Ads by Google Ads by Google

Fa’aitiitia itula tagata faigaluega Fono ae le o aofia ai Senatoa ma Faipule


Ta’ita’i o le Fono Faitulafono ma ni isi o le aufaigaluega i le savali mo le aso e fa’ataua ai tagata faigaluega i le atunu’u i le tausaga na te’a nei i le stadium i Tafuna. [ata AF]
ausage@samoanews.com

O le vaiaso nei lea ua aloaia ai le amata fa’aitiitia o itula faigaluega a tagata faigaluega uma a le Fono Faitulafono, mai le 80 itula i le 70 itula faigaluega i totonu o le piriota totogi a le malo, ona o le naunau lava o ta’ita’i o le Fono e tu’u atu le tauau e lagolago ai i le gaioiga lea ua faia e le malo, o le fa’aitiitia lea o itula a tagata faigaluega uma a le malo, e tau fesoasoani ai i le fa’afitauli tau tupe lea ua fetaia’i ma le malo i le taimi nei.

 

O le vaiaso na te’a nei na faia ai se fonotaga a ta’ita’i o le fono ma le aufaigaluega e tusa ai o lenei mataupu, na aloaia ai loa le amata fa’aitiitia lea o itula faigaluega a le fono ina ia mafai ai ona tali atu i lenei manaoga, ma pasia ai loa le amata fa’aitiitia o itula a tagata faigaluega uma a le fono i le taeao ananafi.

 

E pei ona manino i saunoaga a ta’ita’i o le Fono Faitulafono i le vaiaso nei, o le fa’aiuga e fa’aitiitia ai itula ma totogi o tagata faigaluega a le Fono, o le a le aofia ai totogi o afioga i Senatoa ma Faipule, ona o a latou totogi lea ua mae’a ona fa’atulaga mai e le tulafono.

 

Ae pei ona manino i le saunoaga a le afioga i le ali’i kovana i le ulua’i taimi na fa’alauiloa mai ai lenei fuafuaga, e ui ua mae’a ona fa’atulafono totogi o le kovana ma le lutena kovana, o lo o aofia ai fo’i ma o la totogi i le suiga lea ua faia e le malo.

 

O le afioga i le ali’i senatoa ia Nuanuaolefeagaiga S. Nua na tula’i ma fesiligia le mataupu lenei i luma o le senate i le vaiaso na te’a nei, ina ua fesiligia e ni isi o afioga i senatoa le mataupu e fa’atatau i le fa’aitiitia lea o itula faigaluega a le malo.

 

Ae na saunoa le afioga i le ali’i senatoa ia Faiivae Godinet e fa’apea, o se tulaga lelei pe afai e aofia ai ma totogi o senatoa ma faipule i le tulaga e pei ona amata mai e le malo, ina ia fai ai fo’i ma sao o le Fono i le tulaga pagatia ua fetaia’i ma le faigamalo.

 

“Ou te talosaga atu pe mafai ona aveese nai a tatou itula, o se tulaga fo’i lena e ta’uleleia ai le maota i le vaavaai mai a le faigamalo ma le atunu’u, o lo o tatou lagolagosua atu i le manaoga e pei ona tula’i mai, ae le o se fuafuaga fo’i e umi se taimi e fa’atinoina ai”, o le saunoaga lea a Faiivae na lagolagoina e le afioga a Tuiagamoa Tavai.

 

Saunoa Tuiagamoa e fa’apea, e le afaina ia te ia le fa’aitiitia o totogi a le fono e fesoasoani ai i le malo, pau le tulaga ua fa’ateia ai o ia, o le fa’afuase’i lea ona tutupu o nei suiga e aunoa ma le logoina o le fono ina ia maua ai le avanoa e lalafo i ai afioga i senatoa ma faipue.

 

Saunoa le afioga i le ali’i peresetene o le senate ia Gaoteote Palaie Tofau e fa’apea, o se latou fonotaga ma le afioga i le ali’i kovana ia Lolo Matalasi Moliga i le vaiaso na te’a nei, na latou fa’asoa ai ma le ta’ita’i o le atunu’u e uiga i lenei mataupu, e ala lea i le fa’aitiitia o itula faigaluega a tagata faigaluega, ae aua ne’i faia se faaiuga e vaea ai tagata faigaluega mai a latou galuega.

 

Na fa’afetaia e le peresetene afioga i senatoa ua fa’aalia lo latou naunau e fa’aitiitia ai ma totogi o senatoa ma faipule, peita’i sa ia fa’amanatu i ai e fa’apea, o totogi o senatoa ma faipule, o totogi ua mae’a ona fa’atulafono, e leai fo’i se malosi e mafai ai ona toe aveese mai ia totogi.

 

Sa ia fa’apupula atili e fa’apea, o lo o silafia e le kovana, e le au mai le malosi o le faigamalo i le Fono Faitulafono i tulaga o mataupu fa’apenei, ona o le Fono o le isi lea Vaega Tumaoti e 3 i ai Vaega Tumaoti o le malo.

 

Na fautuaina e le afioga a Magalei Logovi’i le maota ina ia fesiligia le teutupe e tusa ai o le tulafono i tulaga tau paketi, aemaise lava pe afai ua tula’i mai se tulaga fa’aletonu, e i ai le malosi o le kovana na te toe tauaaoina mai ai i luma o le Fono Faitulafono se pili e toe faia ai teuteuga i le tulafono o le paketi ua mae’a ona pasia.

 

Na tula’i le afioga a Fonoti Aufata Tafaifa e tau fa’aleo lona lagona fa’asea i le fa’afitauli lea ua tula’i mai i le malo, lea ua mafua ai ona fa’aitiitia itula o tagata faigaluega a le malo, ae na saunoa le afioga i le ali’i sentaoa ia Tuaolo M. Fruean e fa’apea, e le toe aoga le talanoa i le fa’afitauli, ae ua mana’omia e le malo se fofo i le fa’afitauli lea ua tula’i mai.