Ads by Google Ads by Google

Fa’afetaia fa’apitoa e le malo le sao o Pisinisi tua i ana atina’e eseese


Sui o le kamupani i’a a le StarKist Samoa i le atunu’u e pei ona i ai le Pulesili ia Sangdong Kwon ma le tofa Tautasi A. Soliai, i le taimi o le sauniga e tatala aloaia ai le galuega o le eletise e maua mai i le la i Ofu, Manu’a i le vaiaso na te’a nei. [ata AF]
ausage@samoanews.com

Na fa’aaoga e ta’ita’i o le atunu’u le avanoa na maua i le tatalaina o atina’e tetele a le malo i Ofu, Manu’a i le vaiaso na te’a nei, e fa’afetaia ai ma le loto fiafia le sao taua a pisinisi ma kamupani tua, lea o lo o fa’aauau pea ona faia mo le atina’e o le malo o Amerika Samoa i soo se vaega.

 

I le saunoaga a le afioga i le Matua ia Utu Abe Malae, le Pulesili o le Pulega o le Eletise ma le Suavai a Amerika Samoa (ASPA), i le taimi na tatala aloaia ai le galuega lea ua mafai ai ona maua le eletise mai le malosiaga o le La mo Ofu, sa ia fa’afetaia ai le sao taua a pisinisi tua o loo mafai ona fesoasoani malosi ai i soo se itu o le atina’e o le atunu’u.

 

Na ia taua i le Samoa News i se fa’atalatalanoaga puupuu i Ofu, Manu’a le tele o le sao a pisinisi ma kamupani tua mo le ASPA, aemaise lava i kamupani i’a tetele lea o loo latou fa’aaogaina se vaega tele o le eletise ma le sauvai, lea fo’i o loo maua mai ai tupe mo le ASPA fa’apea ai le malo.

 

Sa auai i sauniga e tatala aloaia ai atina’e i Manu’a i le vaiaso na te’a nei le Pulesili o le Kamupani i’a a le StarKist Samoa, susuga Sangdong Kwon, fa’apea ai ma le isi sui sinia o le kamupani, le tofa Taotasi A. Soliai lea na malaga atu e fai ma sui o le Asosi o Pisinisi i le atunu’u, lea o lo o avea ai o ia ma peresetene i le taimi nei.

 

“E le fesiligia le sao o pisinisi i le atina’e o le malo, o le pisinisi e ola fa’asoloatoa lana eletise i le aso atoa, e tele fo’i le vaega o le eletise e fa’aaoga e le pisinisi mo ana galuega, e le fa’apitoa la mo pisinisi tetele, ae o le agaga fa’afetai e fa’asafua mo pisinisi uma lava i le atunu’u, i lo latou sao atoa ai ma le lagolago mai i le galuega a le ASPA”, o le saunoaga lea a Utu i se talanoaga ma le Samoa News.

 

Ina ua fesiligia pe o le a i ai se suiga i le tupe maua a le ASPA mai pisinisi ma pili o loo totogi e le atunu’u, ona o lea o le a fa’aitiitia le tau o le eletise e ala i le fa’aaogaina o le malosiaga mai le La i se taimi o i luma, na saunoa ai Utu e fa’apea, e leai se tulaga e fa’apea o le a fa’aitiitia tupe maua, aua afai o le a laititi le suau’u e fa’atau mai e gaosi ai le eletise, lona uiga o le a laititi fo’i le tupe fa’aalu, o le a fetaui fo’i ma le tulaga lea o le a i ai le tau o le eletise ina ua mafai ona gaosi mai i le malosiaga o le La.

 

I le saunoaga fa’afetai a le ali’i kovana i le mae’a ai o sauniga e tatala ai atina’e tetele e 2 a le malo i Manu’a i le vaiaso na te’a nei, sa aofia ai i lana fa’afetai le sao taua o lo o fa’aauau pea e pisinisi ma kamupani tua i le taimi nei, lea o lo o mafai ai ona fesoasoani i le atina’e atoa ai ma le tamaoaiga o le atunu’u.

 

Na taua e le ali’i kovana ia Lolo Matalasi Moliga e fa’apea, e leai se isi atina’e e sili ona talitonuina e le malo e malosi ai lona tamaoaiga, e pei o le fa’atosina mai lea o pisinisi tetele mai fafo ina ia ulufale mai i le atunu’u ma fa’atutu ai a latou lala.

 

“O le talitonuga o le faigamalo lenei, o le olataga o le tamaoaiga o loo umia e pisinisi, a tele pisinisi ua tele fo’i le malosi o le tamaoaiga, ma maua fo’i galuega e galulue ai tagatanu’u”, o lana saunoaga lea ina ua ia taua le tatau fo’i lea ona i ai ni pisinisi e fa’atutu ma tatala i Manu’a.