Ads by Google Ads by Google

To’atele na taofia faapagota i aso malolo Kerisimasi ona o solitulafono eseese


[ata: foa'i]
ausage@samoanews.com

Pago Pago, AMERIKA SAMOA

 

E toatele le mamalu o le atunu’u na taofia faapagota e Leoleo i aso malolo o le Kerisimasi na te’a nei, ona o tu’uaiga i solitulafono eseese sa aafia ai i latou. O le tele lava o nei solitulafono sa aafia ai le ‘ava malosi.

 

E to’a 7 na pu’e faapagota e Leoleo ma molia i le tagofia o le ‘ava malosi atoa ai ma le faatupu vevesi i nofoaga faitele; e to’atolu na taofia ma molia i le faia o sau’aga i totonu o aiga faasaga i ta’ito’alua ma fanau; to’alua na taofia ma molia i le faaoolima; to’alua na taofia ma molia i le umia faasolitulafono o fualaau faasaina, faapea ai ma le isi to’alua na taofia ma molia i le fa’aaoga faasolitulafono o se a’upega faasaga i nisi tagata.

 

E ui i le to’atele o i latou na taofia e Leoleo ona o solitulafono eseese, e leai se soifua na maimau e mafua mai i se faalavelave, e pei ona faamaonia mai i se ripoti mai le Matagaluega o le Puipuiga o le Saogalemu Lautele. 

 

O le po o le aso Tofi o le vaiaso na te’a nei na amata taofia ai e Leoleo i latou na pu’e faapagota seia oo mai i le po o le Aso Sa na te’a nei, ao lumana’i ai le taeao o le Aso Gafua o le vaiaso nei na tutula’i ai i latou uma i luma o le Fa’amasinoga Faaitumalo mo a latou ulua’i iloiloga.

 

O le to’atele o i latou nei na toe tatala i tua i o latou aiga e le afioga i le ali’i Fa’amasino ia Elvis P. Patea e aunoa ma se tupe e totogi, i lalo o tuutuuga faapitoa e ao ona latou usita’i i ai, se’i vagana ai se vaega to’aitiiti na faatulaga e le Faamasinoga vaega tupe e tatala ai i tua ona o le matuia o tu’uaiga o loo aafia ai i latou.

 

SAUAGA FAASAGA I TA’ITO’ALUA MA FANAU

 

E to’atolu ni ali’i na taofia ma molia i le faia o sauaga faasaga i o latou ta’ito’alua ma fanau. O le faalavelave muamua na tula’i mai i Ottoville i le po o le aso Faraile na te’a nei, o le aso tonu lea o le Kerisimasi, Tesema 25, 2020 i le itula e 7:31 i le afiafi, ina ua talosagaina e se Tina le Ofisa o Leoleo i Tafuna mo se fesoasoani, faasaga i lana tama teine na faaoolima i ai lona to’alua. 

 

E to’atele Leoleo na tali i le valaau ma latou pu’e faapagota mai ai se ali’i e 35 tausaga le matua mai Ottoville ma auina atu loa i le Ofisa o Leoleo mo suesuega. Na taua e le Tina na ia ripotia le fa’alavelave e faapea, o latou e nonofo i Ottoville, ae o tua atu o le latou fale e tu ai le fale a lana tama teine ma lona to’alua.

 

Na faateia i laua ina ua tamo’e mai i luma o le latou fale si ana tama ma ona foliga o loo filogia i le toto. Na taua e lana tama ia te ia, na tu’i e lona to’alua ona foliga ma palasi ai i lalo. 

 

O le faalavelave lona lua na tula’i mai i Malaeimi i le po o le aso Toonai, 26 o Tesema ina ua talosagaina e se Tina talavou se fesoasoani a Leoleo, e mafua mai i lana uo tama i lona tago lea ma una’i o ia aga’i i le faitoto’a o le ta’avale i le mae’a ai lea o se la taugaupu.

 

Na pu’e faapagota e Leoleo le ali’i e 56 tausaga le matua ma auina atu i le Ofisa o Leoleo i Tafuna mo suesuega.

 

O le isi faalavelave na tula’i mai i Pavaivai i le aoauli o le aso Sa na te’a nei, Tesema 27, ina ua faaoolima se alii e 41 tausaga le matua i lona toalua faatasi ai ma lana fanau teine e to’alua. Na taunu’u Leoleo i le fale o le aiga ma vaaia ai le Tina ma lana fanau na aafia o loo lalafi i totonu o le potu ae ua sola ese le ua molia.

 

I le tuana’i ai o tula e 4 mulimuli ane ai, na pu’e faapagota ai loa e Leoleo le ua molia ina ua vaaia o ia o loo ti’eti’e atu i tua o le pikiapu a se isi aiga.

