Ads by Google Ads by Google

E LE O OE O SE SULI MONI

Vaega 41

 

O le taia ai o le fa’alogo a le tama’ita’i o Ianeta i le tala mata’utia lea ua salalau mai e fa’atatau i le tamaloa o Meki lea ua leai mai le potu sa taofia ai o ia, na oso ai lagona fefe ma le popole i lona loto, ina ne’i avea le fa’afitauli lea ua tula’i mai ma itu e toe suia ai le fa’aiuga a le Tupu lea ua faia mo ia, e toe fa’afo’i ai o ia i lona aiga. Na vaaia e Ianeta le pisi uma o fitafita ma auauna a le Tupu i le tau sailiina o Meki, e oo lava fo’i i auauna fa’apitoa e to’alua a le Tupu lea sa tofia la te momoliina Ianeta i le aai e fa’atali ai sona auala e toe fo’i atu ai i lona aiga, ua aofia uma ai i laua i le tau sailiina o Meki. O lagona naunau e toe fia fo’i i le aiga aemaise ai o le fia alu ese atu ma le nofoaga o loo pagatia ai tagata pologa, ua fa’atautauina nei i luga o le ea ina ua tula’i mai le fa’afitauli i le tamaloa o Meki lea ua tau sailia pe na fa’afefea ona aveese mai totonu o le nofoaga sa taofia ai. O le fiu o le tama’ita’i o Ianeta e fa’atalitali le toe fo’i ane o auauna a le Tupu mo le momoliina atu o ia i lona aiga, na fa’afuase’i ai ona fa’agaulua i luga o lona moega ma i’u ina toe moe gase atu ai loa, ae na fa’ateia o ia ina ua ia fa’alogoina le tu’itu’i atu o se tagata i le faitoto’a o lona potu, ma ia iloa ai, o auauna e to’alua a le Tupu lea ua aga’i atu.

 

“Ianeta, ua tatau loa ona la’u mai au ato fa’atasi ai ma au meatotino uma i totonu o le ta’avale, o le a tatou malaga e toe momoli atu oe i lou aiga”, o le fa’amatalaga lea a le isi auauna na lagona ai le fiafia o le tama’ita’i, peita’i o le itu na toe oso ai le popole o lona loto, ona o lea ua ia vaaia le malu ifo o le afiafi, ua aga’i atu fo’i le la i lona nofoaga masani, ao lea ua sauni la latou malaga mo le toe momoliina atu o ia i lona aiga. Ua aga’i ese atu le malaga mai le totonu o le malo o le tamaloa o Eteuati II, ma o ni lagona fa’agalo gata i le tama’ita’i tausaga e 5 lea sa nofo pologa ma aumau ai i totonu o le malo, ao lea ua toe maua lona saolotoga e toe fo’i atu ai i lona aiga, peita’i o le fesili lapo’a lea ua taoto mai i lona mafaufau, poo fea lea ua sauni auauna e momoli aga’i i ai o ia, pe momoli fo’i i lona aiga sa nofo ai, poo se isi nofoaga ese lea ua sauni auauna a le Tupu e momoli i ai o ia. I le umi o le malaga ma le pogisa o le po i lea afiafi, ae fa’afuase’i loa ona fa’alogoina e Ianeta ua tu le ta’avale, ona ia vaaia lea o le auauna o loo ia aveina le ta’avale ua faliu mai i tua ma fa’apea mai lana tala, “Ianeta, o le nofoaga tonu lenei na fa’atonu i maua e le Tupu e momoli mai i ai oe”. Na tau nofo le tata o le fatu o le teineititi ina ua ia fa’alogo atu i le fa’amatalaga a le auauna, o lea na ia fa’apea atu ai, “Se fa’amolemole lava ali’i, e fa’afefea ona lua tuua a’u i lenei nofoaga i le pogisa o le po toe leai ni tagata e nonofo ai, sa sili ai lava pe ana tuu pea a’u i totonu o le malo o Eteuati II ou te nofo pologa ai pea, nai lo le oti i lenei nofoaga fa’apenei”, o le augani atu lea a Ianeta i auauna, ae le toe suia ai le polokalame a auauna ua i ai, ae ua la si’i i lalo ma le ta’avale ato e lua a le tama’ita’i ona la fa’apea atu lea i ai, “Ianeta, e sili atu lou sa’olotoga lena ua maua nai lo se isi fa’aiuga e tu’uina mai e le Tupu ia te oe”, o upu mulimuli ia a auauna ma la tulioso loa i le la ta’avale ae toe fo’i atu i totonu o le aai.

 

Talofa i le tuua to’atasi ai o Ianeta i le pogisa ma le togavao e leai ni tagata e nonofo ai, ma ua le mautonu fo’i lona mafaufau i se gaoiga o le a faia ina ia fa’asaoina mai ai lona ola mai tagata faomea ma le fasioti tagata o loo feoa’i solo i vaega eseese o le malo. O sina malamalama na mafai ona maua mai le susulu o le masina fa’atoavaaia i lea po, na mafai ai ona iloa e Ianeta lalo o se laau tele lava o loo tu i tafatafa o le auala, na aga’i atu ai loa ma mapu i ai i le leva o le po, e fa’atali ai se fesoasoani mo ia i le aso fou e sosoo ai.