Na manino i le molimau a le afioga i le Loia Sili a le malo i se iloiloga sa faia a le maota o sui i le vaiaso nei, e le o i ai se tulafono e fa’asa ai e le malo ona taofi le aufai pisinisi ma le ta sii o tau o a latou oloa i soo se taimi, se’i vagana ai lava le tulafono e faasa ai ona si’i e le aufai pisinisi tau o oloa i le taimi e fa’alauiloa aloaia ai e le kovana o le malo, le i ai lea o se faalavelave faalenatura i totonu o le atunu’u.

O le tele ai o fa’asea mai le atunu’u na taunu’u atu i afioga i faipule o le maota o sui, e fa’atatau i le tele o pisinisi ua latou soona sii maualuga tau o pepa sikaleti ina ua tau le toe maua lea oloa i le atunu’u, aemaise ai o ni isi lava o oloa, na fa’aleo ai e faipule le tele o fesili e uiga i lenei mataupu, ma valaau ai loa le iloiloga ma le loia sili a le malo ia Talauega Eleasalo Ale, faapea ai ma le Faatonusili o le Ofisa o Fefa’atauaiga ma Alamanuia a le malo ia Keniseli Lafaele.

Na taua e le afioga i le ali’i faipule mai Manu’a ia Vesi Talalelei Fautanu Jr, o se tasi lea o faipule sa fa’aleoina lenei mataupu i luma o le maota i le vaiaso nei e fa’apea, ua to’atele tagata o lona itumalo ua fa’aoo atu i lona ofisa a latou fa’asea, i le maualuga o le tau ua i ai le pepa sikaleti i le taimi nei, mai le $8 sa i ai i le $10 ma fa’asolo atu ai lava i le $15.

“O le agaga moni o lenei iloiloga, e fia malamalama le fono pe i ai se tulafono e fa’asa ai le aufai oloa mai le soona sii maualuga o le tau o oloa i le taimi e tau le maua ai i le atunu’u, ae afai fo’i e leai se tulafono, o le a se vaega a le Fono e mafai ona fai ina ia fesoasoani atu ai i le atunu’u lea ua tagi mai mo se fesoasoani”, o le saunoaga lea a Vesi.

Ao le i tali Talauega e uiga i le mataupu, sa ia talosagaina afioga i faipule ina ia logo tagata o latou itumalo, afai ua latou molimauina ni gaioiga faapea i o latou nu’u ma itumalo, ia fa’afesootai le Ofisa o le Loia Sili, o loo i ai le vaega a lona Ofisa o loo gafa ma le tulaga lea, o le mata’ituina lea o pisinisi e soona sii maualuga le tau o oloa.

“O le tali i le fesili a le ali’i faipule, ua mae’a ona pasia le tulafono ma ua i ai fo’i le tulafono e faasa ai pisinisi ona soona sii maualuga tau o oloa, pe a oo i le taimi e faalauiloa aloaia ai e le kovana o le atunu’u le i ai lea o Amerika Samoa i se tulaga mo fa’alavelave faafuase’i poo faalavelave faalenatura fo’i”, o le saunoaga lea a Talauega.

Na lagolagoina e le afioga i le ali’i faipule ia Gafatasi Afalava le saunoaga a Vesi, ma ia faamaonia ai le i ai o pisinisi o loo latou faia le tulaga lea, o le sii maualuga o le tau o oloa i le taimi e fa’aitiitia ai lea ituaiga oloa i le atunu’u.

Na toe faamanino atili e Talauega i le maota e fa’apea, e le aia le malo i soo se taimi e sii ai e le aufai pisinisi tau o a latou oloa, ona o tulaga i tauvaga i maketi atoa ai a le aia sa’oloto o le faipisinisi i lalo o le tulafono, sei vagana ua i ai le atunu’u i tulaga o faalavelave matuia faalenatura, ona faatoa mafai ai loa lea ona apalai le tulafono e faasa ma faatonutonu ai le tau o oloa.

Saunoa le sui fofoga fetalai ia Fetu Fetui Jr e fa’apea, e leai se malosi poo se aia o le malo poo se tasi foi e taofia ai le fai oloa mai le soona sii maualuga o le tau o ana oloa.

Na taua e ni isi o faipule e fa’apea, ua maitauina le galulue faatasi o tagata faipisinisi mai Asia e lagolago tulaga i tau o oloa, ma ua faigata ai ona maua e le atunu’u se mapusaga i le maualuga o le tau ua i ai ni isi o oloa, ae na saunoa le loia sili e fa’apea, e i ai lava le aia tatau i le tagata fa’atau e filifili ai i le faleoloa e fa’atau ai, pe afai na te silafia e taugata tau o oloa i le isi faleoloa.

“O loo i ai le aia tatau i tagata faatau a le atunu’u e filifili ai i le faleoloa e taugofie ma talafeagai tau o ana oloa mo ia, afai ua maualuga tau o le isi faleoloa, alu i le isi faleoloa, aua o le tele o afioaga ua toeititi 3 i le 4 faleoloa o loo tutu solo ai”, o le saunoaga faatupu manatu lea a le loia sili, peita’i na saunoa le afioga i le tama’ita’i faipule ia Vui Florence Saulo e fa’apea, pau le fa’afitauli o le tulaga lea o le filifili o le tagata faatau poo fea le faleoloa e alu i ai, ona o le to’atele o tagata e leai ni ta’avale, ae o le faleoloa lava ua latalata ane i lona fale, o le faleoloa lava lena e faatau ai i latou.

O se tasi o mataupu sa fesiligia e le afioga i le ali’i faipule ia Gafatasi, o oloa mai fafo e le o i ai se gagana fa’aperetania i le tino o le pepa poo le tino o le oloa, atoa ai ma oloa ua te’a le taimi e fa’atau ai ae o lo o fa’aauau pea ona fa’atau i luga o fata, ae na saunoa le loia sili e fa’apea, e tatau i le atunu’u ona logo le ofisa o le loia sili i soo se taimi latou te molimauina ai tulaga fa’apena, o lo o i ai lana aufaigaluega o loo galulue i aso taitasi mo le foiaina o ia tulaga.

“O le fautuaga mo le atunu’u, afai e molimauina tulaga fa’aletonu faapea i soo se taimi, fa’afesoota’i mai la matou ofisa i le (684) 633 4163 mo se fesoasoani, e mafai ona matou fesoasoani mo outou”, o le saunoaga lea a le loia sili.