E ese mai i le to’a 40 ma ona tupu tagata matutua o lo o auai i le polokalame a le Matagaluega o Tupulaga Talavou, Tina ma Tama’ita’i (DYWA) e a’oa’oina ai tomai eseese e pei o le su’isu’i, tuiina o teu fugalaau, elei aemaise ai o le gaosiina o mamanu mo laei, e to’atele atu ni isi o le atunu’u ua fa’amanuiaina i latou ma o latou aiga i nei polokalame.

E 4 masina o le polokalame a le DYWA o lo o fa’agasolo i le taimi nei, lea o lo o a’oa’oina ai le to’atele o tagata matutua i matata eseese e fesoasoani ai i le amataina o se tama’i pisinisi e maua ai tupe mo le aiga.

O le susuga a DJ Collins, o le Matua o Faiva lea mo le galuega o le Elei Printing, se tasi o galuega ua to’atele ni isi o aiga ua fa’amanuiaina ai, talu mai aoaoga sa fa’atasi atu ai i latou i tausaga ua mavae.

Na taua e Mareko Onosa’i o Aua i le Samoa News, ua silia i le 6 masina talu ona amata le la pisinisi Elei ma lona to’alua, talu ona fa’au’u mai lona to’alua i le isi aoga a le DYWA i le tausaga nei, ma ua la molimauina le tele o le fesoasoani mai le la tama’i pisinisi o lo o fai nei i le atina’eina o le aiga.

“E to’atele aiga ua fa’atoai mai a latou oka mo ni ie elei e fai meaalofa ai i aiga i fafo, o ni isi fo’i o aiga o oka masani lava mo laei o le aiga, ma ua avea lea ma auala ua lagona ai le fa’amalosi e fa’atino le galuega, ona o loo maua ai ni tupe fa’aopoopo mo le aiga, e ese mai i galuega o loo ma galulue ai ma le Tina o le aiga i le kamupani ma se tasi o Kamupani o Oloa Si’iatoa i le atunu’u”, o le saunoaga lea a Onosa’i.

O le agaga atoa o polokalame o lo o fa’agasolo a le DYWA, ina ia maua ai le avanoa e fesoasoani ai i aiga e amata ni nai pisinisi laiti, e fesoasoani ai i le itu tau tupe o le aiga, ma e le fa’apito fo’i i se tasi lenei polokalame, ae tatala i soo se tagata e aofia ai Samoa ma isi atunu’u eseese.

Mo le vaega o le Elei, na taua e le Matua o Faiva ia Collins le tele o la’asaga o le aoga e tatau ona ausia e le vaega, ina ia mautinoa ua atoatoa lo latou silafia i le fa’atinoina o le elei, e aofia ai le tusiaina o le ata, fa’ata’atitiaina o mamanu, ma fa’asolosolo atu ai lava seia oo ina iloa fa’atulaga le elei i luga o le ie.

O lo o i ai le fa’anaunauga o le afioga i le Fa’atonusili o le DYWA, Jonathan Fanene o le a fa’aauau pea polokalame nei mo le mamalu o le atunu’u, ina ia mautinoa e tele se fesoasoani i le atina’eina o pisinisi laiti mo aiga.

E ese mai i aoaoga fa’apitoa e pei ona taua, lea o loo to’atele ai tagata matutua, o lo o fa’agasolo fo’i aoaoga mo i latou e fia silafia auala e fa’aaoga ai masini computer, e fesoasoani ai fo’i i ni isi o metotia ma tomai fa’aonaponei, i tupulaga ma i latou e lei maua le avanoa latou te a’oa’oina ai nei ituaiga matata eseese i totonu o aoga.