Ads by Google Ads by Google

Fa’amalosia pea tulafono i ta’avale ma meatotino a le malo

ausage@samoanews.com

O le ulua’i fonotaga a le afioga i le ali’i kovana ia Lolo Matalasi Moliga ma lana kapeneta i le vaiaso na te’a nei, na toe fa’amanatu ai e le ta’ita’i o le atunu’u i afioga i Fa’atonusili o Matagaluega ma Ofisa ta’itasi a le malo, le fa’amalosia pea lea e le faigamalo o tulafono e puipuia ai ana meatotino e pei o ta’avale, aemaise ai o le tatau lea ona iloa tonu le aofa’i o meatotino a le malo o loo i ai mo ana fa’amaumauga.

 

O se tusi na sainia e le ali’i kovana i le aso 27 Ianuari 2017 ma tufatufa atu i Fa’atonusili o Matagaluega ma Ofisa eseese a le malo, sa ia toe fa’amanatu atu ai lenei mataupu taua, ina ia mautinoa e i ai ni fa’amaumauga mo ta’avale uma a le malo o loo i ai i matagaluega eseese, e le gata i ta’avale o loo lelei ae aofia ai ma ta’avale o loo tutu solo i fale inisinia tua, ina ia aofia uma i le faitauina o meatotino a le malo.

 

“O le aofia ai i le lisi o ta’avale ma meatotino a le malo o ta’avale o loo tutu i fale inisinia aemaise ai ta’avale le Ofisa o Ta’avale Afi a le malo i Tafuna, le OMV, o le a atagia mai ai le atoatoa faapea ai ma le fa’amaoni o fa’amaumauga ua outou tu’uina mai, e tusa ai o le fa’aalia o tulaga fa’amaoni i le lisiina lea o meatotino a le malo o loo i ai”, o se vaega lea o le tusi a le ali’i kovana.

 

E ese mai i le taumafai e fa’amaopoopo meatotino a le malo, sa toe fa’amanatu fo’i e le ali’i kovana i le kapeneta le tulafono lea ua mae’a ona fa’amamaluina, e fa’asa ai ona toe ave ta’avale a le malo i tua i aiga, se’i vagana ai ta’avale a Faatonusili atoa ai ma ta’avale ua tu’u atu i ai le pemita e fa’ataga ai ona fa’aaoga i le mae’a ai o taimi faigaluega, fa’apea ai fo’i ma le aveesea lea o pepa iila uli o loo fa’apogisa ai tioata o ta’avale a le malo.

 

“E leai se mafua’aga e te tago ai fua oe le Fa’atonu ma fa’apogisa tioata o ta’avale a le malo o loo outou feoa’i ai, e le tatau ona tula’i mai lena tulaga, tago lava oe e fa’apogisa lau ta’avale, ae aua e te faia faapena i ta’avale a le malo”, o le fautuaga lea a Lolo i lana kapeneta i le aso Faraile na te’a nei.

 

Sa ia taua atili fo’i e fa’apea, o lo o i ai pea lava ripoti o loo tu’uina atu i lona Ofisa e fa’atatau i tagata o aiga o loo aveina ta’avale a le malo, atoa ai ma isi tagata e le o fa’atagaina ona feoa’i i ta’avale a le malo.

 

I le taimi o folafolaga mo le kapeneta, na toe fa’amalosia ai e le Ta’ita’i o le Ofisa a le Kovana ia Fiu Saelua le mataupu lava lenei e fa’atatau i le tulafono i ta’avale a le malo.

 

Saunoa Fiu e fa’apea, o loo fia maimoa atu le atunu’u i totonu o ta’avale a le malo o loo feoa’i i luga o le alatele a le malo, po o ai o loo feoa’i atu ai i ta’avale, o le mafua’aga lena e le tatau ai ona fa’apogisa ni tioata o ta’avale a le malo.

 

O lo o maitauina pea e le Samoa News i afiafi o aso ta’ita’i le galulue o le Masela o le Auala ua mae’a ona tofia e le Kovana ma lana aufaigaluega, latou te fa’amalosia le tulafono e fa’asa ai ona toe ave e tagata faigaluega a le malo i tua ta’avale a le malo, ina ia mautinoa o loo mulimulita’i ma usita’i tagata i le tulafono ua mae’a ona fa’amalosia.