Na fa’aaoga e le afioga i le ali’i kovana ia Lolo Matalasi Moliga le avanoa sa ia maua i le taimi o le sauniga lea sa faia i luga o lona Ofisa, e taualoa ai le tautua a ni isi o tagata faigaluega a le Matagaluega o Uafu ma Malaeva’alele e fa’aleo ai lana fa’afetai i tagata faigaluega uma a le malo o lo o galulue e fa’atino galuega lelei mo le manuia o le atunu’u.

“E ui o le aso lenei e faapitoa mo ni isi o tagata faigaluega a le Ofisa o Uafu ma Malaeva’alele, ae ua ou manatu e fa’aleo atu ai ma le agaga fa’afetai i tagata faigaluega uma a le malo, o loo galulue ma fa’atino galuega mo le manuia o le atunu’u atoa”, o le saunoaga lea a le ali’i kovana.

“E le o lava tupe e maua e le malo e taui atu ai lo outou afu sisina, ae o a uma tupe o loo maua o loo taumafai pea le malo e fa’asoasoa atu mo outou tagata faigaluega”, o le saunoaga lea a le ali’i kovana.

Mo tagata faigaluega a le Matagaluega o Uafu ma Malaeva’alele e pei ona autu i ai le saunoaga a le alii kovana, sa ia fa’afetaia ai i latou e tusa ai o galuega lelei o loo latou fa’atinoina i le puipuia lea atoa ai ma le vaai lelei o meatotino a le malo o loo maua mai ai lona tamaoaiga.

“E le faigofie la outou galuega o lo o fa’atinoina i le aso ma le po, i le vaavaaia lea meatotino uma o loo ulufale mai i le atunu’u e maua ai tupe a le malo”, o le saunoaga lea a le ali’i kovana.

“Ia outou silafia, e taua tele la outou galuega o loo fa’atinoina i le taimi nei, ona o iina o loo maua mai ai tupe o loo fa’alagolago i ai le tamaoaiga o le malo, afai la e fa’aletonu la outou tautua ua fa’aletonu fo’i tupe maua ma le tamaoaiga o le malo, ae a lelei ma fa’amaoni outou i le fa’atinoina o a outou tiute, o le a malosi fo’i ma manuia le malo i le itu tau tupe”, o le saunoaga lea a Lolo.

“Ou te iloa e le o totogi le mafua’aga ua outou fa’atinoina ai nei mau galuega lelei i tausaga e tele sa outou galulue mai ai, ae o loo outou faia ona o lo outou naunau e tautua Amerika Samoa lo outou atunu’u pele”.

Na fa’amalulu le ali’i kovana i tagata faigaluega pe afai e i ai se taimi e fa’aletonu ai le taitaiga a i latou ua avea ma ta’ita’i. Sa ia taua e fa’apea, e le mafai lava ona maua se atoatoa i lenei olaga, se’i vagana ua oo uma tagata soifua i le lagi, ona fa’atoa maua lea iina o le mea atoa.

I le fonotaga a le kapeneta i le taeao ananafi, na toe fa’ataua ai e le ali’i kovana i lana saunoaga le taua tele o le galulue fa’atasi o Fa’atonusili ma tagata faigaluega a matagaluega ma ofisa eseese uma a le malo, i le fa’atinoina lea o galuega mo le manuia o le atunu’u.

Sa ia taua e fa’apea, e le mafai ona fa’amalieina e le malo se vaega toaititi, ae mafai pe afai e galulue fa’atasi le ta’ita’i ma lana aufaigaluega i le fa’atinoina o galuega.

“E le iloa atu e le ta’ita’i tulaga o loo fa’aletonu i le galuega, ae mafai ona iloa atu e tagata faigaluega, o le mafua’aga lena e taua ai le lelei o le sootaga i le va o le ta’ita’i ma lana aufaigaluega i le fa’atinoina o galuega i aso ta’itasi, ona mafai ai loa lea iina ona fa’amalieina le atunu’u atoa”, o le saunoaga lea a le ali’i kovana.