 

O nisi o tuutuuga ua tatala ai i latou nei i tua, o le aua lea nei toe taumafai e faafesoota’i o latou ta’ito’alua ma fanau, e le mafai foi ona latou toe fo’i i o latou aiga, a ia saili nisi nofoaga e nonofo ai ao faagasolo ai taualumaga o a latou mataupu.

 

ALI’I MOLIA I LE UMIA O FUALAAU FAASAINA

 

E to’alua ni ali’i na taofia faapagota mai e Leoleo mai Happy Valley i le aoauli o le aso Kerisimasi na te’a nei, ona o tu’uaiga i lo la faatupu lea o le vevesi i se fiafia a se aiga sa faia ai. Na talosagaina e le aiga e ana le fiafia le fesoasoani a Leoleo, mo se avanoa e aveese ai alii nei e to’alua mai le latou mafutaga.

 

Na sosola ese ali’i nei e to’alua ao le i taunu’u Leoleo ina ua la iloa ua uma ona telefoni e le aiga le Ofisa o Leoleo mo se fesoasoani. Na tuliloa e Leoleo i laua nei ma maua ai i luma o se Faleoloa i Petesa. O i laua e to’alua ua molia e aofia ai Alatini Pilato ma Avau Moelata.

 

A o le i auina atu Pilato ma Moelata i le Ofisa o Leoleo i Tafuna mo suesuega, na saili e Leoleo o la tino mo ni aupega mata’utia, ma maua ai ia Pilato se paipa tioata o loo i ai vaega o le pauta faasaina o le aisa, ae na maua ia Moelata sikaleti mariuana e 2 ua uma ona taai. I le taimi na taofia faapagota ai e Leoleo Pilato ma Moelata, na faalogoina ai le malosi o le manogi ‘ava malosi e sau mai o la tino.

 

Na taua e molimau i Leoleo e faapea, na avea le pisapisao o Pilato ma itu na fautuaina ai loa o ia e le Tama e ana le fale sa faia ai le fiafia ina ia aga’i ese ma le fanua, peita’i na ita Pilato ma lafo i le Tama upu masoa. 

 

Na taumafai atu le to’alua o le Tama e ana le fale e toso ese Pilato peita’i o le taimi lea na oso faalava ai loa Moelata e ala i lona togi o se atigi fagupia i lalo o le fola o le fale ma ta’e ai. Na ee fo’i i luga Moelata ma lu’i solo tagata o le aiga e alu atu se isi la te fusu.

 

Ina ua fesilgia e Leoleo ia Pilato e tusa ai o tu’uaiga faasaga ia te ia, na ia ioeina ai lona leoleoa ma laulauvavale solo i le taimi o le fiafia a le aiga. Sa ia ioeina fo’i lona taumafai e una’i ese le Tina e ana le fale i le taimi na taumafai ai le Tina e toso ese o ia.

 

Ae tusa ai o le paipa na maua i lana taga, na taua e Pilato i Leoleo e faapea, o le paipa tioata na ia maua i luga o le nofoa i fafo o le fale o le aiga sa faia ai le fiafia, lea na ia tago ma tu’u i le taga o lona ofuvae ma lona manatu e le o i ai se mea i totonu, ae na faateia o ia ina ua faaloa atu e Leoleo ia te ia, o loo tumu le paipa tioata i vaega o le pauta paepae o le aisa.

 

Ina ua fesiligia e Leoleo ia Moelata, sa ia ioeina ai lona laulauvavale ma leoleoa i le taimi na faatonu ai e le Tina e ana le fale i laua ma Pilato la te o ese. Sa ia ioeina fo’i lona tago togi i lalo o le fola o le fale se fagu pia ma ta’e ai. 

 

Ae ina ua fesiligia o ia e tusa ai o sikaleti mariuana e lua na maua i lana taga, na ioe ai Moelata, o ana sikaleti mariuana e 3 na faatau mai i se tasi o ali’i ave taxi mai Vaitogi o loo feaalua’i e la’u pasese ma tulei solo ana fualaau faasaina. Na taua atili e Moelata i Leoleo e faapea, o le isi sikaleti mariuana e tasi na la ulaina ma Pilato i le taimi na la o ai i le fiafia a le aiga tuaoi, o le mafua’aga lea o le faigata ona faatonutonu o a la gaioiga sa faia, ona ua ova le ‘ava malosi ma le mariuana.

 

Ua molia nei e le malo ia Pilato i le moliaga e tasi o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 10, pe faasala foi i le salatupe e oo atu i le $20,000, poo le faasala foi i faasalaga uma ia e 2. E $5,000 le vaega tupe lea ua faatulaga e tatala ai o ia i tua.

 

Ua molia Moelata i le moliaga e tasi o le umia faasolitulafono o vaega o le laau faasaina o le mariuana, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala i le salatupe e oo atu i le $20,000, atoa ai ma isi solitulafono mama e pei o le faatupu vevesi i nofoaga faitele.

 

E $5,000 lea ua faatulaga e tatala ai Moelata i tua mai le Toese i Tafuna.