’a tupulaga talavou i le atunu’u.

 

“O outou o le lumana’i o aiga ma le malo, e le tatau fo’i ona outou manatu fa’atauva’a i le fa’atuatuaga ua tuuina atu ia te outou, tou te fa’atinoina ai mea lelei mo lo outou lumana’i manuia, e ala i le fesoasoani atu a matua ma ta’ita’i o le malo”.

 

I le saunoaga a le susuga Domenech, sa ia taua ai lana avanatau o lo o i ai, o le fa’aauau pea lea ona galulue soosoo tauau o Amerika Samoa ma le malo tele o Amerika, ina ia fausia pea lea sootaga ina ia mausali atili.

 

Na ia momoli aloaia mai mo Amerika Samoa alofaaga mai le alii perestene ia Trump, atoa ai ma le Failautusi o le Initeria, susuga Ryan Zinke. Sa ia taua le tumau pea o le lagolagoina malosi e Trump ma Zinke o le tautua ma le sootaga ma Amerika Samoa e le mafai ona ta’umaualaloina.

 

Sa ia taua le matagofie o le fa’agasoloina o le polokalame o le fu’a a le atunu’u, atoa ai ma le mataina o le felanulanua’i o teuga ma foliga vaaia i vaega eseese o le malae i Lupelele.

 

Sa ia faafetaia foi le tautua a ni isi o alo o Amerika Samoa o lo o galulue pea mo le Initeria, e pei o le susuga a Nikolao Pula, o ia lea o le Fa’atonu o le Ofisa mo mataupu tau i atumotu o le pasefika, ma le faletua ia Lydia Faleafine-Nomura o le sui o le Initeria o lo o galue i Amerika Samoa.

 

Sa ia taua le i ai fo’i o lu’ita o lo o fetaia’i ma teritori o Amerika e pei o tulaga i atina’e o aoga, tamaoaiga, soifua maloloina, puipuiga o le saogalemu, atoa ai ma tulaga i atina’e tetele. O se tasi o itu sa ia taua, o le fa’alavelave fa’alenatura e pei ona aafia ai ni isi o teritori o le malo tele e pei o le motu o US Virgin Island ma Puerto Rico, aemaise ai Amerika Samoa lea na a’afia i le ‘afa o Gita i le tausaga nei.

 

Sa ia taua le fa’agaeetia o lona loto i le tulaga mataina sa i ai glauega fai paaga a le malo o Amerika Samoa ma le vaega a le FEMA mai le malo tele, lea sa galulue i le ofoina atu lea o fesoasoani mo tagatanu’u na aafia i le ‘afa o Gita.

 

Na taua e le ali’i sui Failautusi lagona fiafia ma le fa’agaeetia, i le naunau pea o Amerika Samoa e fa’aauau le sootaga atoa ai ma le avea pea o i latou ma totino o le malo tele o Amerika.

 

Na ia faafetaia le avanoa maualuga na feiloa’i ai ma ta’ita’i o le malo ma le atunu’u, atoa ai ma le masani a Samoa i lana talimalo, e pei ona i ai taumafa eseese ua manaia i lana tofo.

 

E le i malama lelei le taeao ananafi ae ua fa’atumulia le malae i Lupelele i le mamalu o le atunu’u, o faalapotopotoga, aoga, matagaluega a le malo, aemaise ai malo mai fafo ma le mamalu o le au valaaulia, na faamalo’ulo’u atu e molimauina le fa’amanatuina o le 118 tausaga talu ona sisi le tagavai o Amerika i totonu o laufanua o Amerika Samoa.

 

Na tatala le polokalame i le sauniga lotu na saunia e Rev. Leitualasa Malieitulua, o le Ekalesia EFKAS mai Nu’uuli. I lana upu fa’amalosi mo tupulaga, sa ia taua ai le i ai o lu’itau ma fa’afitauli e ao lava i le atunu’u ma ona tagata ona latou taumafai e foia i a latou lava auala masani.

 

Na taua e le ali’i Faifeau le to’atele o tupulaga ua leiloa o latou ala ma ua pauu atu i faaosoosoga eseese o le lalolagi. Sa ia taua, o ia fa’afitauli e le gata e patino i le malo ae aofia ai fo’i ma vaega eseese i totonu o le atunu’u, ma o tulaga ia e ao ona galulue tagata uma ina ia foia.

 

“O le tatou avanoa lelei lenei e galulue faatasi ai e faailoa lo tatou ola fa’atuatua ina ia saiilia ai auala e foia ai faafitauli o loo aafia ai tupulaga. O le avanoa lelei lenei e fa’ailoa ai i a tatou fanau poo le a tonu le uiga o le ola fa’atuatua ina ia mafai ai ona avea i latou ma ta’ita’i lelei mo aiga ma le malo i le lumana’i”, o lana saunoaga lea.

 

I le faaiuga o upu fa’amalosi a le ali’i Faifeau, sa ia fa’atula’i ai se lu’itau mo tupulaga, ina ia pu’epu’e maua aoaoga lelei o lo o maua mai i ta’ita’i o afioaga, nu’u ma aiga, aemaise ai fautuaga e maua mai i ta’ita’i o le malo, ina ia fai ma oso o le latou savaliga i le lumana’i.