Ads by Google Ads by Google

Fa’ataua auaunaga e tete’e i sauaga tau feusua’iga


Le tina sa molimau e fa’ailo le tiga ma le matuitui na oo i le lotoifale o lona aiga, ua maumau ai ma le ola o si ana tama, ona ua manatu tasi o ia, “Ua mafua nei mea uma ua oo i le matou aiga, ona o a’u!” Peita’i o le talavou i le ata, sa ia fa’ailoa uma mea e 10 e ao ina maua’a i le mafaufau o so’o se talavou tama’ita’i, e nofouta ai, ia le o’o ia te ia afaina tau le sauaga le fa’atuaoia. [ata: Leua Aiono Frost]

O se va’aiga i nisi fo’i o le aofia sa auai i le taeao ananafi e fa’afofogaina folasaga lautogia o le fa’amoemoe e fa’ataua ai galuega e tete’e atu i le sauaga le fa’atuaoia o fanauiti i totonu o aiga ma isi lava fa’apotoptoga e auai atu i ai. [ata: Leua Aiono Frost]

Ua amata se taumafaiga fou ina ia fa’ataua auaunaga o lo’o so’ofa’atasi ia tete’e ma tauivi e tineia le fa’ataumaoia o fanauiti e ala i feusua’iga le fa’atuao’ia.

 

O le ulua’i sauniga i le Potu Fono o le Ofisa o Mataupu Tau Samoa ina ia maua mai le isi so’otaga i pulenu’u ma leoleo o afioaga ta’tasi, aua e ao lava ina matua va’ai toto’a i totonu o tatou aiga i totonu o afio’aga ta’itasi o le atunu’u atoa.

 

I lafoga a sui fa’apitoa e ave fe’au mo le malo i ana auaunaga o lo’o fa’atautaia pea ina ia maua’a galuega e tineia ai le fa’ataumaoia o fanau i totonu o aiga, a’oga, po’o nisi lava fa’apotopotoga e auai i ai, fa’apea fo’i ma isi sui ua latou taumafai a’ia’i ina ia maua mai i latou ua faia nei uiga mataga i fanauiti, ma ia fa’asalaina e tusa o le solitulafono ua latou faia, tainane fo’i o Auauna a le Atua ua fautuaina nei uiga ma amioga ina ia taofia, ua autasia uma, ina ia tutu fa’atasi auaunaga uma, ia malosi ona tete’e i fa’asauaga eseese ua a’afia ai fanauiti.

 

“O le a sou lagona pe afai e te iloa lelei se tasi o lou aiga, ua ia fa’amalosia sou tuafafine poo lou lava afafine? E matua tuga le lagona ootia i lou fatu le matuitui. E faigata ona e maua’a i le onosa’i mai le toe taui atu i se isi mea matuia e te faia i lena lava sui o le tou lava aiga,” o se tasi lea o fesili sa folasia mai e le Loia Sili a le malo, Talauega Eleasalo Ale i le mamalu sa aofia i le taeao ananafi.

 

Ua ia saunoa, ina ia tau malamalama ai, pe aisea lava e fa’alafi pe natia ai fa’afatualavai e nisi o tagata matutua o aiga, ni fa’aletonu fa’apenei pe a o’o ina a’afia ai tama matutua ma fanauiti i totonu o le li’o o le latou lava aiga.

 

Sa ia fa’ailoa mai, “O se solitulafono lou fa’alafi pe natia o se ituaiga mea fa’apea e tula’i mai i totonu o lou aiga, ae ua mae’a ona fa’ailoa atu e le teineititi ia te oe, o lo’o sauaina tau feusua’iga le fa’atuaoia o ia e se tasi lava o le tou aiga.”

 

“O nei ituaiga o soligatulafono, ua a’afia ai nisi e matua pele ia i tatou uma, e maofa ai le agaga, pe aisea lava! Ae ou te fai atu, ua pa’u’u ai nisi o Fa’afeagaiga Taulagi, nisi o tama faia’oga, nisi o tama matutua e faatuatuaina i totonu o aiga, nu’u ma Ekalesia. E le tatau na natia, ae tatau ona molia i le tulafono, ae le’i toe afaina nisi mulimuli ane,” sana tima’i lea i le aofia.

 

Mai le fa’atina o le atunu’u, le faletua o le Kovana, Cynthia Malala Moliga sa ia fa’ailoa mai ai, “E ao ina matua lava ma totoe fa’amaumauga uma, o i latou e mana’omia le auaunaga, e ao fo’i ina matua fa’amaoni i fa’amaumauga ina ia fa’amautuina le ala o fesoasoani mo le fanau i le lumana’i.”

 

O lenei tina o le atunu’u, e tusa o le 30 tausaga talu ai, sa auai ai i le vaega o i latou e fa’atautaia galuega fesoasoani mo le fanau ua fa’ataumaoia e ala i feusua’iga le fa’atuaoia, i latou ua sauaina, ma fanau ua le mautonu ua tau sailia aiga e nonofo ai.

 

“O lena vaitau sa tau feula le motumotu o le auaunaga, ae le mafai sa mumu loto o i matou e to’agaogao sa fa’atinoa galuega tima’i, taumafaiga e fa’ao’o atu se fesoasoani, atoa ai ma le taumafaiga e fa’atula’ia nofoaga e tausia fa’apitoa ai tina ma fanau ua sauaina i totonu o latou aiga.”

 

“Fa’afetai ia te outou i le maua’a pea o la outou taumafaiga, lele ua sailimalo ma ua maua, ua lautele le tautua, ma ua fa’amauina fo’i fa’amaumauga uma e agava’a ai i tatou i fesoasoani mai le malo tele.”

 

Na i ai fo’i se sui sa vala’auina mo se tautinoga fa’apitoa e fa’ailoa mai ai le afaina o se tasi o le fanau teine, ma ua i’u ai ina pule o ia i lona lava ola, ona ua manatu le teineitiiti, o ia ua mafua ai ona loka lona tama matua. O ia foi ua ala ai ona fa’amaina lona aiga, ua mafua ai fo’i ona faifai mai tagata i lona aiga.

 

“O uiga uma na, e ao ina matua tineia mai ia i latou na afaina i nei solitulafono matuia. A tele lima, ua mama se avega. Ia i ai se isi leo fa’aopoopo ina ia tima’ia le fanau talavou ina ia iloa fesaosoani e ao ina latou maua i vaitau uiga o le olaga. Ia e talanoa atu i se tasi, ia oo mai ai lou fesoasoani.”

 

Sa tutuina le moliga’o fa’apitoa a’o laulaututu le to’atele na aofia, ina ia tuuina atu le agaga o lenei alo tama’ita’i talavou i le Atua ina ia alofagia. E le gata i lea, ae o nisi fo’i o lo’o mana’omia se fesoasoani, ina ia tula’i mai, malosi le loto e fa’ailoa mai lona pagatia o i ai. O lo ua avea fo’i o se fa’amalosi’au i le to’atele o galulue i vaega ta’itasi o tautuaina nei sui, ina ia fa’amalolosi ma tausisi i le mau - Ia fa’amalosia atili Aiga.

 

O le fe’au fo’i na fa’amalosi mai ai le Auauna ale Atua Patele Eneliko Auva’a, sa ia timai i le aufaigaluega faufautua ma i latou fo’i e aga atu e fesoasoani mo sui a’afia, “Afai ae lutaluta le tai, ma ua o’op’o puapuaga mamafatu fa’apenei i alo ma fanauiti, ia fa’amumu atili le Lamepa ma tu’u atu i le Atua i talosaga, aua e mautinoa ma fa’amaoni lona fesoasoani mai.”

 

O lenei fa’atasiga ma le fa’ataua amata o lenei masina, sa fa’atautaia lea e le American Samoa Alliance e Fa’amalosia Aiga fa’atasi ai ma le Vaega o Tautua mo Fanauiti a le DHSS.

 

E le gata ina fa’ataua fa’asauaga fa’aleituaiga i lenei masina, ae ua fa’apea fo’i ona fa’ataua ai Kanesa o le Susu, Sauaga o Fanau, Fa’ataua ai Aia Tatau a Sui ua A’afia, Fa’ataua fo’i Tautua e tete’e atu i Gasegase e afua i Feusua’iga le Tatau